13 верасня, Мінск /Кар. БЕЛТА/. Высокі ўзровень аховы здароўя Беларусі ацэнены міжнароднай супольнасцю, заявіла сёння журналістам перад урачыстым адкрыццём XXIII Міжнароднага кангрэса хірургаў-гепатолагаў краін СНД намеснік прэм'ер-міністра Беларусі Наталля Качанава, перадае карэспандэнт БЕЛТА.
"Сістэма аховы здароўя ў Беларусі працуе зладжана і на высокім узроўні. Гэта ацэнка і кіраўніка нашай дзяржавы, і міжнароднай супольнасці, што пацвярджае правядзенне ў Мінску XXIII Міжнароднага кангрэса хірургаў-гепатолагаў краін СНД", - сказала віцэ-прэм'ер.
Яна лічыць вельмі важным і значным той факт, што ў Беларусь прыязджаюць спецыялісты дзяліцца вопытам з розных краін свету. Разам з тым беларускім хірургам таксама ёсць што паказаць і расказаць сваім калегам. Напрыклад, сёння беларускія ўрачы правялі майстар-клас для калег з розных краін, прадэманстравалі сваё майстэрства ў прымяненні сучасных тэхналогій у хірургіі.
Сведчаннем высокага ўзроўню аказання медыцынскай дапамогі ў Беларусі з'яўляецца таксама павелічэнне колькасці зваротаў жыхароў іншых краін да паслуг беларускіх урачоў, заключыла Наталля Качанава.
XXIII Міжнародны кангрэс хірургаў-гепатолагаў краін СНД пройдзе ў Мінску з 14 па 16 верасня. У ім прымаюць удзел спецыялісты з Беларусі, Расіі, Украіны, Малдовы, Таджыкістана, Туркменістана, Грузіі, Казахстана і іншых краін. Усяго больш як 250 удзельнікаў будуць дзяліцца вопытам у галіне хірургіі.