30 верасня, Мінск /Таццяна Грыгаровіч - БЕЛТА/. Будаўніцтва ў Беларусі завода па вытворчасці легкавых аўтамабіляў мае для Geely Holding Group стратэгічнае значэнне. Аб гэтым паведаміў сёння журналістам у Мінску прэзідэнт карпарацыі "Джылі" Ань Цунхуэй перад сустрэчай з прэм'ер-міністрам Міхаілам Мясніковічам, перадае карэспандэнт БЕЛТА.
Кіраўнік кітайскай карпарацыі высока ацаніў ход рэалізацыі гэтага праекта. "Ён будзе мець стратэгічнае значэнне для нашай кампаніі Geely Holding Group. Таму я спадзяюся, што ў будучым мы будзем выкарыстоўваць усе магчымыя рэсурсы для яго паспяховай рэалізацыі", - сказаў Ань Цунхуэй.
Кіраўнік беларускага ўрада таксама адзначыў важнасць гэтага праекта для Беларусі. Нягледзячы на тое, што будаўніцтва завода - гэта камерцыйны праект, беларускі бок аказвае ўсялякае садзейнічанне яго рэалізацыі.
Паводле слоў Міхаіла Мясніковіча, праект адкрывае новую старонку беларуска-кітайскага супрацоўніцтва - інвестыцыйную. "Калі раней у нас было ў асноўным гандлёва-эканамічнае супрацоўніцтва, потым ажыццяўляўся шэраг праектаў на базе крэдытнай падтрымкі з боку банкаў Кітая, то праект па будаўніцтве завода па вытворчасці легкавых аўтамабіляў - гэта сапраўды інвестыцыйная фаза нашага супрацоўніцтва. І мы вельмі рады, што на палітычным узроўні і гэты праект, і напрамак у цэлым атрымліваюць усебаковую падтрымку", - адзначыў кіраўнік беларускага ўрада.
Пн | Аўт | Сер | Чцв | Пт | Сб | Нядз |
---|