Прамовы і інтэрв’ю

30 кастрычніка, Мінск /Юлія Дылянок - БЕЛТА/. Цікавасць еўрапейскага бізнесу да супрацоўніцтва з Беларуссю расце. Аб гэтым карэспандэнту БЕЛТА паведаміў Надзвычайны і Паўнамоцны Пасол Беларусі ў Францыі і па сумяшчальніцтве ў Іспаніі Павел Латушка.

"Урад і дыпламатычны корпус зацікаўлены, каб тэмп росту інвестыцый быў значна большым, чым цяпер. Гэта задача, якая стаіць перад намі штодзень. За апошняі гады ў Францыі мы правялі каля 40 гандлёва-эканамічных і інвестыцыйных прэзентацый Беларусі - як у Парыжы, так і ва ўсіх рэгіянальных сталіцах. Каля 10 прэзентацый адбылося ў Іспаніі, 2 - у Партугаліі. Мы бачым, што цікавасць да Беларусі ў еўрапейскага бізнесу ёсць", - адзначыў Павел Латушка.

Пасольства Беларусі ў Францыі прыняло ўдзел у арганізацыі Беларуска-еўрапейскага інвестыцыйнага форуму, які адбыўся 27 кастрычніка ў Люксембургу, былі запрошаны 17 французскіх і іспанскіх кампаній, зацікаўленых у развіцці як інвестыцыйнага, так і гандлёва-эканамічнага супрацоўніцтва з Беларуссю.

На палях форуму адбыліся перагаворы з прадстаўнікамі Цэнтральнаафрыканскай рэспублікі і некаторых іншых краін кантынента, якія зацікаўлены ў набыцці беларускай прадукцыі. Плануецца, што падтрымку ў рэалізацыі праектаў акажуць французскія кампаніі. "Мы ведаем, што французскі бізнес мае даволі моцныя сувязі і моцны на рынках афрыканскіх краін. 10 кастрычніка мы правялі беларуска-французска-афрыканскі форум у Парыжы, у якім прынялі ўдзел каля 100 прадстаўнікоў афрыканскіх і французскіх кампаній. Удзельнічалі таксама 14 прадстаўнікоў буйнейшых машынабудаўнічых прадпрыемстваў Беларусі. Цяпер тэма пашырэння беларускай прадукцыі пры падтрымцы французскіх кампаній на афрыканскі рынак з'яўляецца прыярытэтнай", - сказаў Павел Латушка.

Афрыканскія краіны ў асноўным зацікаўлены ў набыцці прадукцыі сельскагаспадарчага машынабудавання, БелАЗаў. "Па выніках праведзенага 10 кастрычніка форуму праведзены першы заказ сямі камбайнаў "Гомсельмаш" у Нігерыю. Гэта першыя пастаўкі, яны маюць кропкавы характар, але мы разлічваем, што яны атрымаюць сістэмны характар, іх аб'ём значна вырасце. Мы бачым, што менавіта афрыканскі рынак цяпер узрастаючы, ён вельмі перспектыўны. Усе аналітычныя прагнозы паказваюць, што ў бліжэйшыя дзесяць гадоў ВУП гэтых краін будзе прырастаць. А гэта адкрывае магчымасці для паставак нашай тэхнікі", - адзначыў пасол.

Ён растлумачыў, чаму Беларусі больш выгадна працаваць на Афрыканскім кантыненце пры пасрэдніцтве французскіх кампаній. "Нашы прадпрыемствы працуюць і без пасрэднікаў. Але гістарычна склалася, што вельмі моцныя пазіцыі французскіх кампаній на гэтым рынку. Яны ведаюць, як супрацоўнічаць з патэнцыяльнымі партнёрамі, як знаходзіць шляхі фінансавання такіх праектаў, таму ў гэтым выпадку пасрэдніцтва на карысць Беларусі", - дадаў пасол.

Павел Латушка расказаў пра канкрэтныя праекты, ужо рэалізаваныя ў Беларусі з прадстаўнікамі французскага бізнесу. "Перш за ўсё гэта інвестыцыі кампаніі Lactalis, якая набыла малакаперапрацоўчае прадпрыемства ў Ляхавіцкім раёне Брэсцкай вобласці. Інвестыцыі склалі каля $5 млн. На сустрэчы ў час форуму ў Люксембургу прадстаўнікі гэтай кампаніі выказалі зацікаўленасць у павелічэнні інвестыцый у сферу малочнай прамысловасці Беларусі", - паведаміў ён.

Акрамя таго, пасол адзначыў паспяхова рэалізаваны праект па вытворчасці дзіцячага харчавання пры падтрымцы французскага банка Credit Mutuel.

На сустрэчы ў Люксембургу прысутнічаў і прадстаўнік буйнейшага канцэрна Airbus. "Гэта міжнародны канцэрн, які цесна звязаны інвестыцыйна і эканамічна з Францыяй. Мы абмяркоўваем магчымасці кааперацыі ў вытворчасці запасных частак, пастаўкі тэхнікі. Важна, што буйнейшы сусветны канцэрн цікавіцца Беларуссю", - падкрэсліў Павел Латушка.

Таксама назіраецца рост цікавасці іспанскага бізнесу да Беларусі. "Нядаўна ў Мінску адбылося першае пасяджэнне камісіі па эканамічным і прамысловым супрацоўніцтве паміж Беларуссю і Іспаніяй. Мы бачым, што гэты рынак можа быць вельмі перспектыўным і для паставак нашай прадукцыі, і з пункту гледжання прыцягнення інвестыцый у нашу эканоміку", - рэзюмаваў пасол.