Галоўныя навіны
Сустрэчы з Пуціным і губернатарамі, стратэгія для АДКБ і ўступная кампанія. Падрабязнасці інтэнсіўнага тыдня Прэзідэнта
Праект "Тыдзень Прэзідэнта" для тых, хто хоча ісці ў нагу з кіраўніком дзяржавы, быць у курсе самых актуальных заяў і рашэнняў беларускага лідара.
Што цікавіць Беларусь у такіх далёкіх расійскіх рэгіёнах, як Калінінград і Прымор'е, і якія праекты прапанаваў там пашыраць Аляксандр Лукашэнка? Супрацоўніцтва з якім расійскім рэгіёнам Прэзідэнт лічыць Кландайкам, як гэтаму спрабуюць перашкодзіць заходнія вар'яты і колькі яшчэ Беларусь з Расіяй будуць цярпець іх выхадкі? Візіт Лукашэнкі ў Сочы, сустрэча з Пуціным і важная ініцыятыва - сумесны план дзеянняў. Сапраўдныя прычыны канфлікту ва Украіне і вынікі "контрнаступу"; роля АДКБ і СНД, якія павінны выступіць адзіным фронтам з міралюбівым парадкам дня. А таксама перспектывы нацыянальнай сістэмы адукацыі - чаго чакаць выпускнікам у 2024-м? Пра гэта і многае іншае - у новым выпуску спецпраекта БЕЛТА "Тыдзень Прэзідэнта".
РАСІЙСКІ ВЕКТАР. Аб чым дамовіўся Лукашэнка з губернатарамі і чаму гэта важна менавіта цяпер
Пад знакам развіцця ўсебаковага супрацоўніцтва з Расіяй і асобнымі яе рэгіёнамі стартаваў і завяршыўся працоўны тыдзень Прэзідэнта. У першыя яго дні кіраўнік дзяржавы сустрэўся з губернатарамі Калінінградскай вобласці і Прыморскага края, а ў другой палове сам накіраваўся з візітам у Расію. Важнасць паглыблення і нарошчвання ўзаемадзеяння з гэтай краінай у цяперашні час тлумачыць не даводзіцца. Беларусь і Расія і раней былі ў цесным кантакце па шырокім коле пытанняў, выбудоўвалі адносіны ў адзінай Саюзнай дзяржаве, ужо не гаворачы пра бягучую геапалітычную сітуацыю, калі заходнія краіны задзейнічаюць супраць нас разнастайныя сродкі - ад эканамічных санкцый да інфармацыйна-псіхалагічных атак.
Тэма сумеснага процідзеяння шалёнай палітыцы кіраўніцтва заходніх дзяржаў узнімалася 5 чэрвеня на сустрэчы Аляксандра Лукашэнкі з губернатарам Калінінградскай вобласці Расіі Антонам Аліханавым. Улічваючы геаграфічнае становішча гэтага рэгіёна, гаварылі не ўвогуле, тэарэтызуючы аб нейкіх вераломных планах, а цалкам прадметна аб канкрэтных і зусім не дружалюбных, мякка кажучы, дзеяннях суседзяў Калінінградскай вобласці.
Мы не пагражаем, а захоўваем свае інтарэсы
"Упэўнены, вы са мной пагодзіцеся, што зробленая Захадам у 2022 годзе беспрэцэдэнтная спроба абмежаваць нашы кантакты з вамі, свабодны рух (памятаеце) грузаў чыгуначным і аўтамабільным транспартам як з Расіі, так і з Беларусі, - гэта спроба была асуджана на правал, - падкрэсліў Прэзідэнт. - Як бы нас ні спрабавалі раздзяліць штучнымі бар'ерамі, не атрымаецца".
Больш таго, гэта небяспечна для таго боку, які выступае з такімі ініцыятывамі, перакананы Аляксандр Лукашэнка. Таму што такім чынам развязваецца эканамічная вайна (і не толькі эканамічная), якую Беларусі і Расіі вар'яты на Захадзе спрабуюць аб'явіць не першы раз ужо. "Потым няхай не крыўдзяцца. Мы ж нікому не пагражаем. Мы проста захоўваем нашы інтарэсы - Беларусі і Расіі. Пакуль з цяжкасцю, але ўдаецца неяк цярпець усе гэтыя выхадкі. Але бясконца гэта прадаўжацца не можа. Таму кіраўніцтва, падкрэсліваю, кіраўніцтва балтыйскіх дзяржаў, ды, напэўна, і Польшчы, павінна гэта добра разумець", - звярнуў увагу Прэзідэнт.
Паводле яго слоў, Беларусь і Калінінградская вобласць пераадольваюць усе складанасці, у тым ліку за кошт назапашанага патэнцыялу ў прамысловай сферы, вытворчай кааперацыі, сельскай гаспадарцы, гуманітарнай сферы. "Пры гэтым мы можам значна прыбавіць, - упэўнены Аляксандр Лукашэнка. - Магчымасцей у нас дастаткова. Мы падышлі да $500 млн тавараабароту. Гэта нядрэнная лічба. Але можам больш".
Аб значнасці візіту і вялікай зацікаўленасці беларускага боку ў развіцці супрацоўніцтва сведчыў той факт, што на перагаворах прысутнічалі многія прадстаўнікі ўрада. "Палова ўрада тут. Гэта сведчыць аб тым, наколькі вы блізкія нам і наколькі мы зацікаўлены ў развіцці супрацоўніцтва паміж Беларуссю і заўсёды блізкім для нас расійскім рэгіёнам", - заўважыў Аляксандр Лукашэнка. Традыцыйна Беларусь прапануе шырокі спектр сфер для супрацоўніцтва і рэалізацыі сумесных праектаў. У гэтым пераліку і пастаўкі тэхнікі, машын, транспарту, абсталявання і камплектуючых, прадукцыі аграпрамысловага комплексу, будаўнічых матэрыялаў.
Беларусь, зразумела, гатова да нарошчвання паставак харчовых тавараў, якія ўжо добра зарэкамендавалі сябе на расійскім рынку і вядомы пад маркай "Зроблена ў Беларусі". "Праўда, пачалі вельмі сур'ёзна і шмат разоў падрабляць гэты брэнд. Мы з гэтым сутыкаемся. Таму нам давядзецца і тут папрацаваць", - заўважыў кіраўнік дзяржавы.
Гаворачы пра супрацоўніцтва ў аграрным сектары, Прэзідэнт успомніў, як аднойчы яму давялося праляцець над тэрыторыяй Калінінградскай вобласці і добра разгледзець яе з невялікай вышыні. "Як чалавек вясковы я ўбачыў, што ў плане аграрнага напрамку - гэта проста Кландайк, дзе вельмі шмат работы", - сказаў ён.
Здзек з правіл СГА, або Чым на самай справе з'яўляюцца спробы перакрыць транзіт
У тым, што ў Беларусі і Калінінградскай вобласці ёсць шырокае поле для далейшай сумеснай дзейнасці, з Прэзідэнтам згодны і губернатар Антон Аліханаў. Гэты візіт у Мінск стаў для яго ўжо трэцім, дзякуючы чаму ён меў магчымасць больш дэталёва азнаёміцца з існуючым патэнцыялам Беларусі ў розных галінах і намеціць далейшыя крокі для нарошчвання ўзаемаадносін.
