Галоўныя навіны

29 кастрычніка, Мінск /Кар.БЕЛТА/. Беларусь заняла 63-ю пазіцыю сярод 189 краін у справаздачы Сусветнага банка і Міжнароднай фінансавай карпарацыі "Вядзенне бізнесу-2014: разуменне норм рэгулявання дзейнасці малых і сярэдніх прадпрыемстваў". Сёння сусветны рэйтынг апублікаваны на сайце праекта "Вядзенне бізнесу", паведамляе карэспандэнт БЕЛТА.

У мінулагоднім дакладзе "Вядзенне бізнесу-2013" Беларусь пасля традыцыйнага перагляду рэйтынгу змяніла 58-ю пазіцыю на 64-ю. Улічваючы гэта, у параўнанні з мінулым годам рэспубліка палепшыла свой рэйтынг у справаздачы на адну пазіцыю. Перагляд мінулагодняга рэйтынгу звязаны з абнаўленнем даных, а таксама з увядзеннем у справаздачу некалькіх новых краін.

Эксперты міжнародных арганізацый звярнулі ўвагу на станоўчыя змяненні ва ўмовах вядзення бізнесу, якія правяла краіна за апошні час. Так, Беларусь спрасціла працэдуры па стварэнню прадпрыемства за кошт зніжэння платы за рэгістрацыю і адмены патрабавання наяўнасці часовага банкаўскага рахунку для рэгістрацыі юрыдычнай асобы. Спрошчаны працэдуры падключэння да сістэмы электразабеспячэння за кошт паскоранай выдачы тэхнічных умоў і дазволаў на земляныя работы і скарачэння часу, неабходнага для падключэння да сеткі электразабеспячэння.

Акрамя таго, як адзначаюць эксперты, у Беларусі спрошчана перадача маёмасці шляхам увядзення паскоранай працэдуры рэгістрацыі ўласнасці. Таксама ўдасканалены працэдуры вырашэння неплацежаздольнасці прадпрыемства на аснове новага Закона аб банкруцтве, які, у тым ліку, унёс змяненні ў працэс назначэння антыкрызісных кіраўнікоў і надаў стымулы для продажу актываў у выпадку неплацежаздольнасці прадпрыемства.

Пры гэтым, як адзначае дырэктар аддзела Беларусі, Малдовы і Украіны Сусветнага банка Чымяа Фан, "у нарматыўна-прававой базе, якая датычыцца прадпрымальніцкай дзейнасці і дзейнасці малых і сярэдніх прадпрыемстваў Рэспублікі Беларусь, застаюцца істотныя недахопы".

Першае месца ў сусветным рэйтынгу па ступені спрыяльнасці для вядзення бізнесу займае Сінгапур. За ім у спісе 10 вядучых краін з самымі спрыяльнымі нарматыўна-прававымі базамі для прадпрымальніцкай дзейнасці знаходзяцца Ганконг (Кітай), Новая Зеландыя, ЗША, Данія, Малайзія, Рэспубліка Карэя, Грузія, Нарвегія і Вялікабрытанія.

Акрамя глабальных рэйтынгаў у дакладзе "Вядзенне бізнесу" штогод прадастаўляюцца даныя аб краінах, якія дасягнулі найбольшых вынікаў па індыкатарах даследавання ў параўнанні з папярэднім годам. Пералік з 10 краін, якія лідзіруюць у гэтым годзе па маштабах праведзеных паляпшэнняў, уключае Украіну, Руанду, Расійскую Федэрацыю, Філіпіны, Косава, Джыбуці, Кот-д'Івуар, Бурундзі, былую югаслаўскую Рэспубліку Македонія і Гватэмалу. Пры гэтым пяць краін, якія лідзіруюць па праведзеных паляпшэннях у гэтым годзе - Бурундзі, Кот-д'Івуар, Джыбуці, Філіпіны і Украіна - гэтак жа знаходзяцца ў ніжняй палавіне сусветнага рэйтынгу па ступені спрыяльнасці ўмоў для вядзення прадпрымальніцкай дзейнасці.

У штогадовай серыі дакладаў "Вядзенне бізнесу" аналізуюцца нормы, якія рэгулююць дзейнасць прадпрыемстваў у краіне на працягу ўсяго іх жыццёвага цыкла, уключаючы стварэнне і функцыянаванне прадпрыемства, ажыццяўленне знешнегандлёвай дзейнасці, падаткаабкладанне і вырашэнне неплацежаздольнасці. Сукупны рэйтынг па лёгкасці вядзення бізнесу складаецца на аснове ацэнак па 10 індыкатарах і ўключае 189 краін. "Вядзенне бізнесу-2014" уяўляе сабой адзінаццатую па ліку публікацыю з серыі штогадовых дакладаў.