Прамовы і інтэрв’ю
Лукашэнка перадаў Коўлу "прагматычныя прапановы", якія знаходзяцца ў плоскасці інтарэсаў ЗША
18 снежня, Мінск /Кар. БЕЛТА/. Прэзідэнт Беларусі Аляксандр Лукашэнка прапанаваў ЗША дамаўляцца на аснове прагматызму. Аб гэтым ён заявіў у інтэрв'ю амерыканскай тэлекампаніі "Ньюсмакс", перадае карэспандэнт БЕЛТА.
Паводле слоў Аляксандра Лукашэнкі, у ходзе перагавораў са спецпасланнікам ЗША ў Беларусі Джонам Коўлам ён перадаў "некаторыя прапановы нашага прагматызму", якія знаходзяцца ў плоскасці інтарэсаў ЗША. "І па-мужчынску сказаў вашым калегам, якія прыехалі: трэба ўмець прызнаваць паражэнне. Калі нават буйная краіна, такая як ЗША, калі вы ў 2020 годзе, арганізаваўшы супраць нас атаку (не вы асабіста, але вы былі прыхільнікамі гэтага), прайгралі - трэба зыходзіць з гэтага. Не трэба хадзіць і крычаць па свеце: мы прайгралі. Але трэба зыходзіць з гэтага. Прайгралі - давайце сядзем спакойна, па-мужчынску, будзем рухацца далей", - звярнуў увагу Прэзідэнт.
"Трэба дамаўляцца. Трэба перастаць нам адзін з адным змагацца, асабліва прыхільнікам. Мы чаго з амерыканцамі маем дрэнныя адносіны? Што мы зрабілі дрэннага для Злучаных Штатаў Амерыкі? Нічога. Дык чаму вы на нас глядзіце скоса?" - рытарычна спытаў беларускі лідар.
Аляксандр Лукашэнка падкрэсліў зацікаўленасць Беларусі ў добрых узаемаадносінах з ЗША і выказаў упэўненасць, што ў выніку бягучага дыялогу бакам удасца аб усім дамовіцца.
Кіраўнік дзяржавы лічыць, што цяперашняе пакаленне кіраўнікоў не павінна пакідаць у спадчыну наступным пакаленням нявырашаныя пытанні ва ўзаемаадносінах дзвюх дзяржаў. "Я не хачу, каб праблемы, якія ўзніклі ў перыяд кіравання мною краінай, былі перакладзены на новае пакаленне. Кожнае пакаленне павінна вырашаць свае праблемы самі. Вось у нашага пакалення - у Трампа, у Лукашэнкі - ёсць праблемы. Мы іх павінны вырашыць", - упэўнены Прэзідэнт.
Больш таго, ёсць агульныя пытанні, дзе Беларусь і ЗША могуць дапамагчы адзін аднаму. У якасці прыкладу Аляксандр Лукашэнка прывёў Венесуэлу. "Мы можам разам там працаваць? Можам. Я ўчора Джону Коўлу сказаў (размова аб перагаворах 12 снежня. - Заўвага БЕЛТА): бясплатна (мне не трэба нічога плаціць) будзем разам працаваць у інтарэсах таго, каб і венесуэльскі народ жыў у міры, і амерыканцы не гінулі на чужой зямлі дзеля нейкіх там нафты, золата, рэдказямельных металаў або ў барацьбе з наркотыкамі і іншае. Там, дзе ёсць магчымасць захаваць жыццё, трэба гэта захаваць", - сказаў Прэзідэнт.
Кіраўнік дзяржавы, гаворачы аб тым, якім ён бачыць развіццё беларуска-амерыканскіх адносін, адзначыў некаторае падабенства двух народаў. Паколькі ў многіх у ЗША - еўрапейскія карані. "Таму я ўпэўнены, што мы дамовімся. Можа, на рэйках прагматызму. Амерыканцы выключна прагматычныя. Мы таксама. Таму, я думаю, калі мы вызначымся па асноўных напрамках нашага прагматызму, мы дамовімся, - дадаў Аляксандр Лукашэнка. - Таму - мы дамовімся з амерыканцамі. Мы дамовімся".
версія для друку
зрабіць стартавай
дабавіць у выбранае