"Вы сказалі, Аляксандр Рыгоравіч, пра недружалюбныя дзеянні з боку ЗША, Еўрасаюза. І нягледзячы ні на што гэтыя дзеянні не могуць зламаць, змяніць нашу памяць, не змогуць зламаць упэўненасць у сваім праве самастойна вызначаць шляхі развіцця нашых краін, нашых народаў, - адзначыў Антон Аліханаў. - Вы сказалі пра транзіт, гэта, вядома, здзек з правіл СГА, наогул з міжнародных дамоўленасцей. Я нагадаю: калі Прыбалтыка ўступала ў ЕС, яны давалі юрыдычныя гарантыі таго, што калінінградскі транзіт будзе забяспечаны і не будзе ніякіх для гэтага перашкод".
"У мінулым годзе, нягледзячы на тое, што іх санкцыі практычна поўнасцю закрылі гэты транзіт, мы змаглі дзякуючы намаганням нашага Міністэрства замежных спраў, Адміністрацыі Прэзідэнта адбіць істотны аб'ём. І ўсё ж мы вязём аграрную і шэраг іншай прадукцыі аўтамабільным. Чыгуначны транспарт усё яшчэ функцыянуе даволі актыўна. І тут былі знойдзены хуткія шляхі, пераарыентавана частка таварнага патоку на парты ў Ленінградскай вобласці, Санкт-Пецярбургу, - расказаў губернатар. - У тым ліку беларускія тавары актыўна вязуцца марскім шляхам. Па рашэнні Прэзідэнта ўрад выдзеліў толькі ў гэтым годзе 3,8 млрд рублёў на тое, каб субсідзіраваць гэту марскую перавозку, каб яна не станавілася значна даражэйшай за чыгуначныя перавозкі".
ПЕРАГАВОРЫ З КАЖАМЯКАМ. Сустрэча сяброў і нечаканы фінал
Губернатарскія дні прадоўжыліся ў аўторак, 6 чэрвеня. У гэты дзень кіраўнік дзяржавы сустрэўся з кіраўніком Прыморскага края Расіі Алегам Кажамякам. Яго звязваюць з Прэзідэнтам Беларусі вельмі цёплыя і даўнія адносіны, якія прадаўжаюцца яшчэ з часоў, калі ён узначальваў Амурскую і Сахалінскую вобласці. Аб асаблівым статусе гэтага кіраўніка расійскага рэгіёна можна меркаваць па тым, што Аляксандр Лукашэнка прымаў яго ў сваім рабочым кабінеце, а не ў так званай губернатарскай зале Палаца Незалежнасці, дзе традыцыйна праходзяць сустрэчы з дэлегацыямі рэгіёнаў Расіі. Можна меркаваць, што за зачыненымі дзвярамі кабінета яны абгаварылі і прыватнае пытанне, якое датычыцца далейшага лёсу адной расійскай грамадзянкі. Але пра гэта пазней…
Пашырыць вузкія месцы. Вялікая адлегласць вялікаму гандлю не перашкода?
"Удзячны не толькі за тое, што вы прыязджаеце ў Беларусь, але і, праглядаючы ў сродках масавай інфармацыі, бачу вашы заявы, падтрымку Беларусі і беларускіх тавараў, прадукцыі, якую мы вырабляем, вашу ў Прымор'і зацікаўленасць у набыцці нашай прадукцыі. Чаго граху таіць, вашы выказванні, добрыя, станоўчыя водзывы аб нашай эканоміцы маюць добры водгук у вашых калег на Далёкім Усходзе. А з Далёкім Усходам мы заўсёды гатовы развіваць супрацоўніцтва", - падкрэсліў Аляксандр Лукашэнка.
Разам з тым кіраўнік дзяржавы заўважыў, што адлегласць накладвае на гэта пэўны адбітак. Хоць нават не сама адлегласць, а загружанасць чыгунак ва ўсходнім напрамку, удакладніў Прэзідэнт.
"Цэнтр цяжару эканомікі Расіі і Беларусі зрушыўся сёння на Усход. І вы як ніколі запатрабаваны. Гэта добра. Але тое, што чыгункі не спраўляюцца з гэтым патокам (Уладзімір Уладзіміравіч расказваў аб гэтым на апошняй нашай сустрэчы ў Маскве) - гэта факт. І тут нам трэба працаваць разам, каб пашырыць гэтыя вузкія месцы", - сказаў Аляксандр Лукашэнка.
Кіраўнік дзяржавы падкрэсліў, што ў Беларусі ў супрацоўніцтве з Прыморскім краем няма ніякіх закрытых тэм. "Мы нікога не баімся. Усё, што ў нас ёсць, - да вашых паслуг. Заўсёды дапамагалі і адгукаліся на вашы просьбы і запыты. Так будзе і ў далейшым", - запэўніў беларускі лідар.
Алег Кажамяка ў сваю чаргу адзначыў, што дэлегацыя края заўсёды наведвае "Белагра" вялікім складам. "І на гэты раз мы таксама прыбылі з даволі прадстаўнічай дэлегацыяй бізнесу і розных міністэрстваў, дзе людзі працуюць па машынабудаўнічым напрамку, сельскай гаспадарцы, дрэваапрацоўцы. Ужо заключаюцца пагадненні, кантракты. Мы бачым, што гэта супрацоўніцтва дае ўзаемную выгаду. Так, з 2019 года тавараабарот у нас павялічыўся ў шэсць разоў і цяпер ужо дасягае 7,6 мільярда (расійскіх. - Заўвага БЕЛТА) рублёў", - сказаў губернатар.
Другі шанц, або Крымінальная гісторыя са шчаслівым фіналам
Вечарам 7 чэрвеня стала вядома, што дэлегацыя Прыморскага края павезла з Беларусі не толькі новыя кантракты і дзелавыя дамоўленасці. Грамадзянку Расіі Соф'ю Сапегу, якую раней прыгаварылі ў Беларусі да 6 гадоў пазбаўлення волі, перадалі 7 чэрвеня з папраўчай калоніі ў Гомелі дэлегацыі Прыморскага края, якую ўзначальвае губернатар Алег Кажамяка. Дзяўчыну памілаваў Прэзідэнт Беларусі Аляксандр Лукашэнка.
"Па нашым звароце ўчора Аляксандр Рыгоравіч падпісаў указ аб памілаванні. Думаю, што такі крок мае і для цябе значэнне", - звярнуўся да памілаванай Алег Кажамяка.
"Хочацца падзякаваць Прэзідэнту Аляксандру Рыгоравічу Лукашэнку за тую магчымасць, якую ён мне даў, за той падарунак не толькі для мяне, але і для ўсёй маёй сям'і. За магчымасць вярнуцца дадому, да сваёй маці, да свайго бацькі. За тое, што мне быў дадзены другі шанц. Ён быў дадзены не многім, а мне сапраўды вельмі пашанцавала", - падзялілася першымі эмоцыямі Соф'я Сапега, якая, дарэчы, нарадзілася і правяла частку дзяцінства ў Прыморскім краі Расіі.
