Галоўныя навіны

У Лукашэнкі абмяркоўваюць неабходнасць стварэння ваенных пракуратур

2 лістапада, Мінск /Кар. БЕЛТА/. Прэзідэнт Беларусі Аляксандр Лукашэнка сабраў нараду па пытанні стварэння ваенных пракуратур, перадае карэспандэнт БЕЛТА.

"Тэма сённяшняга мерапрыемства - ваенная пракуратура. Не буду характарызаваць абстаноўку ў свеце: вы добра яе ведаеце. Сітуацыяй на нашых рубяжах таксама валодаеце. Проста нагадаю, перш чым абмеркаваць гэтыя пытанні, што ў 2014 годзе было прынята рашэнне аб ліквідацыі сістэмы ваенных пракуратур", - сказаў Аляксандр Лукашэнка.

Паўнамоцтвы па наглядзе за выкананнем заканадаўства ва Узброеных Сілах, іншых войсках і воінскіх фарміраваннях Беларусі перадалі грамадзянскім органам пракуратуры. Гэта рашэнне прымалася тады ў іншых умовах і было накіравана ў тым ліку на скарачэнне штатнай колькасці ў рамках рэформы дзяржапарату, а таксама змяншэнне бюджэтных расходаў, адзначыў кіраўнік дзяржавы.

"У 2014 годзе мы на больш шырокай нарадзе прынялі рашэнне аб скарачэнні ваеннай пракуратуры. Не буду нагадваць, чым гэта было выклікана, матывацыю. Але паўстае заканамернае пытанне: а цяпер на тым полі, у той зоне, дзе пракуроры павінны назіраць за аднастайным, дакладным выкананнем нашых законаў, абстаноўка ў гэтых галінах змянілася? Напэўна. Паўстае пытанне: настолькі змянілася, што нам трэба сёння ствараць ваенныя пракуратуры, аднавіць іх?" - спытаў Прэзідэнт.

Генеральны пракурор у якасці дзейснай меры прапануе стварыць Галоўную ваенную пракуратуру і міжгарнізонныя ваенныя пракуратуры. "Трэба вызначыцца па гэтым пытанні", - падкрэсліў беларускі лідар.

Аляксандр Лукашэнка пацікавіўся ва ўдзельнікаў нарады, якая склалася практыка ў іншых дзяржавах. Ён таксама заўважыў, што выказваліся і альтэрнатыўныя меркаванні аб мэтазгоднасці стварэння сістэмы ваенных пракуратур: такія структуры неабходны, але толькі ва ўмовах ваеннага часу.

"Таксама пытанне: не дай бог, пачалася вайна - мы хутка ствараем пракуратуры. Без гэтага справіцца не можам? Калі не можам, магчыма, і трэба. Калі зможам, навошта? І наогул гэта галоўнае пытанне: адкуль яно з'явілася, чаму сёння ўзнята, пракурорамі перш за ўсё? І пытанне галоўнае: трэба сёння ці не трэба аднаўляць сістэму пракурорскага нагляду, якая была да 2014 года, - сказаў Прэзідэнт. - Для абмеркавання названых пытанняў, прыняцця рашэння я і запрасіў вас сюды. Чакаю канкрэтных прапаноў, зыходзячы выключна з агульнадзяржаўных задач гарантавання нацыянальнай бяспекі".

Як адзначыў генеральны пракурор Андрэй Швед, органы пракуратуры працуюць на павышэнне эфектыўнасці нагляднай дзейнасці па ўсіх напрамках. Шэраг ведамасных ініцыятыў рэалізаваны і сёння дае свой вынік.

"У сувязі з ваенна-палітычнай абстаноўкай, якая складваецца паблізу нашых граніц, намі праведзены аналіз арганізацыі нагляду за законнасцю ў войсках за мяжой, у тым ліку ў час ваенных канфліктаў. Ва ўсім свеце ваенныя пракуроры з'яўляюцца абавязковым элементам сістэмы нацыянальнай бяспекі. Іх функцыянал паўсюдна задзейнічаецца ва ўсіх ваенных канфліктах", - далажыў кіраўнік нагляднага ведамства.

Падводзячы вынікі нарады пасля абмеркавання пытанняў, якія стаялі на парадку дня, Аляксандр Лукашэнка адзначыў, што прымаць рашэнне аб стварэнні сістэмы ваенных пракуратур пакуль рана. Забягаць наперад не трэба, паколькі ў гэтым няма нічога надзвычайнага, падкрэсліў Прэзідэнт.

Аднак удасканальваць пракурорскі нагляд і павышаць яго эфектыўнасць, у тым ліку ў воінскіх падраздзяленнях, неабходна. Паводле слоў кіраўніка дзяржавы, у нетрах Генеральнай пракуратуры сёння трэба выкрышталізаваць аснову гэтай будучай сістэмы (падрыхтаваць кадры, зразумець фармат работы, наладзіць міжведамаснае ўзаемадзеянне), каб з часам, калі ўзнікне такая неабходнасць, аператыўна прыняць адпаведныя рашэнні.

"Кіраўнік дзяржавы адзначыў неабходнасць далейшага ўзмацнення ролі пракуратуры як нагляднага органа і прыняцця ўсіх мер, каб узмацніць пракурорскі нагляд у тым ліку і за нашымі Узброенымі Сіламі і іншымі воінскімі фарміраваннямі. Пастаўлена ім задача ў бліжэйшы час пачаць работу ў Генеральнай пракуратуры па падрыхтоўцы будучых ваенных пракурораў. Павінна быць створана своеасаблівая прамежкавая сістэма, структура, якая павінна падрыхтаваць неабходныя кадры, якія маюць вопыт ваеннай службы, разумеюць спецыфіку нагляднай дзейнасці ва Узброеных Сілах і воінскіх фарміраваннях. І, як сказаў кіраўнік дзяржавы, калі настане час, пры неабходнасці стварэння ваеннай пракуратуры будзе прынята рашэнне", - расказаў журналістам генеральны пракурор Андрэй Швед.

На нядаўніх нарадах з сілавым блокам Аляксандр Лукашэнка падкрэсліваў, што роля пракуратуры павінна павышацца. У сакавіку кіраўнік дзяржавы даручыў нагляднаму ведамству ўзмацніць сваю каардынуючую ролю, у тым ліку ў аналітыцы і ўнясенні аператыўных прапаноў па выкараненні тых ці іншых негатыўных наступстваў. У ліпені, прымаючы з дакладам генеральнага пракурора, Прэзідэнт таксама закрануў пытанні выканання законнасці ў войсках і сілавых структурах, падыходаў да арганізацыі эфектыўнай работы ў гэтай галіне.

версія для друку

зрабіць стартавай

дабавіць у выбранае