Прамовы і інтэрв’ю

Мікалай Снапкоў акцэнтаваў увагу на тым, што лідары Беларусі і Кітая на пастаяннай аснове сустракаюцца, абменьваюцца думкамі па найбольш важных пытаннях беларуска-кітайскага парадку дня, у тым ліку сумеснага будаўніцтва "Аднаго пояса, аднаго шляху", а таксама па міжнароднай праблематыцы. Менавіта дружба і давер паміж кіраўнікамі дзвюх краін шмат у чым садзейнічаюць актыўным двухбаковым кантактам, лічыць ён.

Намеснік кіраўніка Адміністрацыі Прэзідэнта назваў гістарычным дзяржаўны візіт беларускага лідара Аляксандра Лукашэнкі ў Пекін у верасні гэтага года, калі па выніках перагавораў са старшынёй КНР Сі Цзіньпінам было прынята рашэнне аб новым узроўні адносін паміж дзвюма краінамі - давернага ўсебаковага стратэгічнага партнёрства і ўзаемавыгаднага супрацоўніцтва. Такі беспрэцэдэнтна высокі ўзровень КНР падтрымлівае ўсяго з чатырма дзяржавамі свету, у ліку якіх цяпер і Беларусь.

Акрамя таго, Мікалай Снапкоў выказаў думку, што гэты візіт Прэзідэнта Беларусі неабходна разглядаць ва ўвязцы з дзяржаўным візітам у Мінск Сі Цзіньпіна ў маі мінулага года, калі былі таксама прыняты вельмі важныя для двухбаковых адносін рашэнні. Менавіта тады старшыня КНР назваў праект стварэння Кітайска-беларускага індустрыяльнага парка "Вялікі камень" жамчужынай Эканамічнага пояса Шаўковага шляху.

Намеснік кіраўніка Адміністрацыі Прэзідэнта Беларусі адказаў на пытанні кітайскіх СМІ, што датычацца як цяперашняга стану двухбаковага супрацоўніцтва, так і перспектыў. Размова ішла таксама аб стратэгічнай ролі Беларусі на новым Шаўковым шляху і магчымасцях, што адкрываюцца з рэалізацыяй гэтай канцэпцыі.

Акрамя таго, замежныя рэпарцёры сустрэліся з прадстаўнікамі Кітайска-беларускага індустрыяльнага парка "Вялікі камень", а таксама кітайскіх кампаній, якія працуюць у Мінску.