Прамовы і інтэрв’ю

"Вясной будзе падагульняючы экзамен". Лукашэнка пра добраўпарадкаванне ў Жыровічах

19 верасня, Жыровічы /Кар. БЕЛТА/. Прэзідэнт Беларусі Аляксандр Лукашэнка ў час прыезду ў Жыровічы, дзе размешчаны адзін з буйных праваслаўных цэнтраў - Свята-Успенскі Жыровіцкі манастыр, - звярнуў увагу адказных асоб на недахопы ў пытаннях добраўпарадкавання і навядзення парадку, што даручалася раней, перадае карэспандэнт БЕЛТА.

"Некаторыя элементы, якія акружаюць гэты манастыр, сведчаць аб тым, што тут сёе-тое рабілі на скорую руку зусім нядаўна і па-ваеннаму. Так, каб далажыць па-караеўску (гаворка пра старшыню Гродзенскага аблвыканкама Юрыя Караева, які мае ваеннае мінулае. - Заўвага БЕЛТА). Не ўсё зроблена, абсалютна не ўсё. Запомніце: гэта - жамчужына праваслаўя. Каб тут ніводнага ўчастка не было недагледжанага. Мы для праваслаўных павінны тут зрабіць ідэальнае месца, - падкрэсліў беларускі лідар. - Тут вясной у вас будзе падагульняючы экзамен. Усюды - гэты аграгарадок Жыровічы. Усё навокал павінна быць ідэальна. Менавіта так ставілася пытанне".

Кіраўнік дзяржавы, у прыватнасці, згадаў аб праведзеных работах па меліярацыі вакол Жыровіч. "Вясной мы паглядзім, як ты засееш гэтыя ўчасткі, як ты прывядзеш у парадак тое, на што я звяртаў увагу, - той парк, у выглядзе балота які застаўся", - папярэдзіў ён.

Аляксандр Лукашэнка таксама звярнуў увагу, што не трэба бяздумна тыя ці іншыя работы ўключаць у дзяржпраграмы, а шукаць сродкі з іншых крыніц на тое, што сапраўды неабходна зрабіць.

Як паведамлялася БЕЛТА, пры чарговым візіце ў Жыровіцкі манастыр у чэрвені 2021 года Прэзідэнт даручыў на працягу чатырох гадоў завяршыць добраўпарадкаванне не толькі манастыра і яго тэрыторыі, але і самога аграгарадка. "Жыровічы ў нас аграгарадок. І частка гэтага аграгарадка - манастыр і храм. Трэба прывесці ў ідэальны стан. Гэта павінна быць жамчужына. Я вам абяцаю, што грошы мы поўнасцю пад патрэбнасці выдзелім. Але па-гаспадарску", - сказаў ён тады.

версія для друку

зрабіць стартавай

дабавіць у выбранае