Алег Кажамяка пажадаў дзяўчыне, каб яе далейшае жыццё было шчаслівым. "Ты будзеш займацца ўжо эканомікай, сям'ёй. Заўсёды ёсць магчымасць агледзецца ў жыцці, зрабіць нейкія высновы. І самае галоўнае, каб потым увесь назапашаны, нерастрачаны патэнцыял, энергетыку ўкласці ў тыя праекты, якія будуць даваць магчымасць у далейшым нармальна сябе адчуваць. Няма нічога лепшага, чым на волі займацца любімай справай", - падкрэсліў губернатар.
ЯК БУДЗЕМ ПАСТУПАЦЬ? Справядліва
Тэма адукацыі і ўступнай кампаніі, якая праходзіць у краіне, заставалася ў полі зроку кіраўніка дзяржавы на працягу двух тыдняў. Калі да гэтага Прэзідэнт сваім своечасовым умяшаннем вырашыў канкрэтную праблему з падлікам балаў на цэнтралізаваных экзаменах, то цяпер размова зайшла аб больш канцэптуальных падыходах да ўступнай кампаніі.
Для гэтага Аляксандр Лукашэнка сабраў 6 чэрвеня нараду з шырокім колам удзельнікаў - ад чыноўнікаў рознага ўзроўню, адказных за сферу адукацыі, парламентарыяў, да кіраўнікоў канкрэтных устаноў адукацыі.
Кіраўнік дзяржавы адразу папярэдзіў, што нагода для нарады і яе тэматыка значна шырэйшыя, чым асобны эпізод з падлікам балаў на ЦЭ: "Мяне больш цікавіць, як будзем жыць далей. Гэту праблему (падліку вынікаў ЦЭ. - Заўвага БЕЛТА) мы вырашылі. Людзі разумеюць, як мы балы лічым, пераводзім, не пераводзім. Зрабілі сістэму больш зразумелай. Не у гэтым пытанне (гэта важна, мы пра гэта яшчэ пагаворым), а ў тым, як мы будзем далей ажыццяўляць набор нашай моладзі ў ВНУ".
Няма здароўя і адукацыі - няма чалавека
"Для чалавека самае галоўнае - здароўе і адукацыя. Няма здароўя і адукацыі - няма чалавека. Гэта аснова маіх перажыванняў наконт аховы здароўя і адукацыі", - растлумачыў кіраўнік дзяржавы.
Што датычыцца сістэмы аховы здароўя, то тут, паводле слоў Прэзідэнта, нібыта, разабраліся: "Пастаўлены канкрэтныя задачы і тэрміны - да 1 студзеня (2024 года. - Заўвага БЕЛТА) ахова здароўя павінна прыйсці да ладу". Разам з тым кіраўнік дзяржавы адзначыў адсутнасць значных зрухаў на гэтым этапе. "Пакуль я не бачу, што там на поўную моц разгарнуліся, - сказаў Аляксандр Лукашэнка. - Я хачу, Ігар Віктаравіч (Петрышэнка, віцэ-прэм'ер. - Заўвага БЕЛТА), перш за ўсё вас і прэм'ера папярэдзіць: глядзіце, каб не было балюча".
Вядзецца пастаянны кантроль за тым, як выконваюцца даручэнні кіраўніка дзяржавы, аднак "ніхто сёння моцна не разгарнуўся", заўважыў Прэзідэнт. "Я вам раю пачаць выконваць мае даручэнні па ахове здароўя. І рыхтуйцеся да разборак па сістэме адукацыі. Паступленне ў ВНУ дзяцей - гэта першараднае пытанне будзе да сістэмы адукацыі, самае галоўнае пытанне", - падкрэсліў Аляксандр Лукашэнка.
Права на памылку: нахамутаў - трэба не хвастом віляць, а выпраўляць
Падрабязна і дэталёва абмяркоўвалася сістэма ацэньвання ведаў выпускнікоў школ як адзін з важнейшых этапаў уступнай кампаніі. І тут Прэзідэнт паўтарыў сваё патрабаванне: усё павінна быць дакладна, проста і зразумела для людзей. У адрозненне ад таго, як здарылася на мінулым тыдні з падлікам балаў ЦЭ, калі чыноўнікі нахамуталі, напрыдумвалі так, што ні будучыя студэнты (абітурыенты), ні бацькі, ні ўсе астатнія нічога не зразумелі.
Што характэрна, праблема была менавіта з сістэмай падліку і не звязана з якімі-небудзь тэхнічнымі збоямі. Калі так адбылося, была дапушчана памылка, то трэба ўмець яе прызнаць, не баяцца рабіць гэта, перакананы кіраўнік дзяржавы. "Чаго мы хаваемся і віляем хвастом перад грамадствам? - сказаў ён. - Дапусцілі памылку? Так, дапусцілі - выправілі, своечасова паправілі дзякуючы тым жа людзям, якія на гэта адрэагавалі. Не трэба хавацца і чагосьці баяцца".
Вуснаму экзамену пасля школы быць ці не быць? Вось у чым пытанне
Аляксандр Лукашэнка паставіў перад удзельнікамі нарады шэраг пытанняў, на якія яшчэ трэба знайсці адказы, у тым ліку абапіраючыся на вопыт правядзення прыёмнай кампаніі ў 2023 годзе, якая праходзіць па новых правілах. Адно з самых важных пытанняў на перспектыву - якім чынам падводзіць вынікі сярэдняй адукацыі ў школах?
"Навошта мы знялі ў школах экзамены? Я як былы настаўнік разумею, што экзамен у школе - гэта вянец усяму. Ішлі як на свята, настаўнікі задаволеныя. І я прымаў экзамены. Нічога дрэннага там не было", - заўважыў кіраўнік дзяржавы.
"Мы пачалі спрашчацца: чатыры, тры, два экзамены... Дайшлі да таго, што ў школах не трэба экзамен (здаваць. - Заўвага БЕЛТА). Мы здаём адзіны экзамен - цэнтралізавана, - прадоўжыў Аляксандр Лукашэнка. - Мы знялі самы галоўны вынік работы у школах, вянец гэтага знялі ў школах і павезлі дзяцей у нейкія зборна-прыёмныя пункты здаваць цэнтралізаваны экзамен. Нават па форме неяк не вельмі".
Пры абмеркаванні пытання адмены выпускных экзаменаў у школе і замены іх на цэнтралізаваныя ў якасці адной з прычын называлася імкненне разгрузіць дзяцей. Аднак у гэтым трэба дзейнічаць разумна і не перастарацца, стварыўшы зусім цяплічныя ўмовы. "Я лічу, што дзеці, здаючы школьныя экзамены, трэніруюцца і рыхтуюцца здаваць экзамены ў ВНУ - больш сур'ёзныя. І потым, калі ты 11 гадоў нармальна займаўся, вучыўся, ты падрыхтуешся і здасі ў школе экзамен", - упэўнены беларускі лідар.
Яшчэ адным аргументам пры пераходзе да цэнтралізаваных экзаменаў было забеспячэнне аб'ектыўнасці ацэньвання ведаў у адрозненне ад школ, дзе настаўнікі маглі "падганяць" адзнакі. Аднак пры правядзенні ЦЭ высветлілася, што падагульняючыя адзнакі ў школе ў прынцыпе супастаўныя з вынікамі ЦЭ і не вельмі адрозніваюцца. "Мы падазравалі, што школы "падганяюць" неяк ацэнкі. А аказалася (вы самі гэту выснову ў міністэрстве зрабілі), што вынікі ЦЭ суадносяцца і супадаюць практычна з вынікамі ў школе. Дык навошта са школы забіралі экзамены?" - задаў слушнае пытанне кіраўнік дзяржавы.
