Прамовы і інтэрв’ю
Лукашэнка: памяць аб Вялікай Перамозе трэба шанаваць i ні ў якім разе не выкідваць кудысьці за борт
Фота з архiва
2 сакавіка, Мінск /Кар. БЕЛТА/. Памяць аб Вялікай Перамозе трэба шанаваць і ні ў якім разе не выкідваць кудысьці за борт, як гэта спрабуюць рабіць асобныя дзяржавы. Аб гэтым Прэзідэнт Беларусі Аляксандр Лукашэнка заявіў на сустрэчы з губернатарам Мурманскай вобласці Андрэем Чыбісам, перадае карэспандэнт БЕЛТА.
Прэзідэнт адзначыў агульнасць гістарычнага мінулага Беларусі і Мурманскай вобласці, у тым ліку іх ролю ў перыяд Вялікай Айчыннай вайны. Узгадвалася, што ў тыя гады на тэрыторыі паўночнага расійскага рэгіёна ваяваў класік беларускай літаратуры Іван Шамякін. "Гэта сведчыць аб тым, што ў нас ёсць і былі людзі, якія звязваюць нас. І вельмі моцна", - заўважыў Аляксандр Лукашэнка.
Кіраўнік дзяржавы таксама звярнуў увагу на значную ролю Мурманска, які ў гады Вялікай Айчыннай вайны стаў варотамі па абароне агульнай Айчыны, Савецкага Саюза. Праз яго ажыццяўляліся пастаўкі неабходнага абсталявання і ваеннай тэхнікі. "У тым ліку і дзякуючы гэтаму Мурманск пакрыў сябе неўвядальнай славай. Загінула там нямала людзей. Але дастойна змагаліся жыхары поўначы, каб прывесці нас да той Перамогі, якую святкавалі ў маі 1945-га", - сказаў беларускі лідар.
"Гэтак жа, як Беларусь, вы ад гэтай вайны пацярпелі. І гэта наша агульная Перамога. Мы яе павінны бачыць, шанаваць. Ні ў якім разе не выкідваць яе кудысьці за борт", - падкрэсліў кіраўнік дзяржавы.
"Я, калі чую некаторыя выпады балтыйскіх дзяржаў, Украіны ў плане тое разбурыць, гэта разбурыць, і Айчынная вайна - гэта не тое, што для нас, па-зямному думаю: навошта вы вялікую заслугу свайго народа выкідваеце на памыйніцу? - рытарычна спытаў Аляксандр Лукашэнка. - Вы навошта гэта робіце? Гэтым трэба ганарыцца".
Прэзідэнт таксама адзначыў агульнасць і блізкасць Беларусі з расійскім рэгіёнам у нядаўнім мінулым, у часы існавання Савецкага Саюза. "Мы наогул не дзялілі Мурманскую вобласць з Беларуссю, асабліва што датычыцца ваенна-марскога флоту. Як на Балтыцы, так і ў вас служылі нашы хлопцы з Беларусі. І яны ганарацца гэтым", - дадаў кіраўнік дзяржавы.
У сваю чаргу Андрэй Чыбіс падзякаваў за магчымасць сустрэчы, якая праходзіць пасля вялікай падзеі, прысвечанай якраз развіццю Саюзнай дзяржавы. Асобныя словы ўдзячнасці ён выказаў за ўпамінанне важнай ролі Мурманска і вобласці ў час Вялікай Айчыннай вайны. "Сапраўды, горад заўсёды меў - з моманту свайго з'яўлення ў пачатку ХХ стагоддзя - і цяпер мае важнае стратэгічнае значэнне. У час Вялікай Айчыннай вайны дзякуючы паўночным канвоям нам удалося наблізіць агульную Перамогу, памяць аб якой шануюць і ў Расіі, і ў Беларусі. Вялікі вам за гэта дзякуй", - сказаў кіраўнік рэгіёна.
"Сёння з улікам таго, што адбываецца ў свеце, горад Мурманск - глыбакаводны незамярзальны порт, апорны порт Паўночнага марскога шляху - набывае яшчэ большае значэнне і для нашай краіны, і для нашых партнёраў, для нашых сяброў", - падкрэсліў ён.
версія для друку
зрабіць стартавай
дабавіць у выбранае