Прамовы і інтэрв’ю
Сергяенка: фальсіфікацыя гісторыі - сур'ёзная пагроза нацыянальнай бяспецы
8 верасня, Магілёўскі раён /Кар. БЕЛТА/. Фальсіфікацыя гісторыі - сур'ёзная пагроза нацыянальнай бяспецы. Аб гэтым заявіў першы намеснік старшыні Парламенцкага сходу Саюза Беларусі і Расіі, старшыня Палаты прадстаўнікоў Нацыянальнага сходу Беларусі Ігар Сергяенка ў час пленарнага пасяджэння маладзёжнага форуму Саюзнай дзяржавы "Роля моладзі ў захаванні і абароне гістарычнай памяці" ў Музеі Славы Магілёўшчыны, перадае карэспандэнт БЕЛТА.
Ігар Сергяенка адзначыў, што сёння неабходна аб'яднаць намаганні для недапушчэння рэабілітацыі нацызму. "Фальсіфікацыя гісторыі як кампанент інфармацыйнай вайны - сур'ёзная пагроза нацыянальнай бяспецы. Мы бачым, як, выкарыстоўваючы самыя сучасныя тэхналогіі, нам спрабуюць навязаць абыякавасць да подзвігаў нашых продкаў, пачуццё віны, непаўнацэннасці ў адносінах да Захаду, тым самым распальваючы нацыяналізм, нянавісць да іншых народаў і русафобію, - падкрэсліў ён. - Для гэтага на Захадзе Савецкі Саюз абвінавачваюць у развязванні Другой сусветнай вайны, а ўсім, хто мае традыцыйныя гістарычныя і сямейныя погляды на Перамогу ў Еўропе, забараняюць свяшчэннае для іх свята. І справа ўжо даходзіць да прыцягнення да крымінальнай адказнасці за святкаванне Дня Перамогі ў тых жа краінах Балтыі”.
У суседніх краінах апаганьваюць абеліскі, зносяць помнікі савецкім салдатам, героям-антыфашыстам, - усё гэта робіцца не проста так. "Каб знішчыць памяць, зламаць пераможны дух, веру, унутраны стрыжань і з дапамогай маніпулявання гістарычным мінулым уплываць на грамадскую свядомасць. Палітыкі тых краін, Польшчы і краін Балтыі забылі, што амаль мільён савецкіх салдат і афіцэраў аддалі свае жыцці, каб знішчыць фашызм на іх тэрыторыях", - сказаў старшыня Палаты прадстаўнікоў.
У процівагу ўсяму гэтаму - аснова каштоўнасцей, на якіх грунтуецца Саюзная дзяржава. "Братэрства, адзінства, з'яднанасць, імкненне самастойна вызначаць свой лёс. І ў гэтым сіла і праўда беларусаў і расіян, якія немагчыма перамагчы зброяй, немагчыма перамагчы нічым, - падкрэсліў Ігар Сергяенка. - Таму вельмі важна з дапамогай такіх маштабных форумаў адстойваць агульную гістарычную праўду. Гэта работа знаходзіцца пад самай пільнай увагай парламентарыяў".
Свяшчэнны абавязак цяперашніх пакаленняў - памятаць і ганарыцца подзвігамі дзядоў і прадзедаў, якія сталі на абарону Айчыны. "Мужнасцю і стойкасцю перамаглі варожую ваенную машыну, паклаўшы на алтар Вялікай Перамогі сваё жыццё, здароўе, маладосць і заслужыўшы ўдзячнасць нашчадкаў на стагоддзі, - адзначыў першы намеснік старшыні Парламенцкага сходу. - Іх подзвіг павінен быць часткай кожнай сямейнай гісторыі, што дапаможа ўмацаваць сувязь паміж пакаленнямі, усвядоміць цану свабоды і забяспечыць мір".
Ігар Сергяенка выказаў упэўненасць, што такія форумы стануць сур'ёзным укладам у агульную справу адстойвання гістарычнай праўды, захавання традыцыйных каштоўнасцей і маральных ідэалаў. "Ён (маладзёжны форум Саюзнай дзяржавы. - Заўвага БЕЛТА) стане магутным ідэйна-патрыятычным фундаментам, важкай пляцоўкай для прафесійнага развіцця ўдзельнікаў, абмену ведамі і ідэямі на прасторы ўсёй Саюзнай дзяржавы, - рэзюмаваў ён. - Лічу, што можна разгледзець пытанне аб яго правядзенні на пастаяннай аснове".-0-
версія для друку
зрабіць стартавай
дабавіць у выбранае