Галоўныя навіны
Лукашэнка сабраў пасяджэнне Савета бяспекі па пытаннях забеспячэння нацыянальнай бяспекі Беларусі
31 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка сабраў пасяджэнне Савета бяспекі, перадае карэспандэнт БЕЛТА.
Для разгляду на мерапрыемстве вынесены шэраг пытанняў, накіраваных на забеспячэнне нацыянальнай бяспекі Беларусі.
"Напружаная абстаноўка ў свеце і непасрэдна каля нашых граніц, санкцыйны націск не даюць нам магчымасці быць абсалютна спакойнымі і ўпэўненымі ў заўтрашнім дні, - сказаў Аляксандр Лукашэнка. - Краіны НАТА настойліва актывізуюць палітыку свайго пашырэння, нарошчваюць ваенную прысутнасць вакол Беларусі, пастаянна праводзяць правакацыйныя вучэнні на нашых граніцах, ды і іншыя дзеянні. Ужо дайшло да парушэння дзяржаўнай граніцы ваеннаслужачымі. Ну гэта мы сёння ўдакладнім".
"Свае дзеянні яны апраўдваюць нейкімі пагрозамі, якія нібыта зыходзяць з тэрыторыі Беларусі. Кіраўніцтва Польшчы і краін Балтыі абвінавачвае Беларусь у нейкіх міфічных агрэсіўных намерах, якіх ніколі не было і быць не можа", - дадаў Аляксандр Лукашэнка. Ён канстатаваў, што кіраўніцтва гэтых краін таксама нагнятае істэрыю наконт прысутнасці на тэрыторыі Беларусі супрацоўнікаў прыватнай ваеннай кампаніі "Вагнер". "Яны дастукаліся да таго, што патрабуюць ужо неадкладнага вывядзення іх з Беларусі. Пры гэтым самі павялічваюць ваенныя бюджэты, сцягваюць да нашых граніц буйныя воінскія фарміраванні, - заўважыў ён. - Адказ просты: ні ў Польшчы, ні ў Літве, ні ў іншых краінах Балтыі не павінна быць ніводнага замежнага ваеннаслужачага. Тады можна і нам прад'яўляць прэтэнзіі наконт прысутнасці тут ваеннаслужачых з іншых краін. А пакуль гэта - неабгрунтаваныя і недарэчныя патрабаванні (нават не просьбы і прапановы, а патрабаванні)".
Да таго ж у красавіку Варшава паведаміла аб рашэнні не выконваць Дагавор аб звычайных узброеных сілах у Еўропе ў адносінах да нашай краіны, які фактычна з'яўляецца апошнім юрыдычна абавязваючым міжнародным актам у сферы кантролю над узбраеннямі. "Гэта ўжо небяспечны крок, і мы заўсёды павінны кіраўніцтва Польшчы аб гэтым папярэджваць - каб потым балюча не было", - сказаў беларускі лідар.
"Як мы павінны на ўсё гэта рэагаваць? Я ўжо не гавару пра падрыхтоўку на іх тэрыторыі нашых збеглых для ажыццяўлення ваеннага перавароту ў Беларусі, - прадоўжыў Прэзідэнт. - Зноў жа хачу папярэдзіць, што ў гэтым плане мы ні з кім цырымоніцца не будзем. Хоць, трэба аддаць належнае, нашы збеглыя, якія знаходзяцца ў Польшчы, Літве і асабліва ва Украіне, разумеюць, для чаго іх там выкарыстоўваюць".
Пры ўсім гэтым Аляксандр Лукашэнка заявіў аб гатоўнасці Беларусі да аднаўлення добрых адносін са сваімі суседзямі, якіх, як вядома, не выбіраюць. "Аднак у адказ на ўсе нашы пасылы ідуць толькі абвінавачанні і пагрозы. Значыць, ніякай нармалізацыі ім не трэба", - звярнуў увагу беларускі лідар.
У пацвярджэнне сказанага, каб выключыць любыя інсінуацыі наконт гэтага, беларускі бок запрасіў прадстаўнікоў Польшчы ў якасці наглядальнікаў на вучэнні АДКБ "Баявое братэрства - 2023", якія пачнуцца 1 верасня ў Брэсцкім рэгіёне.
У гэтым кантэксце кіраўнік дзяржавы прапанаваў разгледзець шэраг напрамкаў, звязаных з пытаннямі забеспячэння нацыянальнай бяспекі.
версія для друку
зрабіць стартавай
дабавіць у выбранае