Галоўныя навіны

Рэнтабельнасць, дысцыпліна і новыя тэхналогіі. Вынікі нарады ў Лукашэнкі па развіцці свінагадоўлі

4 верасня, Мінск /Кар. БЕЛТА/. Перспектывы развіцця свінагадоўчай галіны абмеркавалі на нарадзе ў Прэзідэнта Беларусі Аляксандра Лукашэнкі, перадае карэспандэнт БЕЛТА.

У час нарады акцэнт быў зроблены на аналізе сітуацыі ў кожнай вобласці. Губернатары падрабязна далажылі кіраўніку дзяржавы аб стане спраў у свінагадоўчай галіне рэгіёнаў. Прадметна абмяркоўвалася, што трэба рабіць з тымі свінагадоўчымі комплексамі, якія працуюць нерэнтабельна, на базе ўстарэлых тэхналогій. Ці мэтазгодна іх зносіць і будаваць новыя або варта рэканструяваць. Адказ на гэтыя пытанні будуць шукаць усе зацікаўленыя асобы пры падрыхтоўцы спецыяльнай праграмы, якую даручыў распрацаваць кіраўнік дзяржавы.

Асноўны пасыл ад Прэзідэнта - рухацца па шляху стварэння высокатэхналагічных комплексаў, як пры мадэрнізацыі ўжо існуючых, так і пры будаўніцтве новых. Трэба будзе правесці дэталёвы аналіз у разрэзе рэгіёнаў, каб вызначыцца, дзе, колькі і якіх комплексаў трэба ўзвесці або рэканструяваць, якімі будуць дапамога і ўдзел з боку дзяржавы. Па аналогіі з тым, як гэта было зроблена ў краіне з малочнатаварнымі комплексамі.

Асаблівую ўвагу Аляксандр Лукашэнка даручыў удзяляць пытанням рэнтабельнасці як аб'ектаў, якія ўзводзяцца, так і ўжо існуючых. Калі, напрыклад, нейкія асобныя комплексы хранічна стратныя, то не трэба іх штучна падтрымліваць і выцягваць любой цаной.

Захаванне тэхналагічнай і працоўнай дысцыпліны, парадку на свінагадоўчых комплексах з'яўляецца пытаннем дзяржаўнай важнасці. Гэта падкрэсліў Прэзідэнт у пачатку нарады, і сваё патрабаванне няўхільна забяспечыць і адно, і другое паўтарыў і ў час абмеркавання тэмы з удзельнікамі мерапрыемства. Асаблівае значэнне гэта пытанне набывае ў кантэксце біялагічнай абароны комплексаў, у тым ліку ад афрыканскай чумы свіней, якая ў свой час негатыўна паўплывала на свінагадоўчую галіну краіны.

Закраналася і тэма пастаўкі ў Беларусь свініны па імпарце. Падкрэслівалася, што краіна вырабляе дастаткова свініны, каб забяспечыць уласныя патрэбнасці, і дэфіцыту не назіраецца. Пастаўкі гэтай прадукцыі з-за мяжы ажыццяўляюцца пераважна для патрэб мясаперапрацоўчай прамысловасці і з тых краін, дзе гэта прадукцыя выйграе адносна айчыннай па цэнавым фактары.

Старшыня Мінскага аблвыканкама Аляксандр Турчын па выніках нарады расказаў журналістам, што ў цэлым галіна трансфармуецца і рухаецца наперад, паляпшаюцца тэхналагічныя паказчыкі: "Мы ўжо сёння разумеем, што мы можам значна меншым пагалоўем свіней за кошт нармальных прыбаўленняў у вазе атрымаць той аб'ём свініны, які неабходны ў нашай краіне, каб, па-першае, задаволіць патрэбнасці людзей, і другое - забяспечыць свінінай перапрацоўчую галіну".

Адным з галоўных вынікаў нарады губернатар назваў рашэнне аб выпрацоўцы праграмы ў сферы развіцця свінагадоўлі на бліжэйшыя некалькі гадоў. Яе мэта - мадэрнізаваць свінакомплексы для атрымання неабходнага аб'ёму вытворчасці свініны. "Будаўніцтва сучасных свінакомплексаў - гэта не толькі тэхналогія, але і абарона ад пэўных хвароб, існуючых на старых свінакомплексах", - падкрэсліў ён.

