Прамовы і інтэрв’ю
У Беларусі плануюць пашырыць вытворчасць новай вакцыны ад раку
Фота з архiва
20 студзеня, Мінск /Кар. БЕЛТА/. У Беларусі плануюць пашырыць вытворчасць новай вакцыны ад раку. Аб гэтым паведаміў карэспандэнту БЕЛТА намеснік дырэктара па навуковай рабоце РНПЦ анкалогіі і медыцынскай радыялогіі імя М.М.Аляксандрава Сяргей Красны на палях выстаўкі "Беларусь інтэлектуальная".
"Мы сёння прадстаўляем на выстаўцы проціпухлінную вакцыну "Еленаген". Гэта сумесная распрацоўка РНПЦ анкалогіі і медыцынскай радыялогіі імя М.М.Аляксандрава з амерыканскай кампаніяй. Завершаны клінічныя выпрабаванні пры хіміярэзістэнтным раку яечнікаў (калі пухліна ўстойлівая да любой хіміятэрапіі). Атрыманы ўнікальныя вынікі, такога нават блізка нідзе ў свеце няма. Пры выкарыстанні вакцыны ў спалучэнні з хіміятэрапіяй узмацняецца дзеянне хіміятэрапіі. Час да прагрэсіравання хваробы павялічваецца ў 2,5 раза, а ў 40 працэнтаў людзей назіраецца доўгі перыяд без прагрэсіравання", - сказаў Сяргей Красны.
Ён адзначыў, што даследаванні праводзяцца ўжо амаль тры гады. "Гэта лякарства будзе зарэгістравана для раку яечнікаў. Цяпер наладжана вытворчасць у Беларусі ў лабараторных умовах - 40 флаконаў у тыдзень. Гэтага мала. Мы плануем у наступным месяцы пачаць маштабіраваць вытворчасць да 1 тыс. флаконаў у тыдзень. Тады хопіць для ўсіх, і можна будзе праводзіць шырокамаштабныя даследаванні пры розных відах пухлін і розных хранічных захворваннях, таму што гэта лякарства таксама ўплывае на хранічнае запаленне", - адзначыў намеснік дырэктара.
На выстаўцы прадстаўлены і іншыя беларускія распрацоўкі ў галіне медыцыны. У прыватнасці, капа для лячэння пацыентаў з храпам і сіндромам абструктыўнага апноэ сна. "Апноэ - часовае спыненне дыхання на працягу ночы ад 10-20 секунд да 2-3 мінут. У цяжкіх выпадках пацыент можа паўночы не спаць. Зразумела, у яго разбіты, дэпрэсіўны стан. Капа дае магчымасць эфектыўна аднавіць сон у пацыента і прадухіліць спыненне дыхання. Літаральна ў мінулым годзе зарэгістравалі гэту распрацоўку, а ў бягучым годзе плануем запускаць яе для прымянення ў клінічную практыку сумесна з нашымі лорамі і стаматолагамі", - праінфармаваў рэктар Беларускага дзяржаўнага медыцынскага ўніверсітэта Сяргей Рубніковіч.
версія для друку
зрабіць стартавай
дабавіць у выбранае