Прамовы і інтэрв’ю
Мядзведзева: Беларуская статыстыка адпавядае міжнародным стандартам
20 жніўня, Мінск /Кар. БЕЛТА/. Беларуская статыстыка адпавядае міжнародным стандартам. Аб гэтым заявіла сёння журналістам старшыня Нацыянальнага статыстычнага камітэта Іна Мядзведзева на прэс-канферэнцыі, прысвечанай Дню работнікаў дзяржаўнай статыстыкі, перадае карэспандэнт БЕЛТА.
"Для Белстата вельмі важны высокі давер да статыстычных даных і ўстанаўленне даверу і пастаяннага дыялогу з шырокім колам карыстальнікаў. Са снежня 2004 года Беларусь афіцыйна далучылася да Спецыяльнага стандарту распаўсюджвання даных МВФ. Сёння даныя, якія прадастаўляюцца Беларуссю, адпавядаюць усім патрабаванням, што прад'яўляюцца МВФ адносна ахопу, перыядычнасці і своечасовасці", - адзначыла Іна Мядзведзева. Паводле яе слоў, праведзеная ў 2012 годзе міжнароднымі экспертамі адаптаваная глабальная ацэнка нацыянальнай статыстычнай сістэмы зафіксавала высокі ўзровень развіцця статыстыкі ў рэспубліцы.
Іна Мядзведзева канстатавала, што вынікі ацэнкі далі магчымасць не толькі пацвердзіць адпаведнасць беларускай статыстыкі міжнародным стандартам, але і вызначыць стратэгічныя напрамкі яе развіцця. У прыватнасці, прадугледжваецца ўдасканаленне заканадаўчай асновы дзейнасці органаў дзяржаўнай статыстыкі, правядзенне перапісу насельніцтва, укараненне ў статыстычную практыку з 1 студзеня 2016 года абноўленага міжнароднага стандарту ў галіне нацыянальнага рахункаводства (СНР-2008), новых версій агульнадзяржаўных класіфікатараў відаў эканамічнай дзейнасці і прадукцыі, развіццё і паляпшэнне функцыянальна-эксплуатацыйных характарыстык адзінай інфармацыйнай сістэмы дзяржаўнай статыстыкі, пашырэнне складу і доступу да афіцыйнай статыстычнай інфармацыі, у тым ліку з выкарыстаннем інтэрактыўных элементаў, далейшае ўдасканаленне метадалогіі, забеспячэнне супастаўнасці з міжнароднымі стандартамі, умацаванне супрацоўніцтва паміж статыстычнымі службамі краін СНД і ЕАЭС.
Арганізацыя Аб'яднаных Нацый аб'явіла 20 кастрычніка 2015 года Сусветным днём статыстыкі, які пройдзе пад дэвізам "Павышэнне якасці даных - павышэнне якасці жыцця". "У нас будзе Дзень даступнай інфармацыі. Усе запыты, што паступяць 20 кастрычніка, незалежна ад аб'ёму запытваемай інфармацыі, будуць выкананы бясплатна. Распаўсюджванню падлягае толькі афіцыйная статыстычная інфармацыя. Зразумела, мы будзем працаваць у рамках закона, канфідэнцыяльныя першасныя даныя прадастаўляцца не будуць", - расказала Іна Мядзведзева.
версія для друку
зрабіць стартавай
дабавіць у выбранае