Прамовы і інтэрв’ю
Вынік прамывання мазгоў. Лукашэнка растлумачыў, чаму беларусы вераць у "элітнасць імпарту"
18 снежня, Мінск /Кар. БЕЛТА/. Для беларусаў выбар, які тавар купіць - беларускі ці замежны, гэта пытанне нацыянальнай бяспекі. Аб гэтым Прэзідэнт Беларусі Аляксандр Лукашэнка заявіў 18 снежня, звяртаючыся з Пасланнем да беларускага народа і парламента, перадае карэспандэнт БЕЛТА.
Кіраўнік дзяржавы звярнуў увагу на прыярытэты ва ўдасканаленні спажывецкага рынку.
"Для нас, беларусаў, выбар, які тавар купіць - беларускі ці замежны, гэта пытанне нацыянальнай бяспекі (павінна быць)", - падкрэсліў Аляксандр Лукашэнка.
"Многія ніяк не могуць пераадолець стэрэатып аб элітнасці імпарту. Але гэта не вынік вопыту. Гэта інструмент прамывання мазгоў, калі хочаце, які быў даволі паспяхова прыменены яшчэ ў савецкім грамадстве, асабліва на познім этапе развіцця", - дадаў Прэзідэнт.
Ён падкрэсліў, што якасць тавараў, якія вырабляюцца беларусамі, была і застаецца адной з лепшых у свеце. Аднак ёсць недапрацоўкі з тым, як самі беларусы пазіцыянуюць сябе на ўласным жа рынку, лічыць кіраўнік дзяржавы.
"Можа, недзе Дольчэ Габана ці Версачэ і іншыя больш раскручаны. Можа, нават якасней. Але што, нельга насіць беларускае? "Радзенуць" на вуліцы? Брыдка глядзець?" - задаў рытарычныя пытанні Аляксандр Лукашэнка, і яго словы зала падтрымала апладысментамі. У працяг тэмы Прэзідэнт адзначыў, што многія вельмі заможныя людзі, з якімі яму даводзілася сустракацца, апранаюцца вельмі проста і сціпла, таму што шыкаваць у такім асяроддзі лічыцца ганебным. "А мы быццам бы жывём у небагатай краіне, яшчэ чагосьці - вы пра Беларусь (так. - Заўвага БЕЛТА) гаворыце, і наша насельніцтва. Але паглядзець, на якіх аўтамабілях ездзіць народ, апранаецца ў што, паўстае пытанне: ну навошта вы траціце велізарныя грошы на тое, каб падтрымаць замежнага таваравытворцу? Ну падтрымайце вы сваіх. "Камволь", Аршанскі лён і гэтак далей... Добрыя тканіны, свае тканіны, экалагічна бяспечныя. І гэта датычыцца кожнага. Над гэтым трэба падумаць найперш, чым папракаць уладу ва ўсіх грахах і мяне ў тым ліку", - падкрэсліў кіраўнік дзяржавы.-0-
версія для друку
зрабіць стартавай
дабавіць у выбранае