II З'езд вучоных Беларусі ў Мінску

Прэзентацыя самых значных дасягненняў беларускай навукі і праектаў будучага, актыўнае абмеркаванне сусветных тэндэнцый і міжнароднага супрацоўніцтва вучоных, ідэі для матывацыі моладзі да навукі… У Мінску адкрыўся II З'езд вучоных Беларусі – праз дзесяць гадоў пасля першага – які па праву стаў падзеяй-кульмінацыяй Года навукі.

Маштабны форум сабраў у сталіцы амаль 2,6 тысячы ўдзельнікаў з усёй краіны і больш за 500 запрошаных замежных калег. І невыпадкова: Беларусь мае пагадненні аб супрацоўніцтве ў навукова-тэхнічнай сферы з 46 дзяржавамі і штогод вядзе больш за 900 узаемавыгадных сумесных праектаў.

Першы дзень форуму, 12 снежня, вучоныя абмяркоўвалі ключавыя пытанні развіцця навукі па 9 тэматычных секцыях. І кожная - аб самым запатрабаваным, актуальным, перспектыўным: "Фізіка і інфарматыка ў тэхналогіях будучыні", "Тэхнічныя навукі – Індустрыя 4.0", "Сучасная хімія і рацыянальнае прыродакарыстанне", "Сучасныя біятэхналогіі", "Медыцынскія і фармацэўтычныя навукі", "Айчынная гуманітарыстыка – грамадству", "Інавацыйна аграпрамысловы комплекс", "Моладзь і новыя гарызонты навукі", "Міжнароднае навуковае ўзаемадзеянне на сучасным этапе". Акрамя таго, адразу на некалькіх пляцоўках сталіцы разгарнуліся выстаўкі дасягненняў, якімі можа ганарыцца айчынная навука.

А 13 снежня ўсе дэлегаты сабраліся ў Палацы Рэспублікі на вялікае пленарнае пасяджэнне з удзелам Прэзідэнта Беларусі. У цэнтры ўвагі – ключавыя вынікі развіцця навукі Беларусі і тэматычнага года, які завяршаецца, а галоўнае – праект маштабнай стратэгіі "Навука і тэхналогіі: 2018-2040", які  вызначыць планы на два дзесяцігоддзі наперад. Поўная лічбавізацыя эканомікі, перавод прамысловасці на новы ўзровень (рабатызацыя), паляпшэнне якасці прадуктаў харчавання і харчовая бяспека – навука будучага абяцае быць прарыўной, цікавай і сапраўды карыснай! Акрамя таго, пад дэвізам "Беларусь інтэлектуальная" на аб'яднанай тэматычнай выстаўцы прадставілі 8 кластараў, звязаных з прыярытэтамі развіцця краіны і распрацоўкамі апошніх гадоў, на якія Беларусь робіць стаўку. Сярод іх – персанальны суперкамп'ютар, электрамабіль, электравеласіпед, беспілотнікі, сонечныя элементы, разумныя ніткі для лёгкай прамысловасці...