Прамовы і інтэрв’ю

16 студзеня, Мінск /Таццяна Грыгаровіч - БЕЛТА/. Беларускі бок у час афіцыйнага візіту ў Кітай прэм'ер-міністра Міхаіла Мясніковіча агучыць азіяцкаму партнёру новыя ініцыятывы. Аб гэтым было сказана сёння ў час інтэрв'ю кіраўніка беларускага ўрада кітайскім СМІ, перадае карэспандэнт БЕЛТА.

Гэта першы візіт Міхаіла Мясніковіча ў Кітайскую Народную Рэспубліку на пасадзе прэм'ер-міністра. Паводле яго слоў, урад вядзе актыўную падрыхтоўку: падводзяцца пэўныя вынікі таго, што ўжо зроблена бакамі, таксама ідзе работа над новымі ініцыятывамі.

"Я еду з вялікай надзеяй на тое, што гэты візіт адкрые новую старонку ў супрацоўніцтве паміж нашымі дзяржавамі, што, безумоўна, будзе садзейнічаць умацаванню дружбы, узаемаразумення, а таксама развіццю нашых эканомік", - адзначыў кіраўнік беларускага ўрада.

Што ж датычыцца цяперашняга ўзроўню ўзаемаадносін паміж Беларуссю і Кітаем, то, паводле слоў Міхаіла Мясніковіча, з 2013 года паміж краінамі ўстанавіўся вышэйшы ўзровень узаемаадносін - усебаковае стратэгічнае партнёрства. "Наколькі я ведаю, толькі дзевяць краін свету маюць такі высокі ўзровень узаемаадносін з Вялікім Кітаем", - з задавальненнем падкрэсліў прэм'ер-міністр. І гэта не толькі статус, які вызначае вышэйшы ўзровень даверу на вышэйшым палітычным узроўні. "У нас зусім няма закрытых тэм, - сказаў прэм'ер. - Парадак дня адкрыты па ўсіх пытаннях. Мы можам абмяркоўваць і выказваць свой пункт гледжання па ўсіх пытаннях і праблемах, што датычацца як двухбаковых адносін, так і супрацоўніцтва ў рамках міжнародных арганізацый".

Сёння бакі смела выходзяць на вельмі многія цікавыя эканамічныя і палітычныя праекты, дадаў прэм'ер-міністр.

Як паведамлялася, 19-23 студзеня прэм'ер-міністр Міхаіл Мясніковіч наведае з афіцыйным візітам Кітайскую Народную Рэспубліку. Ён правядзе шэраг афіцыйных перагавораў, па выніках якіх плануецца падпісанне двухбаковых дакументаў. Таксама Міхаіл Мясніковіч сустрэнецца з кіраўніцтвам шэрага кітайскіх карпарацый, наведае сумесныя прадпрыемствы, размешчаныя на тэрыторыі Харбіна. Па выніках візіту бакі маюць намер падпісаць шэраг міжнародных дакументаў.