Прамовы і інтэрв’ю

1 снежня, Мінск /Уладзімір Мацвееў - БЕЛТА/. Для ўмацавання супрацоўніцтва паміж Таджыкістанам і Беларуссю ёсць усе неабходныя ўмовы. Аб гэтым заявіў Прэзідэнт Таджыкістана Эмамалі Рахмон на перагаворах у пашыраным складзе з Прэзідэнтам Беларусі Аляксандрам Лукашэнкам, перадае карэспандэнт БЕЛТА.

"Упэўнены, што сумеснымі намаганнямі мы зможам яшчэ больш умацаваць наша супрацоўніцтва. Для гэтага ёсць усе неабходныя ўмовы, значная прававая база, наладжаная работа адпаведных механізмаў міждзяржаўнага ўзаемадзеяння і вялікі патэнцыял, які далёка не вычарпаны. У ключавым сегменце нашых адносін - эканамічнай сферы супрацоўніцтва - назіраецца ўзаемнае імкненне да ўстанаўлення ўзаемавыгадных партнёрскіх сувязей", - заявіў Прэзідэнт Таджыкістана.

Ён адзначыў, што для апошніх гадоў па розных прычынах характэрна тэндэнцыя скарачэння агульных аб'ёмаў тавараабароту, аднак задзейнічанне існуючых рэзерваў дасць магчымасць значна пашырыць сувязі ў гандлёвай сферы. "Нашы далейшыя планы неабходна сфакусіраваць на рэалізацыі гэтых магчымасцей. Аднаўленню дадатнай дынамікі двухбаковага тавараабароту значна садзейнічала б пашырэнне супрацоўніцтва на ўзроўні рэгіёнаў", - лічыць Эмамалі Рахмон.

Прэзідэнт Таджыкістана таксама бачыць новыя магчымасці для рэалізацыі сумесных інвестыцыйных праектаў у рэальным сектары эканомікі. "У апошнія гады мы з вамі цалкам апраўдана зрабілі стаўку на рэалізацыю канкрэтных эканамічна выгадных праектаў у галінах, дзе супадаюць інтарэсы бакоў. Гэта перш за ўсё аграпрамысловы комплекс, машынабудаванне, сферы транспарту, харчовай і лёгкай прамысловасці", - канстатаваў ён.

Эмамалі Рахмон адзначыў, што рэалізуемы інвестпраект па стварэнні ў горадзе Гісар сумеснай зборачнай вытворчасці сельгасабсталявання з'яўляецца адным з важных для АПК Таджыкістана. На сённяшні дзень запушчаны адзін цэх, а да восені 2018 года плануецца запусціць вытворчасць поўнасцю.

"Нашы дамоўленасці прадугледжвалі адкрыццё на поўдні Таджыкістана вытворчасці трактароў маркі "Беларус". Гэты праект было прапанавана рэалізаваць з улікам экспарту выпускаемай прадукцыі ў Афганістан і Пакістан", - дадаў Прэзідэнт Таджыкістана.

Ён падкрэсліў, што разглядае цяперашнія перагаворы як лагічны працяг пастаянных палітычных кантактаў дзвюх краін на вышэйшым узроўні. "Мы ў Таджыкістане з высокім пачуццём і сімпатыяй ставімся да брацкага беларускага народа і вельмі даражым традыцыямі шчырай дружбы паміж намі", - сказаў Эмамалі Рахмон.

У Таджыкістане дзейнічаюць суб'екты тавараправоднай сеткі больш як 15 беларускіх прадпрыемстваў, у тым ліку ААТ "БелАЗ", ААТ "МАЗ", ААТ "МТЗ", ААТ "Амкадор", ААТ "Гомсельмаш", ААТ "Бабруйскаграмаш".