13 ліпеня, Мінск /Кар. БЕЛТА/. Нямецкі бізнес праяўляе інтарэс да Кітайска-беларускага індустрыяльнага парка "Вялікі камень". Аб гэтым паведаміў сёння журналістам пасол Беларусі ў ФРГ Дзяніс Сідарэнка перад сустрэчай кіраўнікоў загранустаноў Беларусі з прадстаўнікамі айчынных прадпрыемстваў БелГПП, перадае карэспандэнт БЕЛТА.
"У нямецкага бізнесу па-ранейшаму ёсць глыбокая зацікаўленасць у развіцці супрацоўніцтва на Усходзе - Расія, Кітай. І мы з гэтага пункту гледжання цяпер трапілі ў іх фокус увагі, у тым ліку ў рамках ініцыятывы "Адзін пояс і адзін шлях", - адзначыў Дзяніс Сідарэнка.
У маі-чэрвені гэтага года Беларусь наведала дэлегацыя з 25 нямецкіх прадпрымальнікаў, якія вывучалі магчымасці індустрыяльнага парка "Вялікі камень", Нацыянальнага аэрапорта Мінск. "Я не выключаю, што ў бліжэйшы час будуць зрухі, у тым ліку прыход нямецкага бізнесу ў той ці іншай форме. Зацікаўленасць такая прысутнічае, і гэты інтарэс выказваецца ў тым ліку на форумах у Германіі, дзе мы ствараем магчымасці для прэзентацыі "Вялікага каменя", - дадаў пасол.