Прамовы і інтэрв’ю
Рыжанкоў: прапанаваная Беларуссю Еўразійская хартыя накіравана на пабудову больш бяспечнага свету
Фота з архiва
7 жніўня, Мінск /Кар. БЕЛТА/. Ініцыятывы Беларусі накіраваны на пабудову больш бяспечнага свету ў цэлым і Еўразіі ў прыватнасці. Важнасць гэтага адзначыў міністр замежных спраў Беларусі Максім Рыжанкоў у сваім артыкуле ў часопісе "Россия в глобальной политике" па тэме Еўразійскай хартыі шматпалярнасці і разнастайнасці ў XXI стагоддзі, паведамляе карэспандэнт БЕЛТА.
Кіраўнік знешнепалітычнага ведамства падкрэсліў: "Ініцыятыва, звязаная з Беларуссю, апошнім часам выклікае вялікую цікавасць. Гэта ідэя распрацоўкі Еўразійскай хартыі разнастайнасці і шматпалярнасці ў XXI стагоддзі. Упершыню яна была агучана на Міжнароднай канферэнцыі па еўразійскай бяспецы, праведзенай у Мінску ў кастычніку 2023 года, калі Рэспубліка Беларусь прапанавала распрацаваць Еўразійскую хартыю "як дапаможнік для нашай уласнай кансалідацыі і агульнага прагрэсіўнага развіцця".
Міністр звярнуў увагу, што ініцыятыва не ўзнікла на пустым месцы. "Хутчэй яна была выклікана рэальнымі геапалітычнымі патрэбнасцямі і імкненнямі, - выказаў меркаванне Максім Рыжанкоў. - Больш таго, ініцыятыва лагічна вынікага з другой важнай ініцыятывы Беларусі, якая заклікала краіны свету прызнаць разнастайнасць шляхоў да прагрэсіўнага развіцця. Гэты заклік упершыню прагучаў з вуснаў прэзідэнта Беларусі Аляксандра Лукашэнкі на Саміце ААН у 2005 годзе".
"Ініцыятыва "разнастайнасці" была прапанавана ў перыяд глабальнай нявызначанасці, якая ўзнікла з так званага аднапалярнага моманту з уласцівымі яму аднабаковасцю і ігнараваннем міжнароднага права, - прадоўжыў кіраўнік ведамства. - У сувязі з гэтым праз сваю ініцыятыву Беларусь імкнулася ўнесці свой уклад у намаганні іншых дзяржаў, накіраваныя на фарміраванне справядлівага міжнароднага парадку, у якім краіны маглі б жыць у міры і рэалізоўваць свае памкненні".
Паводле слоў Максіма Рыжанкова, па сутнасці, сённяшні свет стаў нават яшчэ больш нестабільным, чым свет чатыры дзесяцігоддзі таму, паколькі, нягледзячы на ідэалагічнае і геапалітычнае саперніцтва, Савецкаму Саюзу і Злучаным Штатам тады ўдавалася суіснаваць у своеасаблівай раўнавазе, якая забяспечвала стабільнасць і прадказальнасць, неабходныя для міру і развіцця. Але беспарадак, створаны ў час аднапалярнага моманту - войны, канфлікты, грубыя парушэнні міжнароднага права, масавае перамяшчэнне людзей, - усё яшчэ пераважае па прычыне ўзмацнення аднабаковых падыходаў у знешняй палітыцы заходніх краін.
Міністр замежных спраў Беларусі адзначыў: "На гэтым фоне Беларусь выступіла з ідэяй распрацаваць Еўразійскую хартыю. Ініцыятыва грунтуецца на многіх папярэдніх намаганнях Беларусі, акрамя ініцыятывы "разнастайнасці", такіх як, між іншым, нядаўні заклік Аляксандра Лукашэнкі да правядзення глабальнага дыялогу па бяспецы ў сапраўдным духу Сан-Францыска. Усе гэтыя ініцыятывы маюць на мэце ўнясенне ўкладу ў намаганні па пабудове больш бяспечнага свету ў цэлым і Еўразіі ў прыватнасці".
Максім Рыжанкоў таксама падкрэсліў, што ідэя Хартыі ўжо абмяркоўвалася на некаторых міжнародных форумах і назіраецца стабільны рост цікавасці да гэтай ініцыятывы. Немалаважна, што прэзідэнты Беларусі і Расіі таксама выказаліся ў падтрымку гэтай ідэі ў сваіх публічных заявах.
Беларусь і Расія выклалі свае "папярэднія погляды" на хартыю ў дакуменце пад назвай "Агульнае бачанне Еўразійскай хартыі разнастайнасці і шматпалярнасці ў XXI стагоддзі".
"У гэтым дакуменце дзве краіны прадставілі, між іншым, як яны разглядаюць разнастайнасць і шматпалярнасць, як яны ацэньваюць ролю Еўразіі і яе ўплыў на сусветныя працэсы, і што яны збіраюцца рабіць для рэалізацыі сумеснага бачання", - звярнуў увагу міністр замежных спраў Беларусі.
версія для друку
зрабіць стартавай
дабавіць у выбранае