Прамовы і інтэрв’ю

Сергяенка: дзяржаўныя сімвалы - неад'емная частка суверэнітэту Беларусі

Ігар Сергяенка

10 мая, Мінск /Кар. БЕЛТА/. Дзяржаўныя сімвалы - неад'емная частка суверэнітэту Беларусі. Аб гэтым на цырымоніі ўшанавання дзяржаўных сімвалаў на плошчы Дзяржаўнага сцяга ў Мінску сказаў журналістам старшыня Палаты прадстаўнікоў Ігар Сергяенка, паведамляе БЕЛТА.

Ігар Сергяенка звярнуў увагу на той факт, што для Беларусі, як і для ўсіх краін, дзяржаўныя сімвалы маюць вялікае значэнне: "Яны грунтуюцца на гістарычнай памяці, з'яўляюцца неад'емнай часткай незалежнасці і суверэнітэту нашай краіны".

Спікер Палаты прадстаўнікоў адзначыў, што такія мерапрыемствы, як урачысты рытуал ушаноўвання сімвалаў, якія сёння прайшлі ў Мінску і ва ўсіх абласных цэнтрах Беларусі, дапамагаюць выхоўваць у падрастаючага пакалення паважлівыя адносіны да атрыбутаў дзяржаўнасці.

Па просьбе журналістаў Ігар Сергяенка таксама пракаменціраваў нядаўнюю навіну аб тым, што Міжнародны алімпійскі камітэт дазволіў беларускім спартсменам выступаць пад дзяржаўнай сімволікай. "Выступаць пад сваім сцягам для спартсмена вялікі гонар. Тым больш калі ты падымаешся на п'едэстал, займаеш прызавое месца і гучыць гімн краіны, якую ты прадстаўляеш, - гэта вельмі хвалююча", - адзначыў ён.

Старшыня Палаты прадстаўнікоў падкрэсліў, што не толькі для спартсменаў, а для ўсіх, хто прадстаўляе краіну на міжнароднай арэне, дэманстрацыя дзяржаўных сімвалаў - асаблівы момант. "Нават па сабе скажу: выступаючы ў Панафрыканскім парламенце (дзе прысутнічалі прадстаўнікі 55 афрыканскіх дзяржаў) некалькі гадоў таму, у час прывітання нашай дэлегацыі загучаў наш гімн, усе ўсталі. Гэта прыемна да мурашак", - дадаў Ігар Сергяенка.

версія для друку

зрабіць стартавай

дабавіць у выбранае