Прамовы і інтэрв’ю

19 кастрычніка, Мінск /Аліна Грышкевіч - БЕЛТА/. Міралюбівыя прынцыпы ААН за 70 гадоў яе існавання засталіся нязменнымі. Гэта адзначыў рэзідэнт - каардынатар ААН/прадстаўнік ПРААН у Беларусі Санака Самарасінха на ўрачыстай цырымоніі адкрыцця ў музеі "Лошыцкая сядзіба" мемарыяльнай дошкі, прысвечанай функцыянаванню ў Беларусі гуманітарнай місіі ААН - Адміністрацыі дапамогі і аднаўлення Аб'яднаных Нацый (ААН-ЮНРРА), перадае карэспандэнт БЕЛТА.

Санака Самарасінха выказаў сваё захапленне прыгажосцю Мінска і ўсёй Беларусі. Разам з тым ён падкрэсліў, што Мінск не заўсёды быў такім. Пасля Другой сусветнай вайны беларуская сталіца была ў руінах, а людзі змагаліся за выжыванне. "Спадзяюся, што ў будучым гэта ніколі не паўторыцца", - заўважыў Санака Самарасінха.

Беларусы выбудоўвалі нанава сваё жыццё. І ў гэтым ім дапамагалі прадстаўнікі іншых краін з гуманітарнай місіі ААН. "І сёння мы святкуем гэты дзень, які быў азнаменаваны як першая прысутнасць ААН у Беларусі", - сказаў ён.

Адміністрацыя дапамогі і аднаўлення Аб'яднаных Нацый працавала ў 1946-1947 гадах. "Гэта было прадстаўніцтва ААН, аднак можна сказаць, што менавіта дзякуючы ЗША, шчодрасці амерыканскага народа, які выдзеліў падтрымку ў памеры $60 млн для аднаўлення Беларусі, вельмі многае ўдалося тады зрабіць. Гэта была канкрэтная дапамога - прадукты харчавання, адзенне, насенне для сельскай гаспадаркі. Тады тут працавалі 15 чалавек з розных дзяржаў, якія і ажыццяўлялі гэту гуманітарную місію", - падкрэсліў Санака Самарасінха.

Праз 70 гадоў пасля ўтварэння ААН тут кіруюцца тымі ж прынцыпамі гуманнасці, міралюбівасці і ўзаемадапамогі. Дзякуючы ўзаемаразуменню і сродкам, якія выдзяляюць краіны-ўдзельніцы, удаецца дапамагаць многім дзяржавам ва ўсім свеце, каб яны пазбеглі крызісу. "Свет стаіць перад чарговым крызісам. Так, нам удаецца прадухіліць трэцюю сусветную вайну, - адзначыў прадстаўнік ПРААН. - Аднак сёння ў свеце каля 60 млн бежанцаў, якія ў сувязі з крызісам вымушаны пакідаць свае дамы, і мы павінны гэта спыніць". Санака Самарасінха таксама расказаў, што цяпер ААН забяспечвае прадуктамі харчавання больш як 90 млн чалавек з розных краін. "Дзякуючы нашым намаганням штогод захоўваецца каля 3 млн жыццяў дзяцей. Аднак калі б усе астатнія бакі прыкладалі такія намаганні, гэтых жыццяў удалося б захаваць значна больш", - сказаў ён.

Санака Самарасінха ўпэўнены, што прынятыя ААН Мэты ўстойлівага развіцця прызначаны забяспечыць лепшую будучыню для дзяцей розных краін.

Ён таксама паведаміў, што запусцяць экспрэс-поезд ААН, які прысвечаны Мэтам устойлівага развіцця і 70-годдзю ўтварэння ААН. Гэта мерапрыемства будзе арганізавана пры падтрымцы Міністэрства замежных спраў, Мінгарвыканкама і аблвыканкамаў.