Што чакае абітурыентаў у 2024 годзе?
Для яснасці тым, хто паступае сёлета, на нарадзе неаднаразова падкрэслівалася, што ўсе новаўвядзенні і змяненні, якія абмяркоўваюцца, разлічаны на перспектыву. Уступная кампанія 2023 года пройдзе па раней зацверджаных правілах. Але ж Прэзідэнт заўсёды мысліць больш маштабна, глабальна, а таму патрабуе, каб і астатнія за вырашэннем бягучых задач не забывалі аб мэтах на будучыню.
"Пры паступленні ў ВНУ мы павінны вызначыцца: або мы пойдзем зноў шляхам цэнтралізаванага тэсціравання, калі сядзіш там і часам тыкаеш пальцам у неба, або ж мы будзем здаваць экзамены шляхам гутаркі, выкарыстоўваючы сістэму, якая добра зарэкамендавала сябе. Або гэта будзе нейкі сімбіёз, сумесь таго і другога. Мы павінны дакладна вызначыцца. Гэта не для бягучага года (задача. - Заўвага БЕЛТА), але для наступнага года - жалезабетонна", - арыентаваў кіраўнік дзяржавы.
Па заяўленай тэматыцы ён анансаваў правядзенне вялікай нарады па аналогіі з тым, як гэта было нядаўна па рабоце сістэмы аховы здароўя. Асноўным пытаннем будзе правядзенне ўступнай кампаніі. Аляксандр Лукашэнка падкрэсліў, што пры яго абмеркаванні хацеў бы пачуць розныя, няхай нават палярныя пункты гледжання спецыялістаў, каб на іх аснове можна было выпрацаваць узважанае рашэнне. Асобна кіраўнік дзяржавы звярнуўся да старшыні Цэнтральнай выбарчай камісіі Ігара Карпенкі, які працаваў міністрам адукацыі да назначэння на гэту пасаду Андрэя Іванца, і даручыў яму далучыцца да дыскусіі, прыцягваючы таксама і іншых спецыялістаў са сферы адукацыі.
"Падкрэслю: памылак або, не дай бог, злоўжыванняў тут быць не павінна. Вы маю пазіцыю ведаеце: павінна быць справядліва і зразумела для людзей, - назваў галоўны крытэрый для будучых змяненняў Прэзідэнт. - Яшчэ раз паўтараю: маё галоўнае патрабаванне - гэта справядлівае стаўленне і справядлівасць, асабліва пры здачы экзаменаў". Менавіта такі падыход вельмі важна забяспечыць да абітурыентаў, якія робяць першыя самастойныя крокі ў дарослае жыццё, упэўнены Аляксандр Лукашэнка. "Гэта маладыя людзі, будучая эліта, будучыя ўпраўленцы краіны. Яны робяць першы рашучы свядомы крок, - сказаў Прэзідэнт. - І гэты крок павінен быць без усялякіх праблем і падазрэнняў".
А вас я папрашу застацца... Што павінны разумець мэтавікі?
Асаблівую ўвагу на нарадзе Прэзідэнт звярнуў на мэтавы набор у ВНУ. "Я хачу папярэдзіць па мэтавіках: людзі павінны разумець, што яны атрымліваюць адукацыю і вяртаюцца на канкрэтнае месца працы, - звярнуў увагу Аляксандр Лукашэнка. - Замуж - не замуж, усё роўна адпрацаваць трэба. Вядома, мы па-чалавечы будзем падыходзіць. Але мэтавікі павінны дакладна разумець, што ім давядзецца, згодна з дамоўленасцю, адпрацаваць пэўны час. І гэты час павінен быць салідным. Не два-тры гады, а мінімум пяць гадоў".
Прэзідэнт падкрэсліў, што мэтаваму набору трэба ўдзяліць сур'ёзную ўвагу. "Ад гэтага мы нікуды не дзенемся, таму што нам патрэбны і настаўнікі, і ўрачы, і аграномы, і заатэхнікі на канкрэтным месцы ў канкрэтным рэгіёне. І людзі, якія жадаюць паступаць у ВНУ і несці абавязацельствы па мэтавым прызначэнні, ёсць. Іх хапае, таму трэба падтрымліваць. У асноўным гэта дастойныя людзі, якія ідуць і працуюць", - сказаў кіраўнік дзяржавы.
Як адзначыў міністр адукацыі Андрэй Іванец, менавіта такіх падыходаў і прытрымліваюцца пры правядзенні ўступнай кампаніі: "Мэтавіком павінен быць не толькі матываваны, але і падрыхтаваны абітурыент".
АБСТАНОЎКА НАВОКАЛ НАПРУЖАНА ДА МЯЖЫ. Лукашэнка даў дакладныя ўстаноўкі, што рабіць у такой сітуацыі
У чацвер, 8 чэрвеня, адбылася сустрэча Прэзідэнта Беларусі Аляксандра Лукашэнкі з сакратарамі саветаў бяспекі дзяржаў - членаў Арганізацыі Дагавора аб калектыўнай бяспецы.
Падобнае мерапрыемства было ў графіку кіраўніка дзяржавы тыдзень таму: 1 чэрвеня ён сустрэўся з удзельнікамі 52-га пасяджэння Савета кіраўнікоў органаў бяспекі і спецыяльных службаў дзяржаў - удзельніц СНД.
Як тады, так і цяпер беларускі лідар зрабіў шэраг канцэптуальных заяў па сітуацыі ў рэгіёне, указаўшы на глабальныя прычыны таго, што адбываецца, і верагодныя сцэнарыі развіцця падзей. Кіраўнік дзяржавы зноў паўтарыў свой тэзіс аб тым, што ні ў якім разе нельга дапусціць расколу ў адносінах паміж краінамі на постсавецкай прасторы. Наадварот, прадстаўнікі сілавых структур і ў АДКБ, і ў СНД могуць і павінны садзейнічаць аб'яднанню краін на пляцоўках інтэграцыйных утварэнняў, развіццю іх дыялогу па пытаннях, якія ўяўляюць узаемны інтарэс, і ўрэгуляванню канфліктных сітуацый.
Наступаюць па ўсіх франтах, і свабоднага месца няма. Або чаму важна развіваць дыялог
"Дыялог паміж нашымі краінамі ў сферы ўмацавання калектыўнай бяспекі цяпер актуальны як ніколі. Скажу адкрыта, што ад вас, галоўных памочнікаў кіраўнікоў дзяржаў у вашых краінах па бяспецы, многае залежыць", - падкрэсліў Аляксандр Лукашэнка.
Прэзідэнт адзначыў, што такія сустрэчы даўно выйшлі за рамкі пратакольных, паколькі геапалітычная сітуацыя патрабуе выпрацоўкі своечасовых рашэнняў: "Вы бачыце, ваенна-палітычная абстаноўка напружана да мяжы, але гэта толькі вяршыня айсберга. У аснове ўсіх гарачых канфліктаў ляжыць масіраванае гібрыднае ўздзеянне на ключавыя сферы нашага грамадскага жыцця: эканамічную, інфармацыйную, біялагічную, сацыяльную, гуманітарную і нават духоўную. Наступаюць па ўсіх франтах, і свабоднага месца няма".
