Прамовы і інтэрв’ю

Піневіч: у Беларусі да новага года ад COVID можа быць прышчэплена палова насельніцтва

Фота з архiва

22 снежня, Брэст /Кар. БЕЛТА/. Палова насельніцтва Беларусі да новага года будзе прышчэплена першым кампанентам вакцыны ад COVID-19, заявіў сёння журналістам у Брэсце міністр аховы здароўя Дзмітрый Піневіч, перадае карэспандэнт БЕЛТА.

Характарызуючы бягучую сітуацыю ў краіне па каранавірусе, Дзмітрый Піневіч адзначыў павелічэнне тэмпаў вакцынацыі. "Любы від вакцыны, які прымяняецца цяпер, з'яўляецца засцерагальным, у тым ліку ад амікрон-штама. Хутка прыбудзе яшчэ адзін борт з вакцынай з Кітайскай Народнай Рэспублікі. Атрымалі вакцыну "Спадарожнік Лайт" для правядзення ўжо бустарнай вакцынацыі, і яна ідзе даволі інтэнсіўна. Я лічу, што да новага года мы будзем адназначна мець 50-працэнтны ахоп (можа, нават вышэй) першым кампанентам. Гэта дасць магчымасць нам з доляй упэўненасці ўступаць у новы год", - сказаў міністр.

Паводле яго слоў, цяпер усе рэгіёны па захваральнасці на кавід-інфекцыю знаходзяцца практычна на адным узроўні. У цэлым па краіне ўзровень шпіталізацыі захварэлых ад піку чацвёртай хвалі складае менш за 30 працэнтаў. Як паказваюць даследаванні, актыўнасць цыркуляцыі віруса COVID-19 зменшылася. "Амікрон пакуль не выяўлены. Я думаю, што ён цыркулюе, але мы пакуль яго не знайшлі. Думаю, гэта справа часу, як было вясной і са штамам дэльта. Мы гатовы да гэтага. Цяпер на спадзе хвалі перааснашчаемся: дааснашчаем кіслародныя кропкі, кіслародную лагістыку. Запасаў медыкаментаў у нас дастаткова", - заўважыў кіраўнік ведамства.

Ён таксама звярнуў увагу на рэкамендацыю Міністэрства аховы здароўя па вакцынацыі дзяцей старэйшых за 12 гадоў. "Наш вопыт паказаў: чым вышэйшая ступень ахопу вакцынацыі, тым меншы ўзровень шпіталізацыі ў стацыянарах і цяжкасць пераносу каранавіруснай інфекцыі. Увесь свет вакцынуе дзяцей супраць каранавіруса. Мы пакуль дапускаем з 12 гадоў вакцынай кітайскай вытворчасці - найбольш мяккай у гэтых адносінах. Таму нашы рэкамендацыі аб вакцынацыі захоўваюцца, але без якога-небудзь націску. Гэта павінна быць у поўнай меры са згоды і жадання бацькоў", - падкрэсліў Дзмітрый Піневіч.

Сёння міністр аховы здароўя прыняў удзел у цырымоніі адкрыцця новага лячэбнага корпуса Брэсцкай дзіцячай абласной бальніцы. У новы будынак, які аснашчаны самым сучасным медыцынскім абсталяваннем, пераехалі чатыры аддзяленні ўстановы. Тут адкрыты кабінет магнітна-рэзананснай тамаграфіі для правядзення даследаванняў дзецям усіх узростаў, у тым ліку з выкарыстаннем наркозна-дыхальнай апаратуры. З абласнога і рэспубліканскага бюджэтаў у важны сацыяльны аб'ект было ўкладзена Br38 млн.

версія для друку

зрабіць стартавай

дабавіць у выбранае