Гуманітарнае супрацоўніцтва

Каля 10 тон дабрачыннай дапамогі сабралі жанчыны Брэсцкай вобласці для дзяцей Данбаса

19 снежня, Брэст /Кар. БЕЛТА/. У Брэсцкай вобласці прадстаўніцы Беларускага саюза жанчын падключыліся да праекта "Эстафета дабра". Жыхаркі рэгіёна сабралі дабрачынную дапамогу для дзяцей Данбаса, перадае карэспандэнт БЕЛТА.

У цэлым прадстаўніцы БСЖ у Брэсцкай вобласці сабралі каля 10 т дабрачыннага грузу. Адно з прадпрыемстваў Брэста прадаставіла аўтамабіль для транспарціроўкі гуманітарнай дапамогі ў Мінск. Адзенне (у тым ліку цёплыя рэчы), абутак, пасцельную бялізну, прадметы гігіены, дзіцячае харчаванне, салодкія ласункі і цацкі расфасавалі па скрынках, якія валанцёры Брэсцкага дзяржаўнага ўніверсітэта імя А.С.Пушкіна дапамаглі загрузіць у машыну. Па дарозе ў сталіцу аўтамабіль заедзе ў Кобрын, Бярозу і Баранавічы, дзе забярэ астатнюю частку сабранай гуманітарнай дапамогі.

Інфармацыйна-дабрачынны праект "Эстафета дабра" стартаваў у жніўні па ініцыятыве членаў пярвічнай арганізацыі Беларускага саюза жанчын Палаты прадстаўнікоў у супрацоўніцтве з фондам Аляксея Талая. Акцыю падтрымалі ўсе рэгіёны краіны.

Старшыня Брэсцкай абласной арганізацыі Беларускага саюза жанчын Валянціна Пух расказала, што прадстаўніцы вобласці ў мінулым годзе сабралі для дзяцей Данбаса 8,5 т гуманітарнай дапамогі. У гэтым годзе аб'ёмы большыя. "Ніхто не застаўся абыякавым. Жанчыны з пяшчотай і цеплынёй аднесліся да гэтай акцыі. Адпраўляем груз з самым неабходным. Шмат званкоў з пытаннямі, ці можна перадаць прадукты харчавання і салодкія ласункі, бо набліжаюцца святы. Беларусы, ужо шмат гадоў прымаючы ўдзел у акцыі "Нашы дзеці", разумеюць, што без увагі нельга пакінуць ніводнае дзіця. У тым ліку перадаём навагоднія падарункі, каб парадаваць дзетак з Данбаса", - падкрэсліла Валянціна Пух. Таксама прадстаўніцы Брэсцкай вобласці аказалі фінансавую дапамогу, сабраныя грошы пералічылі ў дабрачынны фонд Аляксея Талая.

Сабраную гуманітарную дапамогу адправілі ў Мінск, у фонд Аляксея Талая, пазней яе даставяць у Данбас, дзе яна будзе размеркавана па населеных пунктах.

версія для друку

зрабіць стартавай

дабавіць у выбранае