Прэзідэнт звярнуў увагу, што сітуацыя цяпер напружана ўсюды: на Каўказе і ў Цэнтральнай Азіі, ва Украіне, неспакойна ў Польшчы і Прыбалтыцы.
"На фоне таго, што адбываецца, мы маем справу з фактам крушэння ўсёй архітэктуры міжнароднай і рэгіянальнай бяспекі, якая фарміравалася дзесяцігоддзямі. За прыкладамі далёка хадзіць не трэба. Канфлікт на тэрыторыі Украіны - гэта адзін са многіх прыкладаў таго, як заходнія эліты выкідваюць трыльёны долараў на мілітарызацыю і разарэнне дзяржаў", - заявіў беларускі лідар.
Тры дні ўкраінскага "контрнаступу". Якія вынікі
Асобна кіраўнік дзяржавы выказаўся на тэму канфлікту ва Украіне, яго перадгісторыі, ролі Беларусі ў сітуацыі, што склалася, і яе садзейнічанні мірнаму ўрэгуляванню, а таксама аб пошуку вінаватых і выяўленні сапраўдных прычын. Не абмінуў Прэзідэнт і тэму магчымага ўкраінскага контрнаступлення, пра якое так шмат гавораць апошнім часам.
"Выбачайце за нясціпласць, як чалавек ужо вопытны ў палітыцы хацеў бы проста папрасіць вас і перасцерагчы ад спробы пашукаць цяпер нейкія прычыны. Рана ці позна мы будзем гаварыць аб прычынах гэтага канфлікту. Але цяпер важнейшае пытанне - спыніць гэты канфлікт", - падкрэсліў Аляксандр Лукашэнка.
"І павінен адкрыта сказаць, паколькі мы з Расіяй на адным баку: нас запісалі ў суагрэсары. Павінен сказаць, што "суагрэсары" з трэцяга дня канфлікту - а можа, і з першага - прапанавалі мірны працэс. І ён пачаўся тут, у Беларусі, - нагадаў кіраўнік дзяржавы. - Тры пасяджэнні прайшло, потым далі каманду: у Беларусь не ляцець. Я гэта ведаю дакладна".
Мірныя перагаворы было вырашана праводзіць у Стамбуле. Быў выпрацаваны праект дагавора з вялікімі ўступкамі з боку Расіі, расказаў Прэзідэнт. Кіраўнікі дэлегацый узгаднілі гэты дакумент, але на гэтым перагаворы спыніліся.
"Чаму не пайшлі далей? Таму што, хутчэй за ўсё, Украіна гэтыя рашэнні ўжо не прымала тады. Што гаварыць пра цяпер. Цяперашні момант характарызуецца тым (вось учора мы размаўлялі з Уладзімірам Уладзіміравічам, у нас абсалютна падобныя меркаванні), што Захад, які ваюе там (зразумела, калі б там не было зброі Захаду і наёмнікаў, даўно б ужо ўсё скончылася), чакае вынікаў "контрнаступу", - адзначыў Аляксандр Лукашэнка.
Кіраўнік дзяржавы заявіў, што за апошні час знішчана вялікая колькасць украінскай тэхнікі. Акрамя таго, паводле яго слоў, загінула вялікая колькасць украінскіх салдат.
"Тры дні "контрнаступу". Тое, што бачым мы, і інфармацыя, якую я атрымаў ад Прэзідэнта Расіі, цалкам супадаюць. За тры дні каля трох дзясяткаў танкаў знішчана - наступаючых, украінскіх. Абараняцца прасцей, чым наступаць - вы разумееце. 120 або 130 БМП за тры дні. І самае страшнае - больш за 2 100 загінула ўкраінцаў. 2 100! З гэтага боку крыху больш за 70. Вось вам вынік гэтай спробы "контрнаступу", - адзначыў Прэзідэнт.
Аляксандр Лукашэнка падкрэсліў, што контрнаступленне было вялікай дэзынфармацыяй з боку Украіны. "Ніякага "контрнаступу" няма і быць не можа. А калі - вось вынік за тры дні. І самае галоўнае - чацвёрты-пяты дзень цішыня. Аб чым гэта сведчыць? Пацярпелі сур'ёзнае паражэнне, селі і думаюць (Захад), а што рабіць далей", - сказаў кіраўнік дзяржавы.
Навошта амерыканцы ставяць на калені Еўропу і пры чым тут Кітай
Разглядаць сітуацыю ва Украіне асобна ад глабальных геапалітычных працэсаў у свеце нельга. І аб гэтым таксама гаварыў Прэзідэнт Беларусі на сустрэчы з сакратарамі саветаў бяспекі краін АДКБ.
"Захад учапіўся жалезабетонна за Украіну, каб падмяць пад сябе Расію і выцерці аб яе ногі. Але гэтага не будзе. Вы ведаеце расіян, ведаеце нас - на калені мы не станем. Таму трэба дамаўляцца, пакуль гэта магчыма. Далей будзе горш", - папярэдзіў Аляксандр Лукашэнка.
"Начыненне зброяй (гэта мы бачым тут, знаходзячыся ў гэтым катле ў цэнтры Еўропы), нагнятанне абстаноўкі, канфрантацыі і вялікія грошы, якія траціць перш за ўсё Еўропа, - прычына гэтага канфлікту больш глыбокая, чым Украіна, - адзначыў Аляксандр Лукашэнка. - Для амерыканцаў важна паставіць на калені Еўропу. Яны ім пакажуць, што такое ўводзіць еўра супраць долара. Гэта таксама зразумела. І еўра пачало адваёўваць у свой час месца пад сонцам. Гэта амерыканцам не трэба. А фінансы - крывяносная сістэма".
Паводле слоў Прэзідэнта, з-за гэтага ЗША пачалі націскаць на Еўропу і цяпер хочуць расчляніць яе. "Адгарадзіць яе ад нас. Ад Балтыкі да Чорнага мора праз Польшчу, Украіну. З Беларуссю не атрымалася: была задума гэты санітарны кардон выбудаваць ад Смаленска і ніжэй на Балтыку. Але цяпер узбройваюць Польшчу і Украіну. Але трэба, каб Украіна перамагла. Гэта іх залатая мара. Вось задума", - сказаў кіраўнік дзяржавы.
Ён звярнуў увагу, што Польшча сапсавала адносіны не толькі з Беларуссю, але і з Германіяй. І наўрад ці польскі бок выстаўляе рахунак ФРГ за Другую сусветную вайну, таму што такая смелая, заўважыў Аляксандр Лукашэнка. "Ды не. Амерыканцы ціхенька (мы гэта таксама бачылі) ёй падказвалі: давайце душыце немцаў. Таму што ў Еўропе немцы - асноўная сіла. Вы думаеце, брэксіт, калі Вялікабрытанія выйшла з Еўрапейскага саюза, - гэта проста так? Калі б амерыканцы былі зацікаўлены ва ўзмацненні Еўрасаюза, яны ніколі на гэта не далі б дабро і не пайшлі. Але яны адарвалі Вялікабрытанію, магутную ў эканамічных, ды і ў ваенна-палітычных адносінах ад Еўрасаюза яшчэ раней, гэта значыць ім трэба гэты кацёл заварыць, каб панаваць. Яны ж добра разумеюць, што асноўныя кропкі росту ў свеце пасля ЗША - гэта Еўрапейскі саюз, Кітай і наша прастора, дзе мы асмеліліся выступіць", - растлумачыў Прэзідэнт.
