Прамовы і інтэрв’ю

Вучань гродзенскай гімназіі нумар 2, член абласнога Маладзёжнага парламента Аляксей Суцько адзначыў, што ў час сустрэчы з кіраўніком дзяржавы былі ўзняты найбольш актуальныя для маладога пакалення тэмы. З Прэзідэнтам моладзь змагла пагаварыць пра час пачатку ўрокаў, новыя падручнікі, заняткі ў шосты дзень тыдня, а таксама абмеркаваць многія іншыя пытанні.

"Запомнілася абмеркаванне пытанняў, звязаных са спортам. Гэта сапраўды важная тэма. Мы праводзім занадта шмат часу, седзячы ў крэслах, гуляючы ў тэлефоны, забываем пра жывыя стасункі, што вельмі важна. Абавязкова прыслухаемся да парады Прэзідэнта і будзем займацца спортам, трымаць сябе ў добрай форме", - паабяцаў Аляксей Суцько.

Сам гімназіст прысвяціў шмат гадоў хакею, самба, дзюдо і вольнай барацьбе. Цяпер ён займаецца боксам, а зімой - снаўбордынгам. "Хацелася б, каб такія сустрэчы праходзілі як мага часцей", - сказаў падлетак.

Асаблівае стаўленне Аляксандра Лукашэнкі да спорту адзначыла і вучаніца сярэдняй школы нумар 5 Жодзіна, старшыня піянерскай дружыны Паліна Жданок. "Я была здзіўлена, што Прэзідэнт прысвячае так шмат часу - дзве гадзіны ў дзень - спорту. Гэта ўражвае", - падкрэсліла яна.

Акрамя таго, лічыць школьніца, заслугоўваюць павагі адносіны кіраўніка дзяржавы да сваіх абавязкаў на гэтай высокай пасадзе. "Гэта сапраўды цудоўны чалавек", - сказала Паліна Жданок.

"Я думаю, кожны падлетак быў уражаны тым, наколькі нефармальная абстаноўка стварылася ў час размовы з Прэзідэнтам. Мне здаецца, такога ніхто не чакаў", - падзялілася з журналістамі ўражаннямі вучаніца гомельскай гімназіі нумар 36 імя І. Мележа, старшыня Гомельскага гарадскога дзіцячага парламента Кацярына Гаўрыленка. Яна звярнула ўвагу, што на сустрэчы з Аляксандрам Лукашэнкам паспелі пагаварыць пра ўсё: абмеркавалі адукацыю, здароўе, спорт, асабістае жыццё. Гімназістцы найбольш была цікава тэма прафарыентацыі, паколькі цяпер яна заканчвае вучобу ў выпускным класе. "Напэўна, гэта гістарычная падзея, бо такога раней не было. І я ўпэўнена, што гэта толькі пачатак і гэта прадоўжацца ў будучым", - дадала яна.

А вось вучаніца гімназіі нумар 10 Гродна, член абласнога маладзёжнага парламента Марыя Шыманоўская прызналася, што перад сустрэчай з Прэзідэнтам вельмі хвалявалася. "Было шмат эмоцый і хвалявання, але я не думала, што будзе так проста на сустрэчы з кіраўніком нашай дзяржавы. Было настолькі спакойна, нібыта я штодзень бачуся з ім і размаўляю", - сказала Марыя Шыманоўская.

Сёння Аляксандр Лукашэнка наведаў сярэднюю школу нумар 61 Мінска. Прэзідэнт азнаёміўся з развіццём сістэмы агульнай сярэдняй адукацыі, агледзеў выстаўку дасягненняў дзіцячага і маладзёжнага руху "Лідарскія арыенціры - формула поспеху".

На базе навучальнай установы прайшла сустрэча кіраўніка дзяржавы з навучэнцамі. Школьнікі змаглі паразмаўляць з Прэзідэнтам у нефармальнай атмасферы, задаць хвалюючыя іх пытанні, выказаць меркаванні па цікавых для іх тэмах і падзяліцца прапановамі.

Усяго на сустрэчу з Аляксандрам Лукашэнкам былі запрошаны 300 чалавек са сталіцы і розных рэгіёнаў Беларусі. У іх ліку лепшыя прадстаўнікі навучэнскай моладзі 12-17 гадоў, якія праявілі сябе ў творчым, культурным, спартыўным і грамадскім жыцці, сталі ініцыятарамі дзіцячых і маладзёжных сацыяльна значных праектаў і ініцыятыў.

Напярэдадні для школьнікаў арганізавалі экскурсію па Палацы Незалежнасці.