Прамовы і інтэрв’ю

30 жніўня, Мінск /Кар. БЕЛТА/. Беларусь гатова абмяркоўваць з АБСЕ любыя актуальныя пытанні. Аб гэтым заявіў сёння старшыня Савета Рэспублікі Міхаіл Мясніковіч на сустрэчы са спецыяльным каардынатарам місіі кароткатэрміновых наглядальнікаў АБСЕ на выбарах у Палату прадстаўнікоў, намеснікам старшыні ПА АБСЕ Кентам Харстэдам, перадае карэспандэнт БЕЛТА.

"Любыя пытанні, нават самыя тонкія на ваш погляд, пэўныя дэталі мы гатовы абмяркоўваць і даваць адказы", - адзначыў Міхаіл Мясніковіч.

Пры гэтым ён прапанаваў Кенту Харстэду не толькі азнаёміцца з ходам выбарчай кампаніі ў парламент, але вывучыць сацыяльна-палітычную сітуацыю ў краіне, звярнуць увагу на тое, як развіваецца беларуская эканоміка, як Беларусь выбудоўвае міжнародныя адносіны. "Кола пытанняў, якія могуць быць прадметам нашага абмеркавання, не абмяжоўваецца толькі тымі пытаннямі, якія датычацца падрыхтоўкі і правядзення выбараў у парламент", - сказаў Міхаіл Мясніковіч.

Запрашаючы міжнародных наглядальнікаў да азнаямлення з ходам выбарчай кампаніі, Беларусь дэманструе адкрытасць і прыхільнасць дэмакратычным прынцыпам, падкрэсліў старшыня Савета Рэспублікі. Разам з тым ён адзначыў, што "не для АБСЕ, не для Парламенцкай асамблеі АБСЕ, а менавіта ў інтарэсах беларускага народа робіцца ўсё, каб выбары былі свабоднымі, адкрытымі, каб народ мог праявіць сваё волевыяўленне дэмакратычным шляхам".

Беларусь з'яўляецца паўнапраўным членам АБСЕ і актыўна працуе ў асноўных і дапаможных органах арганізацыі, уключаючы Парламенцкую асамблею. "Беларусь зацікаўлена ў тым, каб і да нашай краіны, і да іншых дзяржаў-членаў быў поўны давер", - заявіў старшыня Савета Рэспублікі. Ён таксама акцэнтаваў увагу, што ў Беларусі задаволены развіццём актыўнага дыялогу з Еўропай. "Мы ў гэтым вельмі зацікаўлены, як і зацікаўлены ў збліжэнні пазіцый па ўсіх актуальных пытаннях сучаснага парадку дня", - падкрэсліў ён.

Міхаіл Мясніковіч нагадаў, што ПА АБСЕ прыняла рашэнне аб правядзенні 26-й сесіі ў Мінску ў 2017 годзе. "Мы актыўна рыхтуемся і будзем рабіць усё, каб правесці гэта мерапрыемства на належным узроўні", - рэзюмаваў ён.