"Таму, гаворачы аб прычынах, трэба туды глыбей глядзець. І трэба аддаць належнае расіянам - яны своечасова падхапіліся і сказалі: добра, гэта вашы праблемы, але вы гарантуйце нам бяспеку. І Беларусі ў тым ліку. Адказ на гэту просьбу - гарантый вы бачылі. Цяпер яны гавораць: ды гэта Расія запатрабавала несур'ёзную паперку па бяспецы. І, сустракаючыся з некаторымі вашымі калегамі, я ім задаю пытанне: добра, Расія запатрабавала несур'ёзную паперку, а чаго вы несур'ёзную паперку не далі ёй? Узялі б і далі. Я маю на ўвазе прапановы па бяспецы тут, па савецкай прасторы і перш за ўсё Расіі. Не далі", - нагадаў кіраўнік дзяржавы.
Разам з тым ён прызнаў, што расійская спецаперацыя ва Украіне стала падарункам для Захаду. "І яны тут пачалі чапляцца за яе, каб паставіць на калені нашу прастору. А далей - Кітай. Гэта галоўная іх мэта", - падкрэсліў беларускі лідар.
"І потым: рабочая сіла пасля Афганістана вызвалілася. Яе ж трэба недзе прымяняць. Пакуль самі (амерыканскія войскі. - Заўвага БЕЛТА) туды не ўлезлі, але, калі будзе так прадаўжацца, упэўнены, гэта пытанне часу. Таму што наёмнікаў там мора. Хутка і рэгулярныя войскі з'явяцца, калі мы не спынім гэты канфлікт. Мы да гэтага гатовы", - заявіў Аляксандр Лукашэнка.
"Калі ласка, не сварыцеся адзін з адным". Якім быў галоўны пасыл Лукашэнкі для краін АДКБ
Ні для каго не сакрэт, што ў якасці аднаго з інструментаў націску Захад на чале з ЗША выбраў эканамічныя санкцыі, якія выкарыстоўваюцца імі для дасягнення сваіх мэт нараўне з развязваннем гарачых канфліктаў. На гэта таксама звярнуў увагу ў сваім выступленні кіраўнік беларускай дзяржавы. І зрабіў асаблівы акцэнт на тым, як важна менавіта цяпер не паддацца і захаваць адзінства ў АДКБ.
"Санкцыі ператварыліся ўжо з інструмента прымушэння да міру і бяспекі ў новую комплексную пагрозу глабальнага маштабу. Цэлыя рэгіёны асуджаны на голад, холад і беднасць, - заявіў Аляксандр Лукашэнка. - Яны і вас датычацца, гэтыя санкцыі. Мы ж бачым з расіянамі, як візіцёры-амерыканцы паехалі, пачынаючы ад Арменіі і заканчваючы Таджыкістанам, і пачынаюць на вас націскаць, каб вы не супрацоўнічалі з намі. Мы гэта бачым".
Менавіта таму процідзеянне санкцыям павінна ажыццяўляцца комплексна і сумесна, падкрэсліў Прэзідэнт.
"Ні беларусы, ні расіяне не хочуць, каб вы трапілі пад санкцыі, супрацоўнічаючы з намі. Мы гэтага не хочам, таму што мы ад гэтага нічога не атрымаем, а вы толькі страціце. Але - як толькі магчыма (у жыцці ёсць шмат магчымасцей) - мы павінны глядзець у гэты бок разам. Эканоміка нас да гэтага штурхае. Мы не павінны страціць гэты рынак", - заявіў беларускі лідар.
Аляксандр Лукашэнка звярнуў увагу, што краінам постсавецкай прасторы складана прабіцца на іншыя рынкі. Нават у Афрыцы цяпер няпроста: там ужо сутыкнуліся інтарэсы Кітая, Злучаных Штатаў і Еўрасаюза. "Я не гавару, што не трэба працаваць на рынкі Еўрасаюза, Злучаных Штатаў Амерыкі, Блізкага, Далёкага Усходу, на індыйскі, афрыканскі і іншыя рынкі. Не, трэба працаваць. Але нам нельга страціць сваё. Паколькі ў выніку мы сыдзем і страцім адзін аднаго, - перакананы кіраўнік дзяржавы. - Беражыце эканоміку, не спяшайцеся".
"Калі ласка, не сварыцеся адзін з адным. Нам яшчэ будзе магчымасць пасварыцца са многімі: вы бачыце, як нас спрабуюць расцягнуць. Не буду канкрэтызаваць", - дадаў беларускі лідар.
Не можам мы спакойна глядзець на канфлікты ў АДКБ. Якім Беларусь бачыць рашэнне для Арменіі і Азербайджана
Гаворачы пра неабходнасць захавання адзінства на пляцоўцы АДКБ, Прэзідэнт Беларусі закрануў пытанні ўрэгулявання канфлікту паміж дзвюма краінамі, якія ўваходзяць у гэта аб'яднанне, - Арменіяй і Азербайджанам.
"І азербайджанцы, і армяне - гэта родныя. Як два пальцы на адной руцэ. І што хочаш з гэтым, тое і рабі", - адзначыў Аляксандр Лукашэнка.
Прэзідэнт расказаў, што ў мінулыя гады ён уклаў шмат намаганняў ва ўрэгуляванне канфлікту паміж бакамі, стараючыся наладзіць узаемадзеянне паміж лідарамі Арменіі і Азербайджана.
"Цяпер усё ўскладнілася. Трэба разабрацца ў гэтай сітуацыі. У гэтым выпадку я, вядома, Нікола Ваваевіча (Пашыняна, прэм'ер-міністра Арменіі. - Заўвага БЕЛТА) падтрымліваю, разумеючы, што на гэту ўладу, на яго ўсе гэтыя недахопы наваліліся. Таму (цяпер патрэбны. - Заўвага БЕЛТА) цярпенне і спробы знайсці вырашэнне пытання, каб было выгадна і Арменіі, і Азербайджану", - падкрэсліў кіраўнік дзяржавы.
Паводле яго слоў, свае прапановы павінны ўнесці і сакратары саветаў бяспекі краін АДКБ, бо яны не староннія наглядальнікі ў гэтай сітуацыі. "Вы галоўныя нашы памочнікі па пытаннях абароны і бяспекі", - адзначыў ён.
Беларусь у 2023 годзе старшынствуе ў АДКБ, Аляксандр Лукашэнка заявіў, што краіна будзе імкнуцца дапамагчы Арменіі і Азербайджану ўрэгуляваць спрэчныя пытанні.
Прэзідэнт падкрэсліў, што канфлікты на прасторы АДКБ, тым больш узброеныя, трэба вырашаць. "Не можам мы спакойна глядзець, калі ў нас на прасторы АДКБ канфлікты. Ад іх нельга адыходзіць. Яны складаныя. Гэта нашы браты: мы ў адной дзяржаве жылі. Таму іх трэба вырашаць", - рэзюмаваў кіраўнік дзяржавы.
