Прамовы і інтэрв’ю

1 верасня, Мінск /Аліна Грышкевіч - БЕЛТА/. Творчая спадчына Міхала Клеафаса Агінскага з'яўляецца агульнай для Беларусі і краін-суседак і сведчыць аб глыбокіх еўрапейскіх каранях беларускай культуры. Аб гэтым заявіла намеснік міністра замежных спраў Беларусі Алена Купчына сёння на адкрыцці ў беларускім МЗС выстаўкі "Паланэзы на вяртанне", перадае карэспандэнт БЕЛТА.

Экспазіцыя, прысвечаная 250-годдзю Міхала Клеафаса Агінскага, прадастаўлена з фондаў Дзяржаўнага музея гісторыі тэатральнай і музычнай культуры Беларусі. Намеснік міністра расказала, што ў 2008 годзе стала магчымым вяртанне ў Беларусь электронных копій матэрыялаў архіва Агінскага пры падтрымцы Бюро ЮНЕСКА ў Маскве і па ініцыятыве Нацыянальнай камісіі Беларусі па справах ЮНЕСКА. Перагаворы і ўсю падрыхтоўчую работу па вяртанні архіва ўзяў на сябе музей гісторыі тэатральнай і музычнай культуры.

Дырэктар гэтага музея Зінаіда Кучар адзначыла, што аснову выстаўкі складаюць матэрыялы вернутага архіва, якія ўпершыню прадстаўлены публічна. Тут і перапіска Міхала Клеафаса Агінскага з роднымі, яго публіцыстычныя творы, 400 лістоў яго нот. Хоць ён лічыў сябе не прафесійным музыкантам, яго бліскучы паланэз "Развітанне з Радзімай" да гэтага часу робіць незабыўнае ўражанне на слухачоў.

Архіў выкарыстаны пры стварэнні музейнай экспазіцыі сядзібы Агінскага ў вёсцы Залессе, дзе ён жыў 20 гадоў.

На прэзентацыі выстаўкі гучала яго музыка ў выкананні ансамбля "Вытокі".