Прамовы і інтэрв’ю

Лукашэнка: ЗША не ставяць за мэту адарваць Беларусь ад Расіі

Фота з архiва

20 сакавіка, Мінск /Кар. БЕЛТА/. ЗША не ставяць за мэту адарваць Беларусь ад Расіі. Аб гэтым Прэзідэнт Беларусі Аляксандр Лукашэнка заявіў у размове з журналістамі, расказваючы аб выніках праведзеных напярэдадні перагавораў з амерыканскай дэлегацыяй на чале са спецпасланнікам Джонам Коўлам, перадае карэспандэнт БЕЛТА.

"Мы абмяркоўвалі многія пытанні. Усе міжнародныя праблемы. Іх цікавіў мой пункт гледжання, як мы ў гэтым рэгіёне, як гэта бачаць беларусы, наша ўлада. Я выклаў свой пункт гледжання, свае падыходы. У тым ліку ў гэтым плане, калі яны задавалі пытанні, і па Расіі, па Кітаі. Але я іх папярэдзіў: гэта нашы не проста саюзнікі, гэта блізкія нам дзяржавы. І я хачу, каб амерыканцы гэта ўлічвалі. Трэба аддаць ім належнае, яны гэта ўлічваюць", - сказаў кіраўнік дзяржавы.

Ён падкрэсліў, што з боку ЗША ніколі ў ходзе перагавораў не ўзнімалася пытанне, каб адарваць Беларусь ад Расіі, як аб гэтым асобныя часам разважаюць і ў самой Расіі. "Ды бог з вамі! Ніколі амерыканцы не ставілі такое за мэту", - заявіў Аляксандр Лукашэнка.

"Аднойчы абмяркоўвалася пытанне, ці можам мы купіць амерыканскі звадкаваны газ (прывязуць праз Польшчу на "Гродна Азот"). Я гавару: "З вялікім задавальненнем, але вы зможаце канкурыраваць з расійскім прыродным газам?" - сказаў Прэзідэнт. Аляксандр Лукашэнка тады растлумачыў, што расійскі газ паступае па трубаправодзе і па цане ніжэйшай, чым на сусветных рынках.

"Яны засмяяліся. Я кажу: "Ну вось вам адказ на гэта пытанне". Я, гавару, крыху ўмею лічыць. А на "Гродна Азоце" эканамістаў дастаткова, якія таксама палічаць і выберуць, што лепш, - дадаў кіраўнік дзяржавы. - Гэта значыць, я не паводжу сябе, як еўрапейцы (размова аб краінах Еўрасаюза. - Заўвага БЕЛТА). Сказалі купляць амерыканскае - усё, купляем, хоць у пяць разоў даражэй. Вось да чаго даскакаліся еўрапейцы".

версія для друку

зрабіць стартавай

дабавіць у выбранае