Галоўныя навіны

Ядзерная зброя, страхі Захаду і прароцтвы, якія збыліся. Падрабязнасці інтэрв'ю Лукашэнкі

Прэзідэнт Беларусі Аляксандр Лукашэнка 13 чэрвеня даў інтэрв'ю тэлеканалу "Расія 1". У якасці інтэрв'юера выступіла тэлевядучая Вольга Скабеева, добра вядомая гледачам па ток-шоу "60 мінут".

У адрозненне ад многіх інтэрв'ю за апошні час размова прайшла не ў інтэр'ерах Палаца Незалежнасці, а, як прынята гаварыць у журналісцкіх колах, на нагах і ў незвычайнай абстаноўцы - на адкрытай пляцоўцы аднаго з прадпрыемстваў ваенна-прамысловага комплексу ў Мінскай вобласці. Тэматыка інтэрв'ю адпавядала пляцоўцы - пытанні датычыліся пераважна ваенна-палітычнай сітуацыі, супрацоўніцтва Беларусі і Расіі ў гэтай сферы, паставак узбраення і сумесных дзеянняў у выпадку ўзнікнення пагроз, а таксама канфлікту ва Украіне і спосабаў яго вырашэння.

Прароцкія словы Лукашэнкі, над якімі спачатку хіхікалі ў Расіі

Аляксандр Лукашэнка падкрэсліў, што Беларусь і Расія выконваюць усе дамоўленасці ў ваеннай сферы. "Некалі даўно-даўно (калі мы з Пуціным неяк спрачаліся - газ, нафта, малочныя войны) я сказаў, што не трэба нам адзін супраць аднаго ваяваць. Настане час, калі плячо ў плячо будзем стаяць і адстрэльвацца. Твае калегі, асабліва ў Расіі: "Хі-хі, ха-ха. Як адстрэльвацца?" А сёння? А сёння адстрэльваемся, стоячы плячо ў плячо", - адзначыў Аляксандр Лукашэнка.

Гаворачы аб расійскай спецыяльнай ваеннай аперацыі, Прэзідэнт звярнуў увагу, што кіраўніцтва Расіі, у тым ліку Уладзімір Пуцін, ніколі не прасіла Беларусь далучыцца да баявых дзеянняў. Разам з тым Аляксандр Лукашэнка адразу заявіў: беларусы не дазволяць страляць у спіну расіянам. "Гэта наша роля ў гэтай вайне", - нагадаў ён.

Тэлевядучая Вольга Скабеева ў сваю чаргу заўважыла: "Розныя былі часы. Але ў нас у Расіі ўсе бясконца Вам удзячны. Іншым разам складваецца адчуванне, што Расія адна супраць не проста блока НАТА - 51 дзяржава дапамагае Украіне. І вось ёсць такі брат, сябар, таварыш - гэта, зразумела, дарагога каштуе".

"Тут няма нічога незвычайнага. Мы маем з Расійскай Федэрацыяй дагавор, па якім у нас фактычна адзіная армія. Мы сварыліся, біліся па ўсіх напрамках, але ўзброеныя сілы захавалі адзінства. І ўсё, што прапісана планам (а план не сакрэтны, мы Захаду аб гэтым гаварылі), мы захоўваем і выконваем", - падкрэсліў Прэзідэнт.

Зто закончыць вайну ва Украіне і чаго на самай справе страшна баіцца Захад

Аляксандр Лукашэнка адзначыў, што ўжо ёсць вялікія перадумовы для заканчэння вайны ва Украіне.

