Прамовы і інтэрв’ю

Суддзя Канстытуцыйнага Суда: беларускае заканадаўства дапамагае жанчынам спалучаць кар'еру i мацярынства

Алена Сямашка. Фота РУП "Дом прэсы"

10 лютага, Мінск /Кар. БЕЛТА/. Беларускае заканадаўства дапамагае жанчынам спалучаць кар'еру і мацярынства. Аб гэтым заявіла на прэс-канферэнцыі суддзя Канстытуцыйнага Суда Беларусі Алена Сямашка, перадае карэспандэнт БЕЛТА.

"Сучасныя даследаванні антраполагаў і генетыкаў пацвярджаюць адсутнасць прыроджаных адрозненняў у здольнасцях мужчын і жанчын. Існуючыя адрозненні фарміруюцца сацыяльным асяроддзем, дзе важную ролю адыгрывае прававое рэгуляванне. Адзін з важнейшых фактараў, якія на гэта ўплываюць, - заканадаўства, якое ўстанаўлівае тыя ці іншыя прававыя ўмовы для прафесійнага і асобаснага развіцця жанчын і мужчын. На канстытуцыйным узроўні ў Беларусі замацаваны гарантыі роўнасці правоў і магчымасцей пры атрыманні адукацыі, прафесійнай падрыхтоўцы, працоўнай дзейнасці, руху па службе, а таксама ў грамадска-палітычным і культурным жыцці, прадугледжана роўнае ўзнагароджанне за працу роўнай каштоўнасці", - сказала суддзя КС.

Працоўнае заканадаўства ўстанаўлівае дадатковыя сацыяльна-прававыя гарантыі для жанчын - працяглыя водпускі па цяжарнасці і родах, па доглядзе дзіцяці (на працягу трох гадоў), а таксама забараняе прыцягненне жанчын да шэрага цяжкіх работ са шкоднымі ўмовамі працы. Як адзначыла суддзя, гэта абумоўлена неабходнасцю асаблівага клопату дзяржавы аб асобах, якія маюць патрэбу ў павышанай сацыяльна-прававой абароне, да якіх адносяцца і жанчыны.

"Мне здаецца, гэта тыя самыя правілы, якія дапамагаюць нашым беларускім жанчынам - і вучоным, і прадстаўнікам іншых прафесійных сфер - дасягаць таго самага балансу паміж кар'ерай, сям'ёй і мацярынствам", - сказала Алена Сямашка.

версія для друку

зрабіць стартавай

дабавіць у выбранае