Пытанні ўрэгулявання канфлікту Арменіі і Азербайджана Аляксандр Лукашэнка паабяцаў абмеркаваць у бліжэйшы час з Прэзідэнтам Расіі Уладзімірам Пуціным. Так стала зразумела, што лідары дзвюх краін маюць намер сустрэцца і, як высветліцца пазней, адбудзецца гэта 9 чэрвеня ў Сочы, дзе гэтымі днямі праходзіла пасяджэнне Савета кіраўнікоў урадаў СНД. "Абмяркуем усе гэтыя пытанні і паспрабуем, можа, нешта прапанаваць вам. Але я яшчэ раз гавару: з вашага боку павінны быць разумныя, талковыя ініцыятывы", - адзначыў Аляксандр Лукашэнка.
Падрыў Кахоўскай ГЭС як элемент інфармацыйна-псіхалагічнай вайны
Кіраўнік дзяржавы звярнуў увагу, што неабароненым элементам сістэмы міжнароднай бяспекі стала інфармацыйная сфера. "Вы бачыце, нават ва Украіне наперадзе ідзе інфармацыйна-псіхалагічная вайна", - сказаў ён.
"Вы, напэўна, здагадваецеся, хто ўзарваў Кахоўскую ГЭС. Кажуць, на злодзеі і шапка гарыць. Хто першы аб гэтым закрычаў? - сказаў кіраўнік дзяржавы. - Зразумела, што ўкраінскаму боку трэба было скрыць тры дні "контрнаступу", дзе амаль дзве сотні бронемашын было знішчана і больш за 2 тыс. чалавек загінулі. Таму - Кахоўка, Кахоўка, а пра тое (страты пры спробе контрнаступлення. - Заўвага БЕЛТА) ніхто не гаворыць. А гэта ж усё відаць".
"І вы бачыце, якую акуратную, асцярожную пазіцыю занялі ЗША, - прадоўжыў Аляксандр Лукашэнка. - Абавязаны аддаць ім належнае. Яны адразу сказалі: "Мы пакуль не можам сказаць, хто гэта зрабіў. Мы павінны разабрацца". Падумайце, з чаго б гэта?"
Прэзідэнт адзначыў важнасць процідзеяння інфармацыйна-псіхалагічным аперацыям і прапанаваў падзяліцца беларускім вопытам у гэтай сферы, заўважыўшы, што па гэтым пытанні ёсць актыўнае ўзаемадзеянне з ФСБ Расіі. "А каб процідзейнічаць, трэба свой парадак дня выстаўляць", - падкрэсліў Аляксандр Лукашэнка.
"Краіны АДКБ непасрэдна знаходзяцца пад прыцэлам гэтага націску і небяспечнай інфармацыйнай зброі, якія ўвесь час ствараюць нам унутры праблемы", - сказаў беларускі лідар.
У сувязі з гэтым ён згадаў пра нядаўнія падзеі ў Кыргызстане, дзе была ўчынена спроба расхістаць абстаноўку ўнутры краіны, але ўлады яе своечасова спынілі. "Малайцы, справіліся. У зародку справіліся, не далі гэтай заразе распаўсюдзіцца. Значыць, вывады зрабілі з гісторыі. Проста малайцы! Я аддаю даніну павагі", - дадаў кіраўнік дзяржавы.
"Бачыце, спрабуюць хістаць, хістаць… Ды адстаньце вы ад Кыргызстана! Яны пачалі паднімацца з кален, няхай развіваецца краіна. Каму яна праблемы стварае? Нікому. Тым не менш хістаюць. А вы думаеце, што Кыргызстан хістаюць проста так? Не. Гэта для таго, каб падабрацца праз Кыргызстан да Казахстана зноў, як праз Расію - да Кітая. Звярніце на гэта ўвагу. Асабліва ў Казахстане - спакойна жыць не дадуць", - папярэдзіў Аляксандр Лукашэнка.
Кіраўнік дзяржавы звярнуў увагу на неабходнасць удасканаліць сістэму крызіснага рэагавання ў АДКБ: "Нам трэба да канца выбудаваць, удасканаліць сістэму крызіснага рэагавання. Па-сапраўднаму выбудаваць. Гэта задача нашых спецслужбаў і праваахоўных органаў".
Кіраўнікі апаратаў саветаў бяспекі дзяржаў - членаў АДКБ, паводле слоў Прэзідэнта, адыгрываюць у гэтым пытанні важную каардынуючую ролю. "Гэта ваша работа, ваша сфера адказнасці, - прадоўжыў ён. - Таму дамаўляйцеся, уносьце прапановы на зацвярджэнне кіраўнікоў дзяржаў. Не думаю, што тут будзе нейкае тармажэнне".
Патрэбна новая стратэгія калектыўнай бяспекі АДКБ да 2035 года. Пара распрацаваць яе канцэпцыю
З улікам маштабнай трансфармацыі пагроз Прэзідэнт прапанаваў ужо цяпер падумаць над канцэпцыяй новай стратэгіі калектыўнай бяспекі арганізацыі на перыяд да 2035 года. Гэта неабходнасць абумоўлена таксама і тым, што існуючы дакумент быў прыняты ў 2016 годзе і разлічаны да 2025 года.
"Думаю, што Камітэту сакратароў саветаў бяспекі і ў цэлым АДКБ неабходна пачаць работу над узгадненнем падыходаў і выпрацоўкай адпаведных прапаноў адносна будучай архітэктуры бяспекі Еўразійскага кантынента. Гэта важнейшае пытанне", - заявіў беларускі лідар.
Прэзідэнт прапанаваў правесці комплексную рэвізію дагаворна-прававой базы АДКБ, як, дарэчы, і Саюзнай дзяржавы, ЕАЭС. "Неабходна паглядзець, што нам трэба, што не трэба. Адкінуць усё тое, што мы там панапрацавалі, панапісалі таго, што не можа і не будзе ніколі працаваць, і пакінуць асноўныя напрамкі. Трэба вярнуцца да асноватворных дакументаў, усё там прапісаць жалезабетонна і дамовіцца , што ў такім выпадку, пры такім характары канфлікту - рэагаванне такое", - прапанаваў беларускі лідар. На яго думку, гэта ў значнай ступені спрасціла б і зрабіла б больш эфектыўным урэгуляванне канфліктаў накшталт тых, што ўзнікаюць паміж Арменіяй і Азербайджанам, Кыргызстанам і Таджыкістанам. "З улікам рэалій трэба ўсё прапісаць. І жалезна дамовіцца", - падкрэсліў Аляксандр Лукашэнка.
На заканчэнне Аляксандр Лукашэнка дадаў, што голас краін АДКБ будзе пачуты, калі яны разам, адзіным фронтам выступяць з міралюбівым і справядлівым парадкам дня ў Еўразійскім рэгіёне і падключаць да гэтага працэсу ШАС і СНД. "Беларусь як старшыня АДКБ гатова прыкласці максімум намаганняў для ўмацавання нашай арганізацыі і калектыўнай бяспекі ў зоне яе адказнасці", - заявіў ён.
