Прамовы і інтэрв’ю
"Такога маштабу знішчэння людзей не ведала ні адна краіна". Швед аб генацыдзе беларускага народа
22 сакавіка, Лагойскі раён /Кар. БЕЛТА/. Генацыд беларускага народа - адна з самых страшных старонак не толькі ў нашай гісторыі, але і ў гісторыі ўсяго чалавецтва. Аб гэтым заявіў генеральны пракурор Андрэй Швед у мемарыяльным комплексе "Хатынь" у час мерапрыемстваў, прысвечаных 82-й гадавіне з дня трагедыі беларускай вёскі, перадае карэспандэнт БЕЛТА.
"Генацыд беларускага народа - адна з самых страшных старонак не толькі ў нашай гісторыі, але і ў гісторыі ўсяго чалавецтва. Мы па выніках расследавання крымінальнай справы аб генацыдзе беларускага народа робім выснову, заснаваную на доказах, што такога маштабу знішчэння людзей не ведала ні адна краіна свету. Больш за 400 лагераў смерці, калі быць дакладным - 587 на сённяшні дзень намі ўстаноўлена, больш за 180 буйных карных аперацый, былі спалены поўнасцю або часткова больш за 12,3 тыс. населеных пунктаў. І гэта сумная лічба, на жаль, па выніках расследавання кожны дзень павялічваецца", - сказаў Андрэй Швед.
Паводле яго слоў, расследаванне крымінальнай справы аб генацыдзе беларускага народа - агульнанацыянальны праект, які закрануў усіх і кожнага. "Не толькі дзяржаўныя органы, але і ўсіх неабыякавых людзей. Таму што вельмі важна, каб да кожнага месца масавага знішчэння людзей не зарастала народная сцежка. Гэта прыярытэт усёй нашай работы, - адзначыў генпракурор. - Што датычыцца ўшанавання памяці ахвяр генацыду, то сёння па ўсёй краіне праводзяцца акцыі і вельмі важна, што да гэтых мерапрыемстваў далучаецца наша моладзь. Толькі калі нашы дзеці і ўнукі будуць расказваць будучым пакаленням аб зверствах фашыстаў і іх памагатых, тады наша з вамі сумесная работа дасць свой плён. І мы будзем лічыць, што дасягнулі выніку. Тое, дзеля чаго мы ўсе з вамі працуем па гэтай страшнай, жудаснай старонцы ў гісторыі нашай Беларусі".
"Сёння адкрываюцца новыя факты злачынстваў. Лёс Хатыні паўтарылі не менш за 288 населеных пунктаў. Калі раней доўгія гады лічылася, што 186 вёсак, то сёння мы ўжо гаворым, што лічба значна большая. І яна, на жаль, будзе павялічвацца", - дадаў Андрэй Швед.
версія для друку
зрабіць стартавай
дабавіць у выбранае