Прамовы і інтэрв’ю

Рыжанкоў: Глабальная большасць будуе сучасны свет, i Беларусь - частка гэтай большасці

Фота з архiва

1 кастрычніка, Мінск /Кар. БЕЛТА/. Глабальная большасць будуе сучасны свет, і Беларусь - частка гэтай большасці. Аб гэтым заявіў журналістам міністр замежных спраў Максім Рыжанкоў, перадае карэспандэнт БЕЛТА.

Падводзячы вынікі свайго візіту ў Нью-Ёрк для ўдзелу ў мерапрыемствах 80-й сесіі Генеральнай Асамблеі ААН, Максім Рыжанкоў адзначыў важнасць таго, каб голас Беларусі гучаў на міжнароднай арэне, а аднадумцы бачылі ў краіне надзейнага партнёра.

"Важна даносіць да міжнароднай грамадскасці рэчы, якія мы разумеем як асноватворныя сённяшняга развіцця агульнасусветных тэндэнцый, сітуацыі. Недзе падзяліцца вопытам, недзе прыцягнуць увагу да нейкіх праблем, якія мы бачым. Гэта вельмі важна і для таго, каб нашы аднадумцы бачылі, што мы - аднадумцы і наш голас агульны, ён больш гучны, чым голас адной краіны, - сказаў міністр. - Мы яшчэ больш пераканаліся ў тым, што наша справа справядлівая, як кажуць, мы пераможам. Сёння Глабальная большасць будуе сучасны свет, мы таксама частка гэтай большасці. Уласна кажучы, з аднадумцамі мы яго і пабудуем".

"Таму чым больш нас будзе, тым больш будзе разумення. Чым больш будзе ўсведамлення, як гавораць нашы кітайскія сябры, неабходнасці будаўніцтва супольнасці адзінага лёсу, дзе ўсе не пра сябе думаюць, а пра будучыню чалавецтва, тым, напэўна, і мы будзем больш паспяховымі", - упэўнены кіраўнік знешнепалітычнага ведамства.

Акрамя таго, паводле яго слоў, беларускаму боку было важна данесці сваю пазіцыю па актуальных пытаннях сучаснасці. Напрыклад, па нераспаўсюджванні ўзбраенняў масавага паражэння, міграцыйным парадку дня, трансгранічным супрацоўніцтве, недапушчальнасці санкцый і эканамічных абмежаванняў, выпрацоўцы мер стабільнасці і бяспекі ў Еўразійскім рэгіёне.

Візіт на міжнародныя форумы - гэта таксама магчымасць сустрэцца з цяперашнімі і патэнцыяльнымі партнёрамі, абмеркаваць з імі ўзаемную падтрымку на сусветных пляцоўках, перспектывы двухбаковага супрацоўніцтва і канкрэтныя праекты.

"Гэта пошук тых, хто будзе разам з намі на палях Асамблеі ААН, на палях іншых міжнародных пляцовак праводзіць узгодненыя дзеянні ў рамках тых праблем, якія нас хвалююць, быць суаўтарам у рэзалюцыях. Нехта спрабуе заручыцца нашай падтрымкай. Мы абменьваемся падыходамі па падтрымцы кандыдатур адзін аднаго на выбарах у міжнародных арганізацыях. І двухбаковая тэма - выбудоўванне каркаса нашых адносін", - падкрэсліў беларускі дыпламат.

версія для друку

зрабіць стартавай

дабавіць у выбранае