Галоўныя навіны

Лукашэнка падпісаў закон аб далучэнні Беларусі да 22 міжнародных дагавораў у рамках ШАС

Фота з архiва

13 ліпеня, Мінск /Кар. БЕЛТА/. Кіраўнік дзяржавы Аляксандр Лукашэнка падпісаў закон аб далучэнні Беларусі да міжнародных дагавораў у рамках Шанхайскай арганізацыі супрацоўніцтва. Дакумент размешчаны 13 ліпеня на Нацыянальным прававым інтэрнэт-партале, паведамляе БЕЛТА.

У адпаведнасці з законам Беларусь у рамках працэсу атрымання статусу дзяржавы - члена ШАС далучаецца да 22 міжнародных дагавораў. У іх ліку - Хартыя ШАС, Шанхайская канвенцыя аб барацьбе з тэрарызмам, сепаратызмам і экстрэмізмам, пагадненне аб Рэгіянальнай антытэрарыстычнай структуры, Канвенцыя аб прывілеях і імунітэтах ШАС, пагадненні аб супрацоўніцтве ў барацьбе з незаконным абаротам наркатычных сродкаў, псіхатропных рэчываў і іх прэкурсораў, аб супрацоўніцтве ў галіне выяўлення і перакрыцця каналаў пранікнення асоб, якія маюць дачыненне да тэрарыстычнай, сепаратысцкай і экстрэмісцкай дзейнасці. У пакет дакументаў увайшлі таксама пагадненні аб парадку арганізацыі і правядзення сумесных антытэрарыстычных мерапрыемстваў і вучэнняў, аб правядзенні сумесных ваенных вучэнняў, аб супрацоўніцтве ў галіне забеспячэння міжнароднай інфармацыйнай бяспекі, аб узаемадзеянні пры аказанні дапамогі ў ліквідацыі надзвычайных сітуацый, а таксама канвенцыі ШАС супраць тэрарызму, па процідзеянні экстрэмізму, дагавор аб доўгатэрміновым добрасуседстве, дружбе і супрацоўніцтве дзяржаў - членаў ШАС.

версія для друку

зрабіць стартавай

дабавіць у выбранае