У апошнюю і нават нетыпова гарачую суботу жніўня Верхні горад Мінска ператварыўся ў квартал… Тбілісі. Не толькі дзякуючы кліматычнаму супадзенню, але, перш за ўсё, каўказскаму настрою. Ужо другі раз у самым цэнтры беларускай сталіцы адбыўся фестываль "Тбілісоба", прысвечаны Грузіі, яе галоўнаму гораду і часу збору ўраджаю. Паводле падлікаў арганізатараў, у гэтым годзе яго наведалі каля 20 тысяч гасцей.
Фестывальны дзень аб'яднаў канцэрты, іскрамётныя танцы, майстар-класы ад лепшых грузінскіх шэф-повараў і, вядома, дэгустацыі нацыянальных страў – хачапуры, хінкалі, пхалі, чурчхелы… Акрамя таго, жадаючыя вучыліся ціснуць вінаград для будучага віна, вырабляць гліняны посуд, ткаць нацыянальны дыван і нават стрыгчы авечак.
Дарэчы, гэтым летам каля мінскай ратушы, дзе кожныя выхадныя кіпіць фестывальнае жыццё, адбыліся чатыры святы нацыянальнай культуры: карэйскай, польскай, украінскай і грузінскай.
Калейдаскоп падзей "Тбілісоба"-2016 – у фотагалерэі...