Галоўныя навіны

Лукашэнка: сёння ёсць усё для перагавораў аб міры ва Украіне

11 красавіка, Масква /Кар. БЕЛТА/. Сёння ёсць усё для перагавораў аб міры ва Украіне. Аб гэтым Прэзідэнт Беларусі Аляксандр Лукашэнка заявіў на сустрэчы з расійскім калегам Уладзімірам Пуціным у Маскве, перадае карэспандэнт БЕЛТА.

"Я абсалютна падтрымліваю пазіцыю цяперашняга расійскага кіраўніцтва і вашу пазіцыю па мірным працэсе ў гэтым канфлікце. Абсалютна падтрымліваю: сёння ёсць усё для таго, каб сесці і дамаўляцца, - упэўнены Аляксандр Лукашэнка. - Не хочуць - зразумела, чаму не хочуць. Калі за акіянам захочуць размаўляць аб міры, то і ва Украіне гэты голас пачуюць".

"Таму ўкраінцы, асабліва насельніцтва, павінны ведаць, што гэта ад нас не залежыць. Мяч, груба кажучы, на баку", - дадаў Прэзідэнт.

Кіраўнік дзяржавы нагадаў, як пачыналіся мірныя перагаворы: тры раўнды прайшлі ў Беларусі, а чацвёрты - у Стамбуле. Абедзве краіны прыйшлі да пэўных дамоўленасцей, склалі праект падагульняючага дакумента, але перагаворы былі сарваны.

"Прыехалі, абарвалі: давай, ваюй да апошняга ўкраінца!" - расказаў Аляксандр Лукашэнка.

"Трэба проста па-чалавечы сябе паводзіць. Дастаць той дакумент, які вы некалі мне паказалі і перадалі, пакласці на стол і рухацца па ім. Гэта разумная пазіцыя. Там прымальная пазіцыя і для Украіны. Яны ж згадзіліся", - адзначыў Прэзідэнт Беларусі.

"Вядома", - пацвердзіў Уладзімір Пуцін.

"Таму ў гэтым выпадку абсалютна падтрымліваю мірны працэс, ад якога Расія ніколі не адмаўлялася і сёння ў тым ліку. Калі мы нейкую ролю ў гэтым можам адыграць, вы ведаеце нашы магчымасці. Мы заўсёды будзем побач і будзем дзейнічаць у адным рэчышчы з вамі ", - запэўніў беларускі лідар.

Аляксандр Лукашэнка адзначыў, што ў свой час некаторыя ў Расіі нават папракалі Уладзіміра Пуціна ў тым, што не наносяцца ўдары па болевых кропках ва Украіне, у прыватнасці па сістэме энергетыкі.

"Вы тады сказалі (можа, не па-ваеннаму): "Слухайце, людзей шкада. У дзіцячых садах, школах. Калі энергетыка ва Украіне абваліцца - пацерпяць дзеці, людзі".

Кіраўнік беларускай дзяржавы таксама выказаў перасцярогу ў адрас украінскага боку. "Гэтыя ўдары (з боку Украіны. - Заўвага БЕЛТА) па адчувальных кропках у Расіі - ну дык і адказ адпаведны. Таму, зноў жа, я думаю, што ва Украіне звар'яцелых шмат людзей, але не ўсе. Я думаю, яны гэта пачулі і ўбачылі: тут будзе адпаведны нейкі адскок у іх у гэтым плане. А ў прынцыпе, яны проста правакуюць Расію на нанясенне такіх удараў", - сказаў Аляксандр Лукашэнка.

Ён заявіў, што не можа ў гэтым плане апраўдаць Украіну. "Ні ў якім разе. Не трэба гэта рабіць і эскалацыю гэту ўзмацняць. Таму што лета праходзіць хутка. Зіма (надыдзе. - Заўвага БЕЛТА). А гэта - небяспечная справа".

"Думаю, Уладзімір Уладзіміравіч, такі момант, што вашы гэтыя ініцыятывы на мірнае ўрэгуляванне канфлікту знойдуць водгук ва Украіне. У ваенных знойдуць, як ні дзіўна. Тут я гатовы з вамі разам стаць плячо ў плячо і працаваць у гэтым напрамку", - падкрэсліў беларускі лідар.

Як паведамлялася, у час перагавораў Уладзімір Пуцін заявіў, што Расія гатова да канструктыўных перагавораў, але ніякага навязвання пазіцый, не заснаваных на рэаліях, быць не можа.

версія для друку

зрабіць стартавай

дабавіць у выбранае