Прамовы і інтэрв’ю

19 снежня, Мінск /Кар. БЕЛТА/. Выбудаваная Беларуссю структура дасягнення МУР уражвае. Аб гэтым заявіў 19 снежня журналістам пастаянны каардынатар ААН/ПРААН у Беларусі Санака Самарасінха, перадае карэспандэнт БЕЛТА.

Санака Самарасінха адзначыў, што "ў міжнароднай супольнасці ўражаны тым, як у Беларусі наладжана сістэма дасягнення МУР". Яна ахоплівае ўсіх удзельнікаў працэсу і гарантуе дасягненне мэт. У Беларусі гэтым займаюцца не толькі на нацыянальным узроўні, але і ў рэгіёнах, дзе таксама створаны адпаведныя структуры.

Пастаянны каардынатар ААН перакананы, што ніводная краіна свету не здольна дасягнуць Мэт устойлівага развіцця паасобку. "ААН будзе садзейнічаць дыялогу паміж Беларуссю і міжнароднымі партнёрамі. Таксама лічым важным, каб краіна развівала партнёрства ўнутры краіны з арганізацыямі грамадзянскай супольнасці, прыватным сектарам і парламентам", - сказаў ён.

Санака Самарасінха звярнуў увагу, што Беларусь выканала практычна ўсе Мэты развіцця тысячагоддзя. Цяпер Беларусь уступае на гістарычны шлях дасягнення МУР. Так, у краіне заснавана пасада Нацыянальнага каардынатара па дасягненні Мэт устойлівага развіцця, за дзейнасцю па дасягненні кожнай з 17 МУР замацаваны адказныя дзяржаўныя органы. Створаны Савет па ўстойлівым развіцці, які працуе па асноўных напрамках рэалізацыі мэт, у тым ліку па эканамічным, сацыяльным і экалагічным.

На адкрытых парламенцкіх слуханнях на тэму "Партнёрства галін улады як неабходная ўмова паспяховага дасягнення Мэт устойлівага развіцця", якія прайшлі ў Савеце Рэспублікі, Санака Самарасінха прадставіў падыходы ААН да ролі парламента ў дасягненні МУР і забеспячэнні таго, каб ніхто не застаўся ўбаку ад вырашэння гэтых задач.

У парламенцкіх слуханнях у Савеце Рэспублікі прымаюць удзел члены Савета Рэспублікі, дэпутаты Палаты прадстаўнікоў, кіраўнікі рэспубліканскіх органаў дзяржаўнага кіравання, члены Савета па ўстойлівым развіцці, прадстаўнікі дыпламатычнага корпуса, грамадскіх арганізацый. Ключавой тэмай сталі пытанні рэалізацыі МУР у эканамічнай, экалагічнай і сацыяльнай сферах Беларусі, у тым ліку за кошт механізмаў дзяржаўна-прыватнага партнёрства.

Парадак дня ў галіне ўстойлівага развіцця на перыяд да 2030 года дзяржавы - члены ААН прынялі 25 верасня 2015 года. Ён змяшчае спіс з 17 мэт, накіраваных на ліквідацыю беднасці, барацьбу з няроўнасцю і несправядлівасцю, а таксама на вырашэнне праблем, звязаных са змяненнем клімату.