Прамовы і інтэрв’ю

1 жніўня, Смаргонь /Алена Пунтус - БЕЛТА/. Памяць пра падзеі Першай сусветнай вайны не павінна згасаць. Аб гэтым заявіў міністр культуры Беларусі Барыс Святлоў у час урачыстага адкрыцця выстаўкі "Беларусь у гады Першай сусветнай вайны" ў Смаргонскім гісторыка-краязнаўчым музеі, перадае карэспандэнт БЕЛТА.

"Першая сусветная вайна - адна з буйнейшых гуманітарных катастроф, якая ў тым ліку закранула тэрыторыю Беларусі. На жаль, падзеі тых гадоў нагадваюць пра сябе і праз стагоддзі. Многія жыхары Беларусі загінулі, былі вымушаны паехаць за межы краіны, была разбурана гаспадарка і знішчаны помнікі культуры. Усё гэта сведчыць аб тым, што пра тыя падзеі трэба пастаянна напамінаць, каб такое не паўтарылася зноў", - сказаў Барыс Святлоў. Пры гэтым ён дадаў, што ўрад і Мінкультуры ўдзяляюць захаванню гістарычнай памяці аб ваенных падзеях пачатку ХХ стагоддзя павышаную ўвагу.

Выстаўка арганізавана з фондаў Нацыянальнага гістарычнага музея. Свае экспанаты гораду фонд прадаставіў на паўтара месяца. Экспазіцыя ўключае шэсць тэматычных раздзелаў, аб'яднаных агульнай ідэяй. Тут прадстаўлены прадметы салдацкага быту і медыцынскага прызначэння, узоры зброі і абмундзіравання, фатаграфіі і дакументы. Асобны раздзел прысвечаны ўшаноўванню сучаснікамі памяці ахвяр Першай сусветнай.

"Беларусь у гады Першай сусветнай вайны" - маштабны праект, якія на працягу некалькіх гадоў убачаць жыхары буйных гарадоў. У верасні выстаўка пераедзе ў Мінск, а ў канцы года яе чакаюць у Гродне і Гомелі. Экспазіцыя стала адным з мерапрыемстваў, прымеркаваных да 100-годдзя пачатку Першай сусветнай вайны.