Больш таго, Прэзідэнт прапанаваў выкарыстоўваць пры неабходнасці магчымасці беларускага старшынства, "каб данесці да кіраўнікоў дзяржаў і абмеркаваць важнейшыя пытанні бяспекі".
"Народная мудрасць гаворыць: адзін у полі не воін. Толькі адзінства робіць нас мацнейшымі. Я ўпэўнены, што дэвіз нашага старшынства "Праз салідарнасць і супрацоўніцтва да міру і бяспекі" адпавядае інтарэсам усіх нашых дзяржаў", - рэзюмаваў Прэзідэнт.
УПЭЎНЕНЫ РУХ НАПЕРАД. З пытаннямі, але без праблем
Сустрэча прэзідэнтаў Беларусі і Расіі, аб якой Аляксандр Лукашэнка заявіў напярэдадні, адбылася 9 чэрвеня ў Сочы, калі тут праходзілі пасяджэнні Еўразійскага міжурадавага савета і Савета кіраўнікоў урадаў СНД.
Як растлумачыў кіраўнік дзяржавы, сустрэча двух лідараў была запланавана даўно: "Мы яшчэ ў Маскве з вамі дамовіліся, што ў гэты час перасячомся. Якраз прэм'еры нашы будуць працаваць. Усё ж такі беларуска-расійскія адносіны з'яўляюцца стрыжнем у ЕАЭС і на прасторы СНД. Калі раптам будуць пытанні, мы адрэагуем. Вы якраз будзеце сустракацца з прэм'ер-міністрамі. Я лічу, што гэта комплекснае, добрае мерапрыемства, якое мы праводзім. Так, ёсць эканамічныя пытанні (але не праблемы), яны вырашаюцца. Я заўсёды крытыкаваў, як вы кажаце, урады, але тут яны працуюць даволі эфектыўна. Ёсць куды рухацца. Самае галоўнае - мы ведаем, што рабіць і ў якім напрамку рухацца".
"І атрымліваецца. Дзякуй богу, атрымліваецца", - заўважыў Уладзімір Пуцін.
"Мы думалі, будзе горш. Але пакуль крыху лепш, чым мы думалі. І дзякуй богу. І так пакрыху мы адбудуем нашы адносіны. Я публічна ўжо сказаў на сходзе ў нас сакратароў саветаў бяспекі: мы з Расіяй прадумаем план дзеянняў у гэтай сітуацыі. Спадзявацца на тое, што санкцыі адменяць, яшчэ нешта - нам пра гэта нават гаварыць не трэба. Нам трэба арыентавацца на свае сілы і на сябе. І калі мы выпрацуем такі план нашых дзеянняў, нашы партнёры абавязкова падключацца. Я ўпэўнены, Казахстан у рамках ЕАЭС і Узбекістан. І створым прывабныя тут умовы. Я ўпэўнены, што наш саюз будзе толькі мацнейшы", - падкрэсліў Прэзідэнт Беларусі.
З'явіцца план, і мы будзем яго прытрымлівацца. Каб нас праз долар не ставілі пастаянна на калені
Што ж гэта за план дзеянняў, які збіраюцца прадумваць лідары дзвюх краін?
Як растлумачыў Аляксандр Лукашэнка 8 чэрвеня, гэта будзе нейкая праграма дзеянняў, своеасаблівы план унутранага развіцця тэрыторый. "З вопыту Савецкага Саюза вы памятаеце: мы пад прыгнётам былі, ніхто не выказваў нам прыхільнасць, нас спрабавалі ўдушыць. Але мы, у некаторых адносінах замкнёныя ў сваіх граніцах, цудоўна працавалі, былі самадастатковымі. Трэба разумець, што і Беларусь, і Расія - мы павінны гэту прастору адбудаваць, выбудаваць планы, каб мы маглі быць самадастатковымі, каб нас праз долар, яшчэ якую-небудзь валюту не ставілі пастаянна на калені. Нам трэба выпрацаваць план унутранага развіцця нашай прасторы, перш за ўсё Расіі і Беларусі, калі ўжо мы апынуліся ў адной лодцы", - сказаў кіраўнік дзяржавы.
"А так мы ўвесь час нешта робім і аглядваемся то на Усход, то на Захад - як нам жыць далей і ці можам мы жыць без Усходу, без Захаду, - прадоўжыў Прэзідэнт. - Трэба выкарыстоўваць вопыт мінулага, каб у будучым забяспечыць нармальнае жыццё нашай прасторы. Таму што ў нас адзіны эканамічны рынак, ды і на сённяшні дзень адзіная абаронная прастора".
Эканоміка і бяспека. Што абмеркавалі Пуцін і Лукашэнка ў Сочы
Уладзімір Пуцін, гаворачы пра парадак дня сустрэчы з беларускім лідарам, пералічыў эканамічныя пытанні і пытанні забеспячэння бяспекі. Паводле яго слоў, тое, як развіваецца эканамічнае супрацоўніцтва дзвюх краін, не можа не радаваць, а яго тэмпы Прэзідэнт Расіі лічыць "вельмі добрымі".
"Якасць узаемадзеяння, структура нашых эканамічных узаемаадносін мяняюцца ў патрэбны бок. Перш за ўсё ўпор робіцца не толькі на традыцыйную галіну, але і на высокатэхналагічныя сферы. Гэта не можа не радаваць", - падкрэсліў Уладзімір Пуцін.
Гаворачы ў цэлым аб сітуацыі ў сферы бяспекі, Уладзімір Пуцін ахарактарызаваў яе як стабільную. "Я нават сказаў бы, добрая, упэўненая. Мы ўзаемадзейнічаем у гэтай сферы. Па найбольш вострых пытаннях, аб якіх мы з вамі дамаўляліся, усё ідзе ў адпаведнасці з планам: 7-8 ліпеня заканчваецца падрыхтоўка адпаведных збудаванняў, і адразу пачнём мерапрыемствы, звязаныя з размяшчэннем на вашай тэрыторыі адпаведных відаў узбраенняў. Таму ўсё ў адпаведнасці з планам, усё стабільна", - сказаў расійскі лідар.
Віды на мора
Нягледзячы на сур'ёзнасць тэм, якія закранулі прэзідэнты Беларусі і Расіі ў прысутнасці прэсы і тэлекамер, сама сустрэча праходзіла ў нефармальнай абстаноўцы. І на фоне работы шматлікіх фотакамер настойліва прарывалася шчабятанне птушак, паколькі кіраўнікі дзяржаў размаўлялі на маляўнічай адкрытай тэрасе за прыгожа сервіраваным сталом з сезоннымі ягадамі і садавінай. Такіх прыгожых краявідаў, якія адкрываліся адтуль, не знайсці ў сталіцах, дзе Аляксандр Лукашэнка і Уладзімір Пуцін праводзяць асноўную частку рабочага часу, таму яны на імгненне затрымаліся, каб палюбавацца відамі на мора. "Раніцай увогуле штыль", - заўважыў Прэзідэнт Беларусі.
У канцы сустрэчы кіраўнікі дзяржаў паспелі, што называецца, на нагах коратка абмяняцца фразамі пра хуткі пачатак уборкі ўраджаю ў паўднёвых расійскіх рэгіёнах, і развіталіся "Да вечара".
версія для друку
зрабіць стартавай
дабавіць у выбранае