Гаворачы аб сітуацыі ў Мінскай вобласці, Аляксандр Турчын адзначыў, што даручэнне Прэзідэнта выйсці на ўзровень вытворчасці свініны 2012 года ў разрэзе рэгіёна выканана і нават перавыканана. Сучасныя свінакомплексы даюць магчымасць не толькі забяспечыць вал, але і дабіцца больш высокіх паказчыкаў эканамічнай эфектыўнасці. "Дзякуй кіраўніку дзяржавы, ён пачуў і падтрымаў. Гэта тэхнічнае пераўзбраенне галіны, будаўніцтва новых свінакомплексаў. Таму што ў нас (у вобласці. - Заўвага БЕЛТА) сем свінакомплексаў, якім ужо больш за 30 гадоў. Па шэрагу прычын тых вынікаў, якія мы павінны мець, каб быць канкурэнтаздольнымі з нашымі краінамі-суседзямі, мы на іх мець не можам", - расказаў кіраўнік Мінскай вобласці.

Ён таксама лічыць важным падлічыць неабходныя аб'ёмы вытворчасці пад поўную патрэбнасць, каб самастойна сябе забяспечваць. "Я з'яўляюся ўпэўненым прыхільнікам, што ўсё ж такі, калі мы гаворым аб харчовай бяспецы, мы павінны дакладна разумець, што трэба разлічваць на ўласныя сілы. Імпарт - гэта ўсё добра, але бываюць часам такія сітуацыі, што ў адзін момант гэты імпарт спыняецца, і мы можам сутыкнуцца з шэрагам сур'ёзных праблем", - сказаў Аляксандр Турчын.

У сваю чаргу старшыня Гродзенскага аблвыканкама Уладзімір Каранік расказаў, што ў рэгіёне вырабляецца больш за чвэрць усёй свініны ў краіне. Дзейнічаюць розныя свінакомплексы, але найбольш аптымальным ён лічыць комплексы на 24 тыс. галоў. "Каб забяспечыць бяспеку, знізіць рызыкі і экалагічную нагрузку, аптымальным бачыцца 24 тыс. галоў. І праектаванне новых комплексаў і рэканструкцыя вядуцца менавіта пад гэту лічбу", - расказаў ён.

"У аснову мы павінны ставіць эканамічную эфектыўнасць. На жаль, на сённяшні момант не ўсе комплексы ў нас працуюць са станоўчым фінансавым вынікам. Так, у цэлым па вобласці станоўчы вынік дасягаецца, прычым ён найбольш высокі ў краіне. Але мы глядзім дэталі. Мы павінны тыя комплексы, якія на сённяшні момант не могуць забяспечыць эканамічна эфектыўную работу, або перапрафіляваць, або рэканструяваць. Або ў гэтым жа раёне, гаспадарцы пабудаваць новы комплекс для таго, каб людзей перавесці ў больш камфортныя і эканамічна эфектыўныя ўмовы работы", - раскрыў сутнасць падыходу да праблемы Уладзімір Каранік.

Ён адзначыў, што Прэзідэнт на нарадзе асабліва акцэнтаваў увагу на неабходнасці дасягнення эканамічнай эфектыўнасці, а не вала, як у савецкія часы.

"Калі браць патрэбнасць Беларусі, то наш АПК іх у поўнай меры задавальняе. Што датычыцца патрэб людзей, патрэбнасці ў свініне прадпрыемствамі краіны задавальняюцца. Але трэба разумець, што мяса - гэта яшчэ і прадукт для нашых перапрацоўчых прадпрыемстваў, якія маюць добры экспартны патэнцыял. Таму частка свініны ідзе на перапрацоўку для вытворчасці прадукцыі, якая пастаўляецца на экспарт, - расказаў губернатар. - І вось тут многія вытворцы ставяць у аснову эканамічную эфектыўнасць. Калі расійская свініна таннейшая, яны яе закупляюць, каб зрабіць таннейшым свае экспартныя пастаўкі. Таму даўно не стаіць пытанне, што ў краіне дэфіцыт свініны і што насельніцтву не хопіць гэтага мяса. Толькі чвэрць вырабленай у Гродзенскай вобласці свініны ідзе на прылаўкі. Астатняе ідзе на перапрацоўку".

версія для друку

зрабіць стартавай

дабавіць у выбранае