Галоўныя навіны

Гран-пры конкурсу маладых выканаўцаў на "Славянскім базары ў Віцебску" заваявала армянка Маша Мнджаян

Маша Мнджаян

17 ліпеня, Віцебск /Кар. БЕЛТА/. Гран-пры ХХХІІ Міжнароднага конкурсу выканаўцаў эстраднай песні "Віцебск" адправіцца ў Арменію. Па выніках двух выступленняў у лідары выйшла Маша Мнджаян, якая ў першы конкурсны дзень знаходзілася толькі на чацвёртай пазіцыі конкурснай табліцы, перадае карэспандэнт БЕЛТА.

Гран-пры пераможцы ўручылі на сцэне Летняга амфітэатра на канцэрце ўрачыстага закрыцця "Славянскага базару ў Віцебску", праграму якога сумясцілі з другім конкурсным днём для маладых выканаўцаў.

Удзельнікі вакальнага спаборніцтва на гэты раз выступілі з сусветным хітом. Як раней адзначалі члены журы, важныя як выбар песні, душэўнасць, так і валоданне голасам. Канкурсанты стараліся максімальна прадэманстраваць свае таленты для музычных суддзяў, здзівіць іх сваім артыстызмам.

Па выніках двух конкурсных канцэртаў у шасцёрцы лідараў апынуліся прадстаўнікі Арменіі, Беларусі, Расіі, Італіі, Узбекістана і Казахстана.

Першую прэмію міжнароднае журы прысудзіла беларусу Саміру Ёлчыеву. Другая дасталася расіянцы Лізавеце Слышкінай і італьянцы Agape. Трэцяе месца падзялілі Куралай Мейрамбек з Казахстана і Маліка Хакімава з Узбекістана.

Армянцы Машы Мнджаян удалося значна палепшыць свае вынікі ў другі конкурсны дзень і набраць 69 балаў з 70 магчымых. У выніку маладая артыстка набрала 135 балаў, якія забяспечылі ёй абсалютную перамогу. "Вельмі рада, што прывязу гэту ўзнагароду ў Арменію. Ведаеце, як будуць радавацца мае армяне, сям'я мая, усе, - падзялілася яна. - Я хацела выканаць штосьці з рэпертуару Уітні Х'юстан, Селін Дыён, але выбрала кантраст, каб максімальна паказаць, што ў мяне ёсць".

Вялікі рывок зрабіў таксама беларус Самір Ёлчыеў, які ў выніку ўступіў прадстаўніцы Арменіі толькі адзін бал. "Сусветны хіт усё вырашыў. Гэта было шыкоўна, мы вельмі стараліся, правялі вялікую работу за паўтара месяца: пачынаючы ад вобразаў, заканчваючы ўсімі пастаноўкамі, - сказаў ён. - Самым галоўным для мяне было дастойна прадставіць сваю краіну. Думаю, у мяне гэта атрымалася. Палавіна Оршы тут была, у амфітэатры, сярод іх і мая маці, і калегі з гарадскога цэнтра культуры. Чалавек, дарэчы, чыя аранжыроўка на другую песню гучала сёння тут. Яе напісаў шыкоўны аранжыроўшчык Юрый Жукаў".

Выканаўца пакуль не агучыў канкрэтна, на што мае намер накіраваць выйграную прэмію. Адназначна частка пойдзе на новыя трэкі. "Я пішу свае песні, хутка пачуеце", - паабяцаў ён.

версія для друку

зрабіць стартавай

дабавіць у выбранае