Галоўныя навіны

Лукашэнка сустрэўся з генеральным дырэктарам АТ "Расійскі экспартны цэнтр" Веранікай Нікішынай

9 кастрычніка, Мінск /Кар. БЕЛТА/. Прэзідэнт Беларусі Аляксандр Лукашэнка сустрэўся з генеральным дырэктарам АТ "Расійскі экспартны цэнтр" Веранікай Нікішынай, перадае карэспандэнт БЕЛТА.

Кіраўнік дзяржавы высока ацаніў ролю экспартнага цэнтра, які рэалізуе адзін з важнейшых напрамкаў у сучасным жыцці, што важна для любой дзяржавы ў свеце.

"Апошнім часам вы назіраеце сітуацыю ва ўзаемаадносінах Беларусі і Расіі. Ваша гэта магутная група кампаній якраз знаходзіцца на скрыжаванні ўсіх гэтых адносін, валодаючы рэсурсамі і пэўнымі рэзервамі. І адміністрацыйным рэсурсам, і фінансавым па падтрымцы адносін паміж Беларуссю і Расіяй", - адзначыў Аляксандр Лукашэнка.

"Таму мне вельмі важна было з вамі сустрэцца, абмеркаваць пытанні. Можа, вы нешта прапануеце. Не можа, а дакладна. У вас вопыт у гэтым плане ёсць. Ну і каб наш галоўны эканаміст у краіне чуў нашы размовы (на сустрэчы таксама прысутнічаў першы віцэ-прэм'ер Мікалай Снапкоў. - Заўвага БЕЛТА) і прыклаў мноства намаганняў па падтрымцы напрамкаў нашага супрацоўніцтва", - падкрэсліў беларускі лідар.

Аляксандр Лукашэнка адзначыў і работу Веранікі Нікішынай на папярэдняй пасадзе ў Еўразійскай эканамічнай камісіі, дзе яна была членам калегіі (міністрам) па гандлі.

"Такая хуткая сустрэча ў нас была. Я гэта памятаю. Калі выбары былі, вызначаліся ў камісію нашу Еўразійскую. Мінула нямала часу. Вы ўжо на новай пасадзе", - сказаў ён.

"Ну і, зразумела, нашаму Белавусаву (першы намеснік старшыні Урада Расійскай Федэрацыі Андрэй Белавусаў, які з'яўляецца мужам Веранікі Нікішынай. - Заўвага БЕЛТА) - самыя добрыя пажаданні, прывітанне. Вельмі часта яго ўспамінаем у размовах. Ён чалавек прыкметны. Таму я вас прашу, перадайце яму самыя добрыя пажаданні. У мяне да яго вельмі добрае стаўленне. Вы гэта ведаеце. Дзякуй, што прыехалі", - рэзюмаваў беларускі лідар.

У сваю чаргу Вераніка Нікішына падзякавала за магчымасць сустрэчы. "Я прадстаўляю групу кампаній Расійскага экспартнага цэнтра. Гэта чатыры арганізацыі, аб'яднаныя ў рамках адзінага холдынга. Дзве арганізацыі прадастаўляюць фінансавыя меры падтрымкі, дзве - нефінансавыя. І, вядома, улічваючы стратэгічную значнасць гандлёва-эканамічнага супрацоўніцтва Расійскай Федэрацыі і Беларусі, для нас Беларусь - гэта ключавая краіна, у якой мы рэалізуем увесь наш арсенал фінансавых і нефінансавых мер у інтарэсах расійскіх, беларускіх кампаній. У канчатковым выніку ў інтарэсах нашых эканомік", - заявіла яна.

У размове з журналістамі Вераніка Нікішына расказала, што на сустрэчы бакі прагаварылі, як максімальна задзейнічаць існуючы патэнцыял і інструменты для стварэння спрыяльных умоў для работы расійскіх і беларускіх кампаній. "У цэлым наша супрацоўніцтва і нашы інструменты сканцэнтраваны на трох напрамках", - адзначыла кіраўнік экспартнага цэнтра.

Першы - непасрэдна падтрымка расійскага несыравіннага неэнергетычнага экспарту ў Беларусь з дапамогай патаннення, зніжэння сабекошту, мер па пошуку партнёраў. За 10 гадоў супрацоўніцтва ў гэтым напрамку ў Беларусь з дапамогай такіх мер падтрымкі было пастаўлена расійскага экспарту на больш як $9 млрд.

Другі напрамак з'явіўся ў цэнтра з мінулага года, калі мандат пашырыўся і на падтрымку імпарту. "Гэта ўжо аказанне дапамогі беларускім кампаніям, якія гатовы прапанаваць камплектуючыя, абсталяванне для расійскіх прадпрыемстваў, што ствараюцца цяпер у мэтах імпартазамяшчэння і маюць экспартны патэнцыял. Некалькі такіх здзелак мы ўжо ажыццявілі за гэты час па падтрымцы беларускага прыярытэтнага імпарту для Расіі. Але мы толькі ў пачатку шляху. І цяпер прагаворвалі тыя новыя праекты, у якіх будзем пашыраць нашы магчымасці", - расказала Вераніка Нікішына.

Трэці напрамак - удзел у вялікіх і важных для Беларусі інвестыцыйных праектах, якія ажыццяўляюцца з дапамогай ільготнага фінансавання. "Мы рады, што шэраг знакавых праектаў з нашым фінансавым удзелам ужо рэалізаваны ў Беларусі, такіх як мадэрнізацыя "Гродна Азот". Але мы цяпер абмяркоўваем 17 новых інвестыцыйных праектаў, цікавых для кааперацыйнага супрацоўніцтва нашых краін, у якіх мы таксама можам быць карыснымі з пункту гледжання прымянення ўсіх нашых рэсурсаў", - дадала гендырэктар Расійскага экспартнага цэнтра.

Акрамя таго, на сустрэчы абмяркоўваўся і шэраг іншых магчымасцей для супрацоўніцтва - ад абмену вопытам і найлепшымі практыкамі да скаардынаваных сумесных дзеянняў па падтрымцы сумеснага экспарту за мяжой. "У нас ужо ёсць такія прыклады, калі нашы страхавыя агенцтвы ажыццяўлялі сумесныя здзелкі па падтрымцы беларускага экспарту на рынках трэціх краін або сумесна вырабленага экспарту. Увесь функцыянал расійскага экспартнага цэнтра мы гатовы перадаваць для выкарыстання нашым беларускім калегам. Гэта таксама адзін з напрамкаў супрацоўніцтва, які мы сёння абмяркоўвалі", - рэзюмавала Вераніка Нікішына.

версія для друку

зрабіць стартавай

дабавіць у выбранае