Галоўныя навіны

"Без гэтага ніякай перамогі не будзе". Лукашэнка аб запатрабаванасці ўласнай вытворчасці боепрыпасаў

13 чэрвеня, Мінская вобласць /Кар. БЕЛТА/. Прэзідэнт Беларусі Аляксандр Лукашэнка ў час наведвання прадпрыемства ваенна-прамысловага комплексу ў Мінскай вобласці заявіў аб запатрабаванасці і своечасовасці наладжвання ўласнай вытворчасці боепрыпасаў, перадае карэспандэнт БЕЛТА.

Кіраўніку дзяржавы было даложана аб запуску ў Беларусі серыйнай вытворчасці самага масавага тыпу боепрыпасаў РС 122 мм.

"Аказваецца, гэта вельмі патрэбна для арміі", - заўважыў беларускі лідар. Таму што важную ролю ў сутыкненнях адыгрывае не толькі высокадакладнае сучаснае ўзбраенне, але і больш простае - аўтаматы, кулямёты, гранатамёты. "Ракеты ракетамі, высокадакладная зброя, самалёты, верталёты, "Леапарды", "Брэдлі", якія знішчаюцца гэтак жа, як і савецкія танкі і БМП (мы гэта ўбачылі нядаўна ў выніку першага этапу контрнаступу)... Добра, што мы далёка не ўлезлі ў дарагія рэчы, якія мы і вырабіць не зможам, а трэба было б закупляць. А вось на зямлі ўсё гэта і плюс аўтаматы, гранатамёты, кулямёты - яны вырашаюць вялікія-вялікія праблемы", - сказаў Прэзідэнт.

Паводле яго слоў, цяпер запатрабаваны і такія віды ўзбраення, як, напрыклад, рэактыўныя сістэмы залпавага агню "Шквал" (мадэрнізаваныя "Грады"). Яны вельмі патрэбны і вырашаюць вялікія праблемы на фронце. Адпаведна неабходны і боепрыпасы да іх.

"Я не гавару, што тое (дарагое высокадакладнае ўзбраенне. - Заўвага БЕЛТА) не патрэбна. Патрэбна. Але без гэтага (уласнага больш простага ўзбраення. - Заўвага БЕЛТА) ніякай перамогі на фронце не будзе", - падкрэсліў Прэзідэнт.

"Тэхніка тэхнікай, але патрэбны боепрыпасы для яе", - рэзюмаваў кіраўнік дзяржавы. Таму па яго даручэнні ў вельмі сціслыя тэрміны была арганізавана ўласная серыйная вытворчасць боепрыпасаў і ў хуткім часе яна павінна разгарнуцца на поўную моц.

"Выйдзем на 10-12 тыс. У нас жа "дыктатура" і, калі жымануць, то і 15 тыс. Дзмітрый Аляксандравіч Пантус збярэ", - заўважыў Аляксандр Лукашэнка.

Асобную ўвагу Прэзідэнт удзяліў умовам захоўвання боепрыпасаў. Ён нагадаў, што па ўсёй краіне з мінулых часоў захавалася шмат сховішчаў для ядзернай зброі. У пачатку свайго прэзідэнцтва Аляксандр Лукашэнка пабываў у адным з такіх сховішчаў, дзе размяшчаліся боепрыпасы да стратэгічных "Таполяў". І тады ў няпростай эканамічнай сітуацыі пад значным знешнім націскам Прэзідэнту давялося прыняць рашэнне аб вывадзе ядзернай зброі з Беларусі. "Так у жыцці склалася, што цяпер даводзіцца вяртаць", - заўважыў кіраўнік дзяржавы.

версія для друку

зрабіць стартавай

дабавіць у выбранае