Прамовы і інтэрв’ю
Лукашэнка: трэба выпрацаваць эфектыўную сістэму падтрымкі сем'яў, каб дапамога ішла менавіта на дзяцей
Фота з архiва
6 кастрычніка, Брэсцкая вобласць /Кар. БЕЛТА/. Сумеснымі намаганнямі грамадства і дзяржавы трэба выпрацаваць эфектыўную сістэму падтрымкі сем'яў, каб дапамога ішла менавіта на дзяцей. Аб гэтым Прэзідэнт Беларусі Аляксандр Лукашэнка заявіў журналістам у час рабочай паездкі ў Брэсцкую вобласць, перадае карэспандэнт БЕЛТА.
Пытанне кіраўніку дзяржавы датычылася рэзананснай крымінальнай справы і падрабязнасцей аб ладзе жыцця сям'і, што высветліліся ў ходзе расследавання і слухання ў судзе.
Аляксандр Лукашэнка адзначыў, што ў такіх сітуацыях, безумоўна, важна роля грамадства, якое не павінна быць абыякавым да таго, што адбываецца вакол, і своечасова рэагаваць, прымаць меры.
Падтрымка шматдзетных сем'яў з боку дзяржавы, паводле слоў Прэзідэнта, мае вялікае значэнне, таму што трэба паляпшаць дэмаграфічную сітуацыю ў краіне. Але сістэму неабходна выбудаваць так, каб дапамога была адраснай - на дзяцей. І ў гэтым сэнсе трэба арганізаваць кантроль за мэтавым выкарыстаннем такой дапамогі.
"Каб грошы, якія дзяржава перадае дзецям, даходзілі да дзяцей. Якая гэта будзе сістэма, шчыра кажучы, я не ведаю. Гэта няпростая будзе работа, і сістэму гэту распрацаваць будзе складана. Але толькі ведаю, што без вас мы гэтага не зробім. У гэтым нам павінны дапамагчы людзі на месцах. Але гэта трэба рабіць", - падкрэсліў Аляксандр Лукашэнка.
"Улада, мы павінны выпрацаваць такую схему, сістэму паводзін, каб ведалі, што за сям'я. На месцах людзі ведаюць. Калі мы, атрымаўшы інфармацыю, убачылі б, што гэта алкашы і яны, атрымаўшы дапамогу, яе прап'юць, то мы ўжо самі кармілі б гэтых дзяцей, апраналі, у школу адпраўлялі і вучылі там", - дадаў Прэзідэнт.
На неабходнасць забяспечыць адрасную падтрымку дзяцей са шматдзетных сем'яў кіраўнік дзяржавы звяртаў увагу пастаянна і патрабаваў ад адказных асоб прыняцця адпаведных мер.
Звяртаючыся 31 сакавіка бягучага года з Пасланнем да беларускага народа і парламента, Прэзідэнт канстатаваў, што сярод шматдзетных сем'яў сустракаюцца такія, дзе бацькі вядуць асацыяльны лад жыцця, злоўжываюць алкаголем. Таму на месцах неабходна прынцыпова разабрацца ў сітуацыі і ў першую чаргу абараніць інтарэсы дзяцей, каб грошы і дзяржпадтрымка траціліся менавіта на іх.
"Ураду, губернатарам трэба вырашыць гэту праблему. Я перад вамі паставіў гэта пытанне. Калі вы бачыце, што сям'я прапівае гэтыя сродкі і да дзяцей грошы не даходзяць, - прыміце рашэнне на месцы і забяспечце дзяцей", - падкрэсліў Аляксандр Лукашэнка.
Прэзідэнт запатрабаваў зрабіць так, каб дзецям, якім дзяржава плаціць немалыя грошы, гэтыя льготы даставаліся. "Каб гэтыя звар'яцелыя бацькі не атрымлівалі гэтыя грошы на рукі, калі яны гэтага не заслугоўваюць, - сказаў Аляксандр Лукашэнка. - Ды і грамадства абураецца, каму мы плацім?"
Пытанне выкарыстання бацькамі дзіцячых дапамог абмяркоўвалася і на нарадзе Прэзідэнта з кіраўніцтвам Савета Міністраў 22 чэрвеня бягучага года. "Мы выдзяляем немалыя грошы для таго, каб падтрымаць дзетак, і не толькі шматдзетных, - адзначыў кіраўнік дзяржавы. - Цяпер амаль у 10 тысячах сем'яў дзеці прызнаны ў сацыяльна небяспечным становішчы. 10 тысяч сем'яў не могуць даглядзець як мае быць сваіх дзяцей. Нядбайныя бацькі проста прапіваюць дзіцячыя дапамогі, а пакутуюць дзеці".
У сувязі з гэтым Аляксандр Лукашэнка падкрэсліў: "Сістэму трэба настроіць дакладна - дзеці ні ў якім выпадку не павінны быць абдзелены, а безадказных бацькоў трэба прывесці да розуму".
Як паведамлялася БЕЛТА, на гэтым тыдні ў судзе пачаўся разгляд рэзананснай крымінальнай справы - бацькоў абвінавачваюць у жорсткім забойстве іх трохгадовага сына.
Дзіця зведвала насілле з боку бацькоў фактычна з самага нараджэння. Яно галадала, было знясіленае. Хоць сям'я, з'яўляючыся шматдзетнай, атрымлівала адпаведныя выплаты, але, мяркуючы па матэрыялах справы і паказаннях абвінавачаных у судзе, траціліся грошы зусім не ў інтарэсах дзяцей, а на выпіўку і асацыяльны лад жыцця бацькоў.
У студзені 2023 года ў прысутнасці іншых дзяцей муж і жонка нанеслі мноства ўдараў рукамі і нагамі па галаве і нагах сына. Дзіця памерла.
версія для друку
зрабіць стартавай
дабавіць у выбранае