Прамовы і інтэрв’ю
Качанава на пасяджэнні МПА СНД адзначыла дасягненні медыцыны Беларусі i прапанавала міжпарламенцкі дыялог аб сям'і
Скрыншот відэа Савета Федэрацыі
22 мая, Мінск /Кар. БЕЛТА/. Старшыня Савета Рэспублікі Наталля Качанава на 60-м пленарным пасяджэнні Міжпарламенцкай асамблеі дзяржаў - удзельніц Садружнасці Незалежных Дзяржаў прадставіла дасягненні беларускай аховы здароўя і прапанавала правесці на пляцоўцы Асамблеі мерапрыемства па тэме традыцыйных сямейных каштоўнасцей, перадае карэспандэнт БЕЛТА.
Павага і раўнапраўе
"Наша арганізацыя без перабольшання стала самай аўтарытэтнай міжнароднай парламенцкай пляцоўкай на прасторы Садружнасці. Тут, за круглым сталом, на прынцыпах узаемнай павагі, уліку нацыянальных інтарэсаў і раўнапраўя мы выпрацоўваем не проста ўзгодненыя падыходы да гарманізацыі заканадаўстваў, але і канкрэтныя сумесныя ініцыятывы ў эканоміцы, сацыяльнай палітыцы, бяспецы і гуманітарным развіцці", - адзначыла Наталля Качанава.
Паводле слоў спікера Савета Рэспублікі, менавіта ў Асамблеі ствараецца тая самая мадэльная база, якая пакладзена ў аснову многіх нацыянальных законаў і перадавых рашэнняў. І сёння, калі спробы ўмяшання ва ўнутраныя справы звонку не спыняюцца, Міжпарламенцкая асамблея застаецца надзейнай апорай у абароне дзяржаўнага суверэнітэту кожнай з краін СНД.
"Міжнародныя партнёры праяўляюць зацікаўленасць і імкнуцца ўзаемадзейнічаць з Асамблеяй. Кола наглядальнікаў з году ў год пашыраецца. Гэта нашы сумесныя дасягненні. Аднак іх не было б без чулых адносін і ўвагі, прыроджаных лідарскіх якасцей і высокага прафесіяналізму старшыні Савета (МПА СНД. - Заўвага БЕЛТА) Валянціны Мацвіенка", - сказала Наталля Качанава.
Падставы для гонару
Старшыня Савета Рэспублікі звярнула ўвагу, што 2026-ы аб'яўлены Годам аховы здароўя ў Садружнасці Незалежных Дзяржаў. Паводле яе слоў, гэта рашэнне своечасовае. Здароўе нацыі - фундамент дэмаграфічнай бяспекі, эканамічнай стабільнасці і ўстойлівага развіцця любой дзяржавы.
"Рэспубліка Беларусь паслядоўна выбудоўвае высокатэхналагічную, арыентаваную на чалавека сістэму аховы здароўя. Як падкрэсліў наш Прэзідэнт Аляксандр Лукашэнка, у беларускай медыцыне ёсць падставы для гонару. Мы захавалі ўсё лепшае, што было ў савецкай медыцыне, і прымножылі папярэднія дасягненні. Гэты стратэгічны курс сёння прыносіць рэальныя, адчувальныя вынікі", - сказала спікер.
Наталля Качанава адзначыла, што дзякуючы створанай шматузроўневай сістэме ранняга ўмяшання і высокатэхналагічнай дапамозе Беларусь мае высокія міжнародныя рэйтынгі па паказчыку нізкай дзіцячай смяротнасці і ўмовах для нараджэння дзяцей. За гэтымі дасягненнямі - выратаваныя жыцці, здароўе будучай нацыі і вялікая праца беларускіх урачоў.
Асаблівым гонарам, паводле яе слоў, з'яўляецца дзейнасць навукова-практычных цэнтраў. Беларускія хірургі выконваюць высокатэхналагічныя аперацыі ў кардыялогіі, нейрахірургіі, траўматалогіі і транспланталогіі. Шэраг вядучых медыцынскіх устаноў Беларусі ўзначальваюць члены Савета Рэспублікі.
У Праграме сацыяльна-эканамічнага развіцця Рэспублікі Беларусь на 2026-2030 гады ўмацаванне здароўя нацыі вызначана адным з ключавых прыярытэтаў нацыянальна-дэмаграфічнай бяспекі, звярнула ўвагу старшыня Савета Рэспублікі. "Мы ставім перад сабой канкрэтныя мэты: павелічэнне чаканай працягласці жыцця насельніцтва, зніжэнне агульнага ўзроўню смяротнасці, асаблівую ўвагу ўдзяляем развіццю прафілактычнай медыцыны", - сказала спікер.
Мадэльны закон аб радыяцыйнай бяспецы ў медыцыне
Наталля Качанава адзначыла, што сёлета ўспамінаецца сумная дата - 40-годдзе аварыі на Чарнобыльскай атамнай электрастанцыі. "Для многіх краін, асабліва для Беларусі, яна стала сур'ёзным выпрабаваннем. Наша краіна набыла вялікі вопыт у ліквідацыі наступстваў аварыі, у тым ліку ў радыяцыйнай медыцыне, у доўгатэрміновым маніторынгу здароўя насельніцтва і яго сацыяльнай абароне. Часткова гэты вопыт увайшоў у мадэльнае заканадаўства Асамблеі. Настаў час яго актуалізаваць. І планы па распрацоўцы мадэльнага закона аб радыяцыйнай бяспецы ў медыцыне вельмі своечасовыя", - дадала яна.
Здаровая і шчаслівая сям'я
Старшыня Савета Рэспублікі лічыць сімвалічным, што 60-е пленарнае пасяджэнне Асамблеі праходзіць літаральна праз тыдзень пасля Міжнароднага дня сям'і, які адзначаецца 15 мая. Паводле яе слоў, абарона традыцыйных каштоўнасцей, сямейных каштоўнасцей, умацаванне інстытута сям'і, дэмаграфічная бяспека для ўсіх краін Садружнасці ўваходзяць у лік прыярытэтных задач. "Менавіта ў сям'і закладваецца фундамент фізічнага і маральнага здароўя будучых пакаленняў. Здаровая сям'я - гэта здаровая нацыя, а шчаслівая сям'я - гэта моцная дзяржава", - упэўнена яна.
Улічваючы высокую значнасць гэтай тэмы, спікер Савета Рэспублікі прапанавала разгледзець магчымасць правядзення на пляцоўцы Асамблеі мерапрыемства на тэму традыцыйных сямейных каштоўнасцей. Гэта надасць дыялогу аб сям'і міжпарламенцкі ўзровень, дасць магчымасць абмяняцца лепшымі практыкамі, падкрэсліла Наталля Качанава.
Старшыня Савета Рэспублікі дадала, што сумесная работа ў рамках Асамблеі, набыты вопыт і, галоўнае, імкненне адстойваць суверэнныя інтарэсы сваіх дзяржаў даюць магчымасць упэўнена рухацца наперад.
версія для друку
зрабіць стартавай
дабавіць у выбранае