ДЗЕНЬ ПЕРАМОГІ: "Беларусь памятае"

Беларусь адзначае Дзень Перамогі ў Вялікай Айчыннай вайне – асаблівае, блізкае кожнай сям'і свята, якое злучыла радасць і смутак, стала вечным напамінам таго, як важны і бясцэнны мір. 

Па традыцыі галоўныя ўрачыстасці краіны пачаліся ў самым "сэрцы" сталіцы – на плошчы Перамогі ў Мінску ля абеліска-сімвала, які ўжо многія гады з'яўляецца напамінам аб самай трагічнай вайне ў гісторыі Беларусі.

З самай раніцы ля манумента Перамогі сабраліся тысячы беларусаў розных пакаленняў – з партрэтамі загінулых герояў, ветэранаў і ўдзельнікаў вайны, сваякоў. Гэта даніна памяці і павагі тым, хто дзесяцігоддзі таму не шкадаваў жыцця, абараняючы родную зямлю.

Пад гукі марша на плошчу да Вечнага агню ўнеслі сімвал Сцяга Перамогі і штандары чатырох франтоў, якія вызвалялі Беларусь ад захопнікаў. А далей – урачыстая цырымонія ўскладання вянкоў з удзелам кіраўніка дзяржавы. Аляксандр Лукашэнка звярнуўся да беларусаў са святочным выступленнем, аб'явіў мінуту маўчання ў памяць аб загінулых героях.

Да абеліска Перамогі ляглі вянкі ад усіх галін беларускай улады, грамадскіх арганізацый, дыпламатычнага корпуса і духавенства.