15 мая, Мінск /Кар. БЕЛТА/. Выстаўка MILEX-2023 адкрые новыя магчымасці для міжнароднага супрацоўніцтва. Аб гэтым гаворыцца ў афіцыйным звароце міністра абароны Беларусі да ўдзельнікаў ХІ Міжнароднай выстаўкі ўзбраення і ваеннай тэхнікі MILEX-2023, паведамляе БЕЛТА са спасылкай на прэс-службу Міністэрства абароны.
"Міжнародная выстаўка ўзбраення і ваеннай тэхнікі MILEX - гэта ўжо традыцыйны форум прадпрыемстваў, навукова-даследчых інстытутаў, канструктарскіх бюро, гандлёвых кампаній і фірм з дзясяткаў краін свету, якія займаюцца прадукцыяй ваеннага прызначэння. Выстаўка па праву лічыцца ўнікальнай пляцоўкай і садзейнічае павышэнню інавацыйнай і інвестыцыйнай актыўнасці ў галіне стварэння і мадэрнізацыі ўзбраення, ваеннай і спецыяльнай тэхнікі, укаранення перадавых тэхналогій", - лічыць Віктар Хрэнін.
На думку міністра абароны, выстаўка дае магчымасць удзельнікам прадэманстраваць шырокі спектр сваёй дзейнасці, а таксама ўзровень тэхнічнага і тэхналагічнага патэнцыялаў. Традыцыйна ўвазе спецыялістаў будзе прапанаваны шырокі рад узораў прадукцыі ваеннага і двайнога прызначэння. Тэхнічныя характарыстыкі, разнастайныя праграмы мадэрнізацыі ўзбраення і ваеннай тэхнікі адпавядаюць самым сучасным патрабаванням.
"Частка экспануемай наменклатуры прынята ўжо на ўзбраенне ва Узброеных Сілах Рэспублікі Беларусь і шэрага іншых дзяржаў. Упэўнены, што MILEX-2023 прадэманструе найноўшыя дасягненні інжынернай думкі і ўзоры спецыяльных сродкаў і ўзбраенняў, якія выкарыстоўваюцца для забеспячэння бяспекі дзяржавы, адкрые новыя магчымасці для міжнароднага супрацоўніцтва", - перакананы Віктар Хрэнін.