Галоўныя навіны

Падпісана кантрактнае пагадненне па будаўніцтву АЭС у Беларусі

11 кастрычніка, Мінск /Ганна Кот - БЕЛТА/. Падпісана кантрактнае пагадненне па будаўніцтву першай АЭС у Беларусі. Аб гэтым карэспандэнту БЕЛТА паведамілі ў прэс-службе ЗАТ "Атамбудэкспарт".

Сёння ЗАТ "Атамбудэкспарт" (Расія), кампанія дзяжкарпарацыі "Расатам", і ДУ "Дырэкцыя будаўніцтва атамнай электрастанцыі" (Беларусь) падпісалі Кантрактнае пагадненне па будаўніцтву энергаблокаў нумар 1 і нумар 2 АЭС на тэрыторыі Беларусі. З боку заказчыка кантрактнае пагадненне падпісаў дырэктар ДУ "Дырэкцыя будаўніцтва атамнай электрастанцыі" Міхаіл Філімонаў, з боку генеральнага падрадчыка будаўніцтва - прэзідэнт ЗАТ "Атамбудэкспарт" Аляксандр Глухаў.

Кантрактнае пагадненне вызначае асноўныя палажэнні генеральнага кантракта на будаўніцтва "пад ключ" двух энергаблокаў АЭС агульнай магутнасцю да 2400 МВт з рэактарнай устаноўкі В-491. Прадугледжана, што беларуская АЭС будзе ўзводзіцца на ўмовах поўнай адказнасці генеральнага падрадчыка.

Для будаўніцтва першай беларускай АЭС выбраны праект "АЭС-2006" ААТ "Санкт-Пецярбургскі Атамэнергапраект". З 2004 года СПбАЭП прымае непасрэдны ўдзел ва ўсіх этапах работ, пачынаючы з выбару пляцоўкі, выбару тэхналогіі і тыпу станцыі, разгляду і абгрунтавання экалагічных аспектаў, завяршаючы распрацоўкай дадаткаў кантракта.

Для размяшчэння станцыі выбрана Астравецкая пляцоўка ў Гродзенскай вобласці. Праект Беларускай АЭС адпавядае патрабаванням дзеючых заканадаўчых і нарматыўных дакументаў у галіне выкарыстання атамнай энергіі Расійскай Федэрацыі з улікам рэкамендацый МАГАТЭ, патрабаванняў EUR. Праект адрозніваецца павышанымі характарыстыкамі ўзроўню ядзернай, радыяцыйнай, тэхнічнай і экалагічнай бяспекі АЭС, а таксама тэхніка-эканамічнымі паказчыкамі.

Як паведамлялася, першы блок беларускай АЭС плануецца ўвесці ў строй ў 2017 годзе, другі блок - у 2018 годзе. Кошт беларускай станцыі складае амаль $9,4 млрд. Для яе будаўніцтва плануецца прыцягнуць расійскі крэдыт. Цяпер працэдура ўзгаднення крэдытнага пагаднення знаходзіцца ў завяршальнай стадыі.

28 лістапада 2008 года ўрад Беларусі звярнуўся ва ўрад Расіі з пасланнем, у якім адзначыў, што беларускія спецыялісты аддаюць перавагу расійскаму праекту АЭС, і прапанаваў пачаць рэалізацыю гэтага праекта. 28 мая 2009 года ў Мінску было падпісана пагадненне паміж урадам Расіі і ўрадам Беларусі аб супрацоўніцтве ў галіне выкарыстання атамнай энергіі ў мірных мэтах. 15 сакавіка 2011 года ў Мінску ў ходзе пасяджэння Савета Міністраў Саюзнай дзяржавы было падпісана міжурадавае пагадненне аб супрацоўніцтве ў будаўніцтве на тэрыторыі Беларусі атамнай электрастанцыі.

ЗАТ "Атамбудэкспарт" - вядучая інжынірынгавая кампанія дзяржкарпарацыі "Расатам" па будаўніцтву аб'ектаў ядзернай энергетыкі за мяжой. Цяпер Атамбудэкспарт з'яўляецца падрадчыкам, які выконвае кантракты па ўзвядзенню, у тым ліку "пад ключ", адначасова пяці атамных энергаблокаў за мяжой і, акрамя таго, адзіным прадпрыемствам гэтага профілю, якое мае рэферэнтныя блокі АЭС новага пакалення (Цяньваньская АЭС у Кітаі).

Праект АЭС-2006 - гэта сучасны праект атамнай электрастанцыі пакалення 3+. Праект распрацаваны Санкт-Пецярбургскім "Атамэнергапраектам". Цяпер на аснове АЭС-2006 ужо будуюцца Ленінградская АЭС-2 і Балтыйская АЭС. У праекце АЭС-2006 прыменены чатыры актыўныя каналы сістэм бяспекі, якія дубліруюць адзін аднаго, устройства лакалізацыі расплаву, сістэма пасіўнага адводу цяпла з-пад абалонкі рэактара і сістэма пасіўнага адводу цяпла ад парагенератараў, сістэма выдалення вадароду, двайная ахоўная абалонка будынка рэактара і іншыя. Ніводная з дзеючых станцый у свеце не аснашчана такой канфігурацыяй сістэм бяспекі.

версія для друку

зрабіць стартавай

дабавіць у выбранае