Прамовы і інтэрв’ю

"Усё ўключана". Варановіч назвала санаторна-курортнае лячэнне візітнай карткай Беларусі

Фота з архiва

9 кастрычніка, Мінск /Кар. БЕЛТА/. Санаторна-курортнае лячэнне з'яўляецца своеасаблівай візітнай карткай Беларусі, адзначыла дырэктар Дэпартамента па турызме Міністэрства спорту і турызму Ірына Варановіч у час круглага стала ў БЕЛТА на тэму "Пашырэнне магчымасцей лячэбна-аздараўленчага турызму ў Беларусі, новыя і перспектыўныя напрамкі".

"Мы можам сёння гаварыць, што санаторна-курортнае лячэнне - гэта ўжо своеасаблівая візітная картка Беларусі. Калі мы гаворым, напрыклад, аб летнім сезоне, то бываюць перыяды, калі 100-працэнтная загрузка санаторыяў. І рэклама тут не патрэбна. Турысты, якія прыязджаюць з году ў году, самі гавораць аб тым, што ўзровень даволі высокі, суадносіны цаны і якасці таксама не патрабуюць дадатковай рэкламы", - сказала Ірына Варановіч.

Дырэктар дэпартамента нагадала, што ў Беларусі існуе міжведамасны экспертны савет і створаны рабочыя групы па розных відах турызму. Медыцынскі турызм і санаторна-курортнае лячэнне ў ліку самых папулярных і запатрабаваных напрамкаў.

"Па санаторна-курортным лячэнні рабочая група на працягу года працуе вельмі плённа, праходзяць сустрэчы на ўзроўні кіраўніка рабочай групы ў розных кутках краіны. Праглядаюцца розныя санаторыі, дэманструецца існуючы патэнцыял і тое, што неабходна яшчэ зрабіць. І ў гэтым напрамку сапраўды работа мае свой вынік", - адзначыла яна.

Гаворачы аб турызме, Ірына Варановіч звярнула ўвагу, што беларускія санаторыі можна разглядаць па прынцыпе "ўсё ўключана". Многія турысты, якія праходзяць лячэнне або аднаўленне ў санаторыях, не толькі прымаюць прадугледжаныя праграмай працэдуры. Яны таксама на гэтыя дні выбудоўваюць графік наведвання бліжэйшых культурных адметнасцей, экалагічных сцежак і г.д. У час знаходжання ў санаторыі людзям цікава наведваць яшчэ і саму краіну, заўважыла дырэктар дэпартамента. Да работы падключаюцца экскурсаводы па ўсёй краіне.

"Сёння санаторый успрымаецца не толькі як санаторый, дзе праходзяць трохтыднёвыя праграмы па лячэнні. Ёсць розныя праграмы, якія разлічаны на туры выхаднога дня, аднаўленне, адпачынак. Гэта таксама з'яўляецца нашай візітнай карткай. Самі грамадзяне Беларусі могуць для сябе падабраць той варыянт, які для іх выгадны", - адзначыла дырэктар дэпартамента.

Паводле яе слоў, нягледзячы на ўсе складанасці - мінулую пандэмію, закрыццё граніц і скарачэнне палётных праграм - у Беларусь па-ранейшаму прыязджае значная колькасць замежных грамадзян з еўрапейскіх краін, краін СНД.

версія для друку

зрабіць стартавай

дабавіць у выбранае