Прамовы і інтэрв’ю
Змова, здрадніцтва i ўступка Трампа. Важныя заявы Лукашэнкі па сітуацыі ў Венесуэле
Фота Reuters
Прэзідэнт Беларусі Аляксандр Лукашэнка ў Мінску на цырымоніі ўручэння прэмій выказаўся па шэрагу актуальных міжнародных пытанняў. Найбольш гучныя заявы беларускага лідара датычыліся сітуацыі вакол Венесуэлы, і перш за ўсё гвалтоўнага вывазу ў ЗША Прэзідэнта Нікаласа Мадуры і яго жонкі Сіліі Флорэс, а таксама далейшага развіцця сітуацыі. БЕЛТА сабрала разам усе заявы кіраўніка беларускай дзяржавы па гэтай тэме.
Гаворачы пра Венесуэлу, Прэзідэнт падкрэсліў, што дружалюбны народ гэтай краіны ў свой час падставіў Беларусі плячо. "Калі нехта забыў, я - не. І ў некаторай ступені ну, не выратаваў нашу краіну, але моцна падтрымаў. У часы Чавеса (экс-Прэзідэнта Венесуэлы Уга Чавеса. - Заўвага БЕЛТА), калі яны працавалі разам з Нікаласам Мадурам. Я часта бываў там, ведаў аднаго і другога", - адзначыў кіраўнік дзяржавы.
Аб прычынах і наступствах амерыканскай аперацыі
Напярэдадні я сказаў, што калі вы, амерыканцы, хочаце другі В'етнам, вы яго атрымаеце. Як бы там ні складвалася сітуацыя, мне здаецца, яны гэта пачулі. І тое, што яны пагражаюць цяпер Венесуэле нейкай наземнай аперацыяй, я думаю, яны цудоўна разумеюць, што гэта аперацыя скончыцца не на іх карысць. Тысячы загінуць ужо. І амерыканцы. Думаю, ні Дональд, ні іншыя гэтага не хочуць", - сказаў Аляксандр Лукашэнка.
"Але вы павінны дакладна разумець: Амерыка - вельмі складаная краіна. Гэта не так, як у нас, нават у Расіі і іншых краінах. Я думаю, гэта, хутчэй за ўсё, уступка Дональда Трампа ваенным. Памятаеце, як беглі з Афганістана, чапляючыся за шасі самалётаў, падалі на ўзлётна-пасадачнай паласе? Ганьба! Ну трэба ж было паказаць, што на нешта здольны", - заявіў беларускі лідар.
"Але зноў улезлі (ЗША. - Заўвага БЕЛТА) у вельмі непрыемную сітуацыю. Я вас папярэджваў заўсёды аб гэтым: перш чым зрабіць нейкі крок, перш чым нешта зрабіць, трэба падумаць і адказаць на адно пытанне "А што потым?" Што рабіць цяпер? Так, брыдка, агідна - рэакцыя ўсяго свету. Ёсць там некаторыя, якія мякка рэагавалі. Але нездаволенасць і рэакцыя на гэта здарэнне ва ўсіх адмоўная. Усе зробяць з гэтага высновы. Усе разумеюць, што робіцца ў гэтым плане ў свеце. І кожны будзе думаць аб тым, каб абараніць сваю краіну", - сказаў Аляксандр Лукашэнка.
Аб мужным учынку жонкі Мадуры і амерыканскім "правасуддзі"
Прэзідэнт Беларусі падзяліўся інфармацыяй, што Сіліі Флорэс - жонцы Нікаласа Мадуры - амерыканцы першапачаткова прапаноўвалі застацца ў Венесуэле, але яна вырашыла падзяліць лёс каханага.
"Важна, што захапілі Прэзідэнта. Жонцы сказалі: "Ты можаш застацца, мы да цябе не маем прэтэнзій". Яна: "Не, я з ім". Флорэс я ведаю, вельмі мужная жанчына. - "Я са сваім каханым". Даставілі ў Амерыку і ёй наркабізнес прышылі", - расказаў кіраўнік дзяржавы.
"Вось вам і ўсё правасуддзе, якому яны нас усё жыццё вучылі. Наеліся? Ніякай праўды, ніякага правасуддзя ў іх не было, няма і не будзе", - падкрэсліў беларускі лідар.
Аб сапраўдных мэтах ЗША і ўпушчаных магчымасцях
"Я толькі ўдзячны Дональду за тое, што ён адкрыта гаворыць: "Нафта, нам патрэбна нафта!" Я гэта з болем гавару аб тым, што быў у нейкай ступені ўцягнуты ў гэту сітуацыю ў самым пачатку. І амерыканцаў інфармаваў, што венесуэльцы гатовы з вамі супрацоўнічаць. Не трэба ўчыняць гэта глупства, з якога будзе вельмі складана выйсці", - заявіў Аляксандр Лукашэнка.
"Паглядзім яшчэ на правасуддзе. Там суддзі яму (Нікаласу Мадуру. - Заўвага БЕЛТА) трапіліся дастойныя, скажам адкрыта. І адвакаты", - адзначыў Прэзідэнт.
