Прамовы і інтэрв’ю

Сергяенка - старшыні ПАРЛАЦІНА: візіт у Беларусь дасць магчымасць пераканацца ў адкрытасці i міралюбнасці нашай краіны

23 красавіка, Мінск /Кар. БЕЛТА/. Дэлегацыя Парламента краін Лацінскай Амерыкі і Карыбскага басейна ў час візіту ў Беларусь зможа пераканацца ў адкрытасці, дружалюбнасці, міралюбівасці рэспублікі, адзначыў старшыня Палаты прадстаўнікоў Нацыянальнага сходу Беларусі Ігар Сергяенка на сустрэчы са старшынёй ПАРЛАЦІНА Раланда Гансалесам Патрысіа, перадае карэспандэнт БЕЛТА.

"У вас будзе выдатная магчымасць за гэтыя два дні пераканацца ў нашай адкрытасці, нашай дружалюбнасці, нашых агульных падыходах да захавання міру на зямлі", - сказаў Ігар Сергяенка.

Ён падкрэсліў, што Беларусь - адкрытая краіна, якая праводзіць міралюбівую палітыку, падтрымлівае адносіны з тымі, хто таксама выступае за мір. Наладжаны кантакты на розных міжнародных пляцоўках.

"З 2016 года мы з'яўляемся наглядальнікамі ў вашай аўтарытэтнай арганізацыі, за гэта ўдзячны вам. Прымаем удзел у мерапрыемствах, перыядычна праходзяць сустрэчы. Арганізавана работа ў рамках двухбаковых кантактаў з парламентамі краін Лацінскай Амерыкі", - адзначыў спікер Палаты прадстаўнікоў.

Беларусь падтрымлівае адносіны практычна з усімі краінамі Лацінскай Амерыкі, бакі могуць весці размову аб развіцці эканамічных кантактаў, супрацоўніцтва ў сферы прамысловасці, транспарту, сельскай гаспадаркі.

"Я думаю, вопыт Беларусі будзе запатрабаваны для многіх краін Лацінскай Амерыкі, - прадоўжыў спікер. - Будзе цікавы вопыт нашай краіны ў развіцці навукі, сістэмы адукацыі, аховы здароўя, па самых розных аспектах дзейнасці. Мы як парламентарыі таксама можам супрацоўнічаць і ў форме народнай дыпламатыі".

Старшыня Палаты прадстаўнікоў адзначыў, што ў Беларусі з трывогай глядзяць на тое, што адбываецца ў асобных краінах Лацінскай Амерыкі ва ўмовах знешняга дыктату, і звярнуў увагу, тым не менш, на развіццё гэтых дзяржаў. "Мы салідарны з вашымі парламентарыямі, жыхарамі вашых краін, выказваем падтрымку", - падкрэсліў Ігар Сергяенка.

Спікер выказаў упэўненасць, што ў дэлегацыі ПАРЛАЦІНА пасля наведвання Беларусі застануцца прыемныя ўражанні, добрыя кантакты і дружалюбныя сувязі.

Раланда Гансалес Патрысіа падзякаваў беларускаму боку за накіраванае запрашэнне і магчымасць наведаць Беларусь. Адзначыў адчутую ўжо гасціннасць.

Паводле яго слоў, геаграфічна далёкая адлегласць не перашкаджае мець падобныя погляды і трывалыя ўзаемаадносіны. Ён падкрэсліў, што паважае пазіцыю Беларусі ў свеце.

"Мы жывём не толькі ў час турбулентнасці ў палітычнай, кліматычнай, эканамічнай сферах. Мы жывём у агульным крызісе. Такім чынам, міжпарламенцкія сувязі, якія існуюць у тым ліку паміж Беларуссю і краінамі Лацінскай Амерыкі і Карыбскага басейна, павінны садзейнічаць вырашэнню розных цяжкасцей і ўмацаванню нашага супрацоўніцтва для дасягнення агульных мэт", - сказаў старшыня ПАРЛАЦІНА.

версія для друку

зрабіць стартавай

дабавіць у выбранае