Прамовы і інтэрв’ю

Лукашэнка аб саюзных праграмах: размовы няма аб тым, што Расія або Беларусь паступаюцца суверэнітэтам

Фота з архiва

12 студзеня, Мінск /Кар. БЕЛТА/. Размовы аб тым, што Расія або Беларусь паступаюцца сваім суверэнітэтам, не ішло і на сённяшні дзень не ідзе, і ісці не можа. Аб гэтым Прэзідэнт Беларусі Аляксандр Лукашэнка заявіў 12 студзеня на нарадзе па пытаннях выканання інтэграцыйных праграм Саюзнай дзяржавы, перадае карэспандэнт БЕЛТА.

"Папярэджваю, размовы аб тым, што Расія або Беларусь паступаюцца сваім суверэнітэтам, не ішло і на сённяшні дзень не ідзе, і ісці не можа. Проста няма неабходнасці (у гэтым. - Заўвага БЕЛТА), - падкрэсліў Аляксандр Лукашэнка. - Мы яшчэ ў тым фармаце, у якім супрацоўнічаем з Расіяй, не выпрацаваліся".

Прэзідэнт адзначыў, што калі бакі ў перспектыве ўбачаць, што нечага не хапае і трэба прымаць дадатковыя рашэнні ў плане інтэграцыі і збліжэння эканомікі дзяржаў, то адпаведныя пытанні будуць абмяркоўвацца.

Паводле слоў кіраўніка дзяржавы, гэта асноўнае пытанне, чаму ён сабраў на нараду вялікае кола адказных асоб. "Каб вы не думалі, што за вашай спінай вырашаюцца нейкія пытанні, а вы пра іх і не ведаеце. Не, гэты працэс адкрыты, сумленны і прынцыповы. Тым больш час падштурхоўвае нас да такога вырашэння гэтых праблем", - сказаў Прэзідэнт.

Кіраўнік дзяржавы асабліва падкрэсліў, што калі зацвярджаліся 28 саюзных галіновых праграм, то гэта было проста рашэнне прэзідэнтаў дзвюх краін. Да гэтага моманту на працягу доўгага часу бакамі выпрацоўваліся адпаведныя дакументы і падыходы да іх, вызначаліся напрамкі для сумеснай работы. "Не проста мы там з Пуціным сабраліся і "бабахнулі" нешта. Не. Службовыя асобы, адказныя збіраліся, абмяркоўвалі на Вышэйшым дзяржсавеце. Мы зацвердзілі гэтыя праграмы. Але іскрыла вельмі, калі мы гэтыя праграмы прымалі", - сказаў Аляксандр Лукашэнка.

Ён нагадаў, што ў свой час былі розныя прапановы аб тым, што ўключаць у інтэграцыйны пакет, аж да пытанняў стварэння парламента і іншага. Аднак у выніку Беларусь і Расія ўзгоднена выйшлі менавіта на тыя 28 праграм, якія цяпер рэалізуюцца, а ўсё астатняе было адхілена. Было вырашана, што калі два бакі пакуль не гатовы вырашаць тыя ці іншыя пытанні, то пакуль трэба пакінуць іх убаку. "Узнікне неабходнасць - будзем вырашаць. Так было сказана. А мы заўсёды настойвалі: калёсы паперадзе каня не трэба ставіць. Гэта было прынцыпова. І засталіся вось гэтыя 28 праграм. Яны сацыяльна-эканамічнага характару. І дзе адлюстраваны пытанні бяспекі. А час нас цяпер падштурхнуў такім чынам, што тыя праграмы па бяспецы, якія мы больш як год таму зацвярджалі, яны ўжо ўстарэлі. Мы ўжо ў двухбаковых адносінах у пытаннях бяспекі вой як далёка зайшлі", - сказаў Прэзідэнт.

"Гэта жыццё нас падштурхнула, і мы пайшлі на больш цесную інтэграцыю. Дык трэба дзейнічаць. Ісці ад жыцця. У адваротным выпадку ўсё зламаем", - дадаў беларускі лідар.

версія для друку

зрабіць стартавай

дабавіць у выбранае