Ён расказаў аб сваім непасрэдным удзеле ў кантактах паміж ЗША і Венесуэлай да падзей з захопам кіраўніка венесуэльскай дзяржавы: "Я перадаў усе меседжы ад Нікаласа Мадуры. Вы бачылі маю сустрэчу з паслом Венесуэлы ў Расійскай Федэрацыі. Гэта яго прыхільнік, паплечнік, заўсёды былі яны разам. Я яго таксама добра ведаю - чалавек ваенны, яшчэ пры Чавесе (працаваў пры былым Прэзідэнце Венесуэлы Уга Чавесе. - Заўвага БЕЛТА)".
"Усё, што хочуць амерыкацы, можна было зрабіць без захопу", - упэўнены беларускі лідар.
"Але трэба было паказаць свой "гераізм". На кім вы вырашылі паказаць? На безабаронным чалавеку? Перабілі ўсіх людзей, якія яго ахоўвалі. Паранілі і жонку, і чалавека захапілі, вывезлі ў Амерыку. Вось "вялікі гераізм". Імперыя, якая траціць больш за трыльён долараў на зброю", - дадаў Прэзідэнт.
Аб змове і здрадніцтве ўнутры самой Венесуэлы
"Я хачу, каб вы разумелі: там было ўсё. І дамоўленасць, і грошы, якія былі аплачаны ў тым ліку людзям у Венесуэле. І ваенным, і грамадзянскім. Там была змова, і там было здрадніцтва. Усё там было", - заявіў беларускі лідар.
"Таму нам трэба быць як мага асцярожней", - зрабіў выснову Аляксандр Лукашэнка.
Аб спектаклі ў выкананні ЗША і расійскім танкеры
Прэзідэнт нагадаў, што, ведучы з амерыканцамі перагаворы, папярэджваў не толькі беларусаў, але і расіян аб тым, што ЗША могуць разыгрываць своеасаблівы спектакль.
"Я ім заўсёды гаварыў, але і свайго старэйшага брата папярэджваў, і напярэдадні гэтага агіднага мерапрыемства (размова пра дзеянні ЗША ў Венесуэлы. - Заўвага БЕЛТА): не было б толькі спектакля з боку амерыканцаў і ўсяго Захаду, не разыгралі б яны нас чарговы раз. І сёння я абсалютна перакананы, што гэта так. Навошта было захопліваць зусім нядаўна пусты расійскі танкер пад сцягам Расіі? Навошта гэта трэба было рабіць, калі вы хочаце міру ва Украіне? І шмат-шмат думак нараджаецца пасля гэтых падзей", - сказаў кіраўнік дзяржавы.
Аб немагчымасці паўтарэння ў Беларусі венесуэльскага варыянта
Аляксандр Лукашэнка прадоўжыў: "Вы памятаеце ў мінулым годзе пасяджэнне Савета бяспекі Беларусі, дзе мы размеркавалі ролі на выпадак "а што, калі не будзе Прэзідэнта". Слухайце, як у ваду глядзелі. Таму варыянт Венесуэлы ў Беларусі нерэальны. Нават калі гэта адбудзецца, у нас усё на гэты выпадак прадугледжана".
"Каб гэтага не здарылася, мы - эліта, грамадства, перш за ўсё ідучы наперадзе, павінны бачыць і ведаць сваё месца. Кожны на сваім месцы павінен зрабіць максімум. Кожны. Якія б у нас ні былі дыктатура і аўтарытарызм, гэта кожнага не прымусіш зрабіць. Таму мы з вамі асуджаны быць наперадзе ў гэтым безразважным, бушуючым свеце. Калі будзем гэта ўсведамляць, у нас з вамі ўсё атрымаецца", - падкрэсліў Прэзідэнт.
Аб удзячнасці беларускім ваенным, якія ахоўваюць рубяжы Радзімы
Прэзідэнт са шкадаваннем канстатаваў, што існуючая ў свеце абстаноўка вымушае траціць значныя сродкі на ўмацаванне абараназдольнасці дзяржавы. "Нас пераканалі яшчэ раз у тым, што мы павінны быць моцнымі. Мы ўсё больш вымушаны траціць грошы на зброю, на падрыхтоўку нашых ваенных".
Аляксандр Лукашэнка прапанаваў падзякаваць беларускім ваеннаслужачым за штодзённую ратную працу па абароне Радзімы. "Мы святкуем з вамі ў адносна цёплым добрым месцы, радуемся. Іх, вядома, справа (ваенных. - Заўвага БЕЛТА), наша справа, людзей у пагонах, - абараняць Радзіму. Але яны сёння на граніцы. Не толькі пагранічнікі. У невялікім тыле ад граніцы сканцэнтраваны, разгрупаваны, як трэба, і абараняюць нашу Радзіму. Давайце ім падзякуем за іх мірную ратную працу", - сказаў кіраўнік дзяржавы.
Зала Палаца Рэспублікі, дзе праходзіла цырымонія ўручэння прэміі, стоячы сустрэла гэтыя словы кіраўніка дзяржавы доўгімі апладысментамі.
версія для друку
зрабіць стартавай
дабавіць у выбранае