"У нас з Польшчай, Латвіяй, Літвой граніца 2,5 тысячы кіламетраў. Яе трэба закрыць. Хто сёння гарантуе, што ў нас няма адтуль пагрозы? Аказваецца, ёсць. Ачумелыя натаўцы праводзяць вучэнні. Нас папракаюць, што мы ядзерную зброю пад нараду НАТА ў Вільнюсе падцягваем, а яны вучэнні праводзяць - дзясяткі тысяч чалавек удзельнічаюць з усяго блока НАТА. Таму той напрамак вельмі небяспечны. Я не прарок, але ва Украіне мы закончым гэту вайну. Да гэтага ўжо вялікія перадумовы. Але далей нам гэтыя ачумелыя з Захаду шмат праблем створаць. І калі толькі яны гэтыя лініі (як любяць гаварыць) пяройдуць, будзе ім вельмі балюча", - папярэдзіў кіраўнік дзяржавы.

У той жа час Аляксандр Лукашэнка заўважыў, што Захад, нягледзячы на свае крокі, на самай справе вельмі баіцца новай маштабнай вайны і звязанай з гэтым ядзернай катастрофы.

Што датычыцца верагоднасці прымянення ядзернай зброі з боку Расіі, то Прэзідэнт лічыць гэта магчымым, калі вораг уварвецца на яе тэрыторыю і гэта агрэсія будзе пагражаць існаванню дзяржавы. "З вугла ж толькі наперад можна выйсці. Вось тады чакайце", - вобразна выказаўся беларускі лідар.

Аляксандр Лукашэнка ўпэўнены, што, пакуль ёсць магчымасць, неабходна дамаўляцца. Аднак Захад, паводле яго слоў, не дазваляе Украіне ісці на перагаворы. "Хоць я ўпэўнены і маю такую інфармацыю, што ва Украіне сёння пераважная большасць людзей хочуць спыніць вайну, у тым ліку ваенныя, - заявіў Прэзідэнт. - Цяпер трэба спыніць вайну, каб людзі не гінулі".

"Контрнаступленне" і наступствы

Кіраўнік дзяржавы таксама звярнуў увагу на першыя вынікі ўкраінскага контрнаступлення: Украіна страціла значную колькасць салдат і бранятэхнікі. "Расія мабілізавалася, яна нарэшце навучылася ваяваць. І па ўсіх правілах ваюе, - заявіў ён. - Атакаваць тых, хто абараняецца, вельмі цяжка. І я думаю, што гэта не атрымаецца".

У нас гэтых сховішчаў для ядзернай зброі - як сабак у вёсцы

Адной з тэм інтэрв'ю стала размяшчэнне расійскай ядзернай зброі ў Беларусі.

Кіраўнік дзяржавы расказаў, што гэта не Расія імкнецца размясціць свае ядзерныя ракеты ў Беларусі, а Беларусь спачатку прасіла аб гэтым, а потым стала патрабаваць вярнуць зброю, якая калісьці тут знаходзілася. Але не стратэгічную (не з Амерыкай жа ваяваць), а тактычную. Адпаведныя дамоўленасці былі дасягнуты і цяпер выконваюцца.

"Як толькі ўсё завязём, яна будзе разгрупавана па Беларусі. У нас жа сховішчаў гэтых, як сабак у вёсцы. Сур'ёзна. У нас іх было шмат. Мы іх ужо пяць-шэсць аднавілі. Будзем больш аднаўляць. І мы разгрупуем. Мы ж не будзем трымаць у адным месцы", - дадаў Прэзідэнт.

Лукашэнка: мы чвэрць стагоддзя стваралі незалежную Беларусь, і я не дазволю аддаць мільёны людзей на разарванне

Аляксандр Лукашэнка таксама расказаў, у якіх выпадках краіна будзе гатова прымяніць ядзерную зброю, і адказаў на існуючае меркаванне, што гэта немагчыма зрабіць без удзелу Расіі.

"Слухайце, калі пачнецца вайна, я чаго, буду глядзець па баках? Не. Зняў трубку, дзе б ён ні быў (Прэзідэнт Расіі. - Заўвага БЕЛТА). Ён патэлефанаваў - я зняў трубку ў любы момант. Нават вось цяпер. Таму што тут за праблема - узгадніць нанясенне нейкага там удару. Гэта не пытанне. Тут спрачацца нават няма чаго. Тут мы ўжо дамовіліся. Няхай ворагі, Оля, дрыжаць", - сказаў кіраўнік дзяржавы.

Аляксандр Лукашэнка адзначыў, што Беларусь - мірная краіна, якая за сваю гісторыю ўжо наваявалася, але ў выпадку чаго без ваганняў адкажа на агрэсію. "У нас дастаткова ўжо цяпер магутнасці для таго, каб адказаць, - заявіў ён. - Многія гавораць: "Ну, Бацька, вы ж ведаеце, ён такі..." Так. Я такі, калі размова ідзе пра мой народ, пра маю дзяржаву. І потым, я ж не дазволю (мы стваралі тут чвэрць стагоддзя, разам з беларускім народам стваралі незалежную дзяржаву) аддаць 10 мільёнаў на разарванне. А расіян колькі тут? Яшчэ мільёны тры пастаянна. Вось 13 мільёнаў, я за іх адказваю. Таму без ваганняў, калі толькі будзе ўчынена супраць нас агрэсія".

"Вылазкі на граніцы - гэта яшчэ не агрэсія? Атака ў Мачулішчах - гэта яшчэ не агрэсія?" - удакладніла журналістка.

"Не, гэта далёка яшчэ не агрэсія. З такімі "мачулішчамі" мы спраўляемся і справімся. І з граніцай таксама. Гэта правакацыі", - адзначыў Аляксандр Лукашэнка. Нават падзеі ў Белгародскай вобласці Расіі, паводле яго слоў, - гэта яшчэ далёка не агрэсія. "Гэта вельмі значная, моцная правакацыя, дзе мы недапрацоўваем, - сказаў ён. - Цяпер пачалі дапрацоўваць. Упрэгліся ў гэту праблему".

Прэзідэнт расказаў, што ў СМІ трапляе мала інфармацыі, але Беларусь і Расія сумесна працуюць у гэтым напрамку, спыняючы розныя пагрозы. Так, нядаўна спецслужбы выявілі і вялі дыверсанта, а потым, каб не ўпусціць, затрымалі яго ў Смаленску.

"Чырвоныя лініі" і акты агрэсіі - класіфікацыя ад Лукашэнкі

У час інтэрв'ю кіраўнік беларускай дзяржавы выказаўся пра свае "чырвоныя лініі".

"Ніколі нельга, гаворачы аб "чырвоных лініях", іх маляваць. Таму што жыццё мяняецца і лініі рухаюцца то наперад, то назад. Яны заўсёды ёсць і ў нас, і ў іх. У расіян і ва ўкраінцаў. Але палітычна лепш не агучваць, якія яны: жыццё гэта мяняе. "Чырвоныя лініі" для мяне - гэта поўнамаштабная агрэсія. З любога боку цяпер, акрамя Расіі, зразумела. А вось Прыбалтыка, Польшча і Украіна..." - адзначыў Аляксандр Лукашэнка.

Кіраўнік дзяржавы ўдакладніў, што ваенныя класіфікуюць акты агрэсіі. "Вось калі яны войскамі пяройдуць граніцу, не гэтымі атрадамі (дыверсійнымі групамі. - Заўвага БЕЛТА), і пачнуць вайну - гэта агрэсія", - растлумачыў Прэзідэнт.

Мірныя перагаворы і роля Мікалая Лукашэнкі

Аляксандр Лукашэнка таксама расказаў, як арганізоўваліся перагаворы паміж дзвюма краінамі. Паводле слоў кіраўніка дзяржавы, немалую ролю ў гэтым адыграў яго малодшы сын Мікалай, які дапамог арганізаваць тэлефонную размову з Уладзімірам Зяленскім. Пасля доўгай размовы Прэзідэнт Украіны ў рэшце рэшт пагадзіўся правесці перагаворы з расійскім бокам на тэрыторыі Беларусі. У выніку яны былі перанесены ў Стамбул, на гэтым настойваў Захад.

"Пуцін мне перадае дакумент, які быў парафіраваны дэлегацыямі, - сказаў Аляксандр Лукашэнка. - Быў нармальны праект,  і ўжо дагаворваліся, што міністэрствы замежных спраў парафіруюць і далей павінны вызначыцца кіраўнікі дзяржаў, падпісваюць і іншае. Добры быў працэс, але яны ад яго адмовіліся".

Кіраўнік дзяржавы расказаў, што Мікалай цяпер вучыцца ў Пекінскім універсітэце, але дагэтуль падштурхоўвае да арганізацыі перагавораў. "Кажу: я разумею, але ты яшчэ не ўсё разумееш", - дадаў Прэзідэнт.

У той жа час ён звярнуў увагу, што Захаду ў гэтым працэсе верыць нельга. Нават Мінскія пагадненні для іх аказаліся ўсяго толькі паўзай, каб за мінулыя гады паспець нарасціць ваенную моц ва Украіне.

"Тут толькі можа быць адно. Калі мы дагаворваемся пра мірны працэс, вайна спыняецца, ніякага руху: ні танкаў, ні ваенных. Як толькі перакінуты, я лічу, што мы павінны прымяняць ядзерную зброю. Толькі так з імі можна размаўляць. З імі нельга весці дыялог і верыць, ашукаюць", - упэўнены Аляксандр Лукашэнка.

"Чалавек не ведае, што робіць". Як Лукашэнка адносіцца да Зяленскага?

Адно з пытанняў кіраўніку дзяржавы датычылася яго стаўлення да персоны Уладзіміра Зяленскага, якога ён назваў "гнідай", расказваючы аб спробе дыверсіі адносна самалёта А-50 на аэрадроме Мачулішчы і затрыманні вінаватых. "Гэта добра, гэта выдатна праведзеная аперацыя. Здзейснена неверагоднае, каб за нейкія 4-5 дзён устанавіць усіх саўдзельнікаў і затрымаць. Знайсці іголку ў стозе сена. Але расслабляцца ні ў якім разе нельга, - падкрэсліў Аляксандр Лукашэнка 7 сакавіка 2023 года. - Выснова адна. Я яшчэ неяк думаў, што Украіне патрэбны мір, што Зяленскі перажывае за свой народ. Прэзідэнт Зяленскі - проста гніда. Проста гніда! Такія аперацыі не праводзяцца без узгаднення з кіраўніком краіны і галоўнакамандуючым. Гэта я вам кажу як Прэзідэнт".

"У мяне няма да яго нейкай азлобленасці, - сказаў Аляксандр Лукашэнка, адказваючы на пытанне Вольгі Скабеевай. - Калі б на яго месцы быў Пуцін, я на яго быў бы злы, таму што чалавек усведамляе, што ён робіць, ён ведае, што такое вайна, ён ваенны чалавек".

"Валодзя Зяленскі - ён не спецыяліст, не прафесіянал, хоць ён за гэты час вырас, ён паспытаў гэтай пасады да СВА, таму ён павінен быў разумець, - прадоўжыў кіраўнік дзяржавы. - Калі ты ў гэты воз упрэгся, дык ты ўжо адказвай". Аляксандр Лукашэнка лічыць, што за час свайго прэзідэнцтва Уладзімір Зяленскі "сёе-тое ўжо засвоіў, таму і спагнанне з яго павінна быць".

Паводле слоў Прэзідэнта Беларусі, Уладзімір Пуцін, калі размова пачынаецца пра Зяленскага, таксама гаворыць пра яго без злосці і, у прынцыпе, без асаблівых эмоцый: "Пуцін абыякава да яго ставіцца, нібыта яго няма. У яго такі ж пункт гледжання па Зяленскім, як у мяне: што гэты чалавек